II Pot 8:4 - Sơ̆p Hlabơar Nơ̆r 'Bok Kei-Dei

⁴ Kơplah 'noh, pơtao oei pơma dơnuh hăm Gêhasi đam Êlisê bơngai mă 'Bok Kei-Dei yua pơtao jet: “Ih athei roi ăn kơ ĭnh tôm tơdrong tih mă Êlisê pơm bơih.”

II Pot 8:4 Referans Kwoze

Jang 24:24

Đunh 'biơ̆ dang 'bar pêng năr đơ̆ng noh 'bok kuan tih Phêlik năm tơ ei dơ̆ng. Akăn sư kư̆m năm hơdai hăm sư mơ̆n. Anăn sư Drusil. Sư bơngai Juđê. Phêlik krao Pôl năm tơ sư. Na bre sư mơ̆ng Pôl bơtho gah tơdrong lui kơ Kră Yang Yêsu Krist.

Yo 9:27

Na bơngai 'nao klaih kơ măt tol ei khan: “Inh roi kơ iĕm boih, mă-lei iĕm ưh kơ lui. Kơlih kơ kiơ iĕm wă kơ inh roi dơ̆ng? Iĕm wă lui kơ Sư mơ̆n dah kiơ?”

Luka 23:8

Lăp Hêrôt 'bôh Yêsu na sư hiôk tơpă yua kơ Hêrôt đơ̆ng sơ̆ chang wă tơ'bơ̆p Yêsu ră, yua kơ sư kơtơ̆ng ang Yêsu gơh pơm tơdrong mơsêh mơyang na sư 'maih lăng dêh.

Luka 9:9

Hêrôt sư khan: “Gah Yôhan inh chơ̆ng ako sư boih, na bơngai mă pơm lơ tơdrong mơsêh noh bu dơ̆ng?” Na Hêrôt 'maih chă tơ'bơ̆p Yêsu.

Mathiơ 2:8

Klaih kơ noh Hêrôt wơh lu sư năm tơ Pơlei Betlehem. Sư pơkă kơ lu đe noh thoi âu: “Iĕm năm chă kon nge 'noh tơ̆p 'bôh hŏ, mưh 'bôh boih iĕm brŏk roi kơ inh, wă kơ inh năm kơkuh kơ Sư mơ̆n.”

II Pot 7:10

Na lu sư năm hloi, krao lu linh gak 'măng dur pơlei, roi kơ lu sư: “Nhôn năm truh tơ kơđông linh Aram, rơhiăng ưh kơ 'bôh bơngai bu, kư̆m ưh kơ đei kơtơ̆ng 'bơ̆r bu mơ̆n, 'bôh lăp lu aseh, lu aseh iĕ oei chô̆ păng lu bơsŭn achăng lê̆ thoi so.”

II Pot 7:3

'Bơ̆t 'măng dur đei puăn 'nu bơngai jĭ chin, lu sư pơma dơnuh băl: “Bơ̆n hrăn ngôi kơ kiơ 'bơ̆t dâu dĭng truh kơ lôch?”

II Pot 7:1

Na Êlisê khan: “Mơ̆ng bĕ nơ̆r Kră Yang khan thoi âu: Năr dơning kư̆m kơplah jơ 'nâu mơ̆n, 'bơ̆t 'măng dur Pơlei Samari tơpŭng minh hnŏng iĕ, gô tĕch minh sêikơl jên hu, păng 'ba 'bar hnŏng iĕ, kư̆m tĕch minh sêikơl jên hu mơ̆n.

II Pot 6:32

Êlisê oei ngôi lăm hnam sư kơdih, păng lu kră pơlei kư̆m oei ngôi tăp dăr kơ sư, na pơtao wơh bơih bơngai năm pơlôch Êlisê. Mă-lei kơplah bơngai mă pơtao wơh năm ei ưh tam mă truh, na Êlisê, roi ăn kơ lu kră pơlei thoi âu: “To, iĕm lăng kon 'bok mă juăt kơ pơlôch bơngai noh athei đe năm kăt ako inh. Bơ̆n krăng hŏ mưh sư truh, tang lê̆ 'măng hŏ ưh kơ ăn sư mơ̆t, iĕm ưh kơ kơtơ̆ng jơ̆ng yŏng tơ'ngla sư nơnăm 'bơ̆t rŏng sư hă?”

II Pot 6:6

Êlisê bơngai 'Bok Kei-Dei yua jet: “Sung huŏng tơklă ayơ?” Bơngai ei tơhlâu ăn anih sư huŏng Êlisê koh minh hơjăl 'long, hrang tơklă pla sung huŏng noh, pơm kơ pla sung trơl đông kơpal đak

II Pot 5:14

Na Naaman jur hĭ lăm đak krong Jôrđăn păng môch tơpơh wơ̆t kiơ̆ thoi Êlisê bơngai mă 'Bok Kei-Dei yua noh athei sư. Sư klaih hloi kơtă ei, păng akar sư jing lei-lăi dang thoi so dơ̆ng, akar sư thoi akar nge.

II Pot 4:12

Sư khan kơ Gêhasi bơngai đam sư: “Krao bĕ bơngai drŏ-kăn Pơlei Sunem noh” Gêhasi krao duch ei na duch ei năm hĭ, dơ̆ng 'bơ̆t anăp Êlisê.

II Pot 2:24

Êlisê hue lăng lu hơ'lơ̆p ei păng sư yua hăm anăn Kră Yang na hiap lu sư. Na pluơk pluak 'bar tŏ chơgơu akăn lĕch đơ̆ng 'nhĕt, châu hek hok lê̆ puăn-jĭt 'bar 'nu lăm lu hơ'lơ̆p ei.

II Pot 2:14

Sư iŏk ao 'nguaih đơ̆ng sư dônh 'noh sư huăt tơ đak păng khan: “Kră Yang 'Bok Kei-Dei Êli tơ yơ?” Lăp sư huăt tơ đak bơih đak tơklah 'bar pah, đơ̆ng noh Êlisê tŏk hĭ.

II Pot 8:3

Đơ̆ng rŏng kơ tơpơh sơnăm noh, bơngai drŏ-kăn ei lĕch đơ̆ng dêh Philistin brŏk tơ Pơlei sư, sư năm apinh pơtao wă kơ sư gơh đei iŏk dơ̆ng hnam păng mir chŭn sư so.

II Pot 4:25

Thoi noh, duch ei năm truh tơ Êlisê bơngai mă Kră Yang 'Bok Kei-Dei yua, tơ kông Karmel. Êlisê tơmang 'bôh duch ei đơ̆ng ataih, na sư khan kơ Gêhasi, bơngai đam sư: “To bơngai drŏ-kăn Sunem truh tơ âu.”