II Kor 5:14 - Sơ̆p Hlabơar Nơ̆r 'Bok Kei-Dei

¹⁴ Nhôn băt kơ Yêsu Krist 'mêm kơ bơ̆n tơpă, na nhôn ưh kơ lăng tơdrong kon bơngai ôh. Nhôn băt kơ pôm Sư đĕch lôch tang đĭ-đăng kon bơngai tơpă, thoi noh na đĭ-đăng kơ bơ̆n kư̆m dang lôch thoi Sư.

II Kor 5:14 Referans Kwoze

Galati 2:20

Inh dang lĕ lôch hơdai hăm Yêsu Krist tơ 'long pơglang sơ̆ boih yua kơ akâu inh kơdih ưh kơ gơh pơm minh tơdrong kiơ ôh. Na dang ei inh ưh pă gơnang kơ akâu inh kơdih boih, inh gơnang kơ Yêsu Krist mă arih lăm akâu inh, lê̆ kơ Sư chă dui ba inh kiơ̆ kơ tơdrong Sư wă. Inh gơnang kơ Sư yua kơ Sư Kon 'Bok Kei-Dei tơpă, Sư 'mêm mơnat kơ inh mah ăn akâu Sư kơdih lôch tang inh.

Rom 5:15

Tơdrong yoch hăm tơdrong 'Bok Kei-Dei 'mêm mơnat, sư phara. Tơdrong yoch, yua kơ minh 'nu bơngai pơm yoch na đĭ-đăng bơngai jing lôch. Na tơdrong 'Bok Kei-Dei 'mêm mơnat, yua kơ minh 'nu Yêsu Krist lôch tang đĭ-đăng kon bơngai na kon bơngai gô iung arih.

Mathiơ 20:28

Kư̆m thoi Inh Kon Bơngai mơ̆n, Inh jur tơ ala teh âu ưh kơ sĭ Inh wă chă pơgŏ pơđep đe awih awăn kơ Inh ôh; Inh wă kơ tơ'ngla Inh kơdih awih awăn kơ đe păng Inh wă kơ tơ'ngla Inh kơdih lôch tang huai iŏk lơ bơngai.”

I Pet 1:8

Đơ̆ng sơ̆ iĕm ưh kơ 'bôh Yêsu Krist thoi yơ, mă iĕm 'mêm kơ Sư tơpă. Dang ei iĕm kư̆m ưh kơ 'bôh Sư mă iĕm kư̆m lui kơ Sư kơjăp, jơhngơ̆m iĕm hiôk ling-lang măng năr.

Yo 1:29

Năr đơ̆ng rŏng dơning dơ̆ng, Yôhan 'bôh Yêsu thar năm tơ sư, na Yôhan khan kơ đe: “Iĕm lăng bĕ, 'Bok to 'noh boih Kon Triu 'Bok Kei-Dei, 'Bok 'noh boih pơklaih yoch bơngai jơ̆p-jang kơ teh đak.

Hêbrơ 6:10

'Bok Kei-Dei Sư tơpăt dêh, Sư ưh kơ hiơt ôh dôm tơdrong jang iĕm mă sơ̆ mă dang ei, tơdrong iĕm 'mêm mơnat dih băl, tơdrong iĕm tơgŭm băl tơduă kon 'Bok Kei-Dei, yua kơ iĕm băt 'mêm kơ Sư.

II Kor 3:9

Tơ̆ng tơdrong pơkă noh sơ̆ 'lơ̆ng rŏ mă khan jô̆ kơ kon bơngai yoch, lei tơdrong pơgơ̆p 'nao mă jô̆ kơ kon bơngai 'lơ̆ng tơpăt dang ei 'lơ̆ng rŏ hloh loi kơ tơdrong pơkă so noh.

Hêbrơ 2:9

Bơ̆n 'bôh pôm Yêsu đĕch kơplah Sư oei tơ teh âu sơ̆ Sư dang lĕ kơ iĕ 'biơ̆ kơ lu linh jang, mă-lei lăp minh yuh đĕch. Pôm Sư đĕch bơ̆n 'bôh thoi lĕ kơ kon bơngai mă 'Bok Kei-Dei pôk Sư pơgơ̆r pơm Pơtao, yua kơ Sư chu iŏk tơdrong lôch pơmat tang đĭ rim 'nu bơngai, yua kơ 'Bok Kei-Dei 'mêm kơ bơ̆n.

Tit 3:3

Sơ̆ bơ̆n ưh kơ băt tơpă tơdrong 'Bok Kei-Dei, na bơ̆n ưh kơ chu Sư. Bơ̆n tơchĕng akâu kơdih khan pơm trŏ, mă bơ̆n pơm ưh kơ trŏ ôh. Bơ̆n hưch hanh lơ tơdrong kư̆ kă ưh kơ băt pơm tơdrong 'lơ̆ng thoi yơ. Bơ̆n 'maih chă tơdrong tơhil păng đe. Bơ̆n 'nhĕng đe, areh kơ đe păng đe areh kơ bơ̆n mơ̆n.

I Tim 5:6

Dah đei drŏ-kăn adro pơm đi chă mơdro akâu sư kơ lu bơngai drŏ-nglo, mă sư oei arih ră mă-lei lăng sư dang lĕ kơ lôch đĕch 'noh.

I Kor 16:22

Bơngai bu ưh kơ 'mêm kơ Kră Yang Yêsu, bơngai 'noh sư đei tơdrong 'Bok Kei-Dei wă phak sư. Ơ Kră Yang Yêsu, jur bĕ, dah jur tơ nhôn.

I Tim 2:6

Sư ăn akâu Sư kơdih lôch tang wă huai iŏk đĭ-đăng kon bơngai. Truh boih sơnăm 'Bok Kei-Dei pơkă Kon Sư lôch ei sơ̆, sơnăm 'noh boih Yêsu lôch tang huai iŏk kon bơngai, wă kon bơngai băt kơ 'Bok Kei-Dei pơklaih đĭ-đăng bơngai đơ̆ng yoch.

Kôlôsê 2:13

Iĕm bơngai khŭl nai, sơ̆ iĕm oei gơh pơm lơ tơdrong yoch, tơdrong kơnê̆, bơngai oei arih ră dang lĕ kơ bơngai lôch boih. Păng iĕm ưh kơ trŏ kơ bơngai 'Bok Kei-Dei wă tơgŭm thoi lu bơngai Juđê ôh. Mă-lei 'Bok Kei-Dei tơiung arih Yêsu Krist đơ̆ng lôch boih, dang Sư tơiung arih iĕm mơ̆n, Sư huay pă jô̆ yo boih dôm tơdrong yoch bơ̆n juăt kơ pơm sơ̆.

Êphêsô 6:24

Inh apinh sư wei-lăng lu bơngai mă băt 'mêm kơ Kră Yang bơ̆n Yêsu Krist ling-lang.

Yo 11:25

Yêsu khan kơ sư: “Inh boih tơiung arih bơngai đơ̆ng lôch păng ăn tơdrong arih ling-lang. Bơngai bu lui kơ Inh, bơngai 'noh sư lôch bưh mơ̆n, mă-lei Inh tơiung arih sư dơ̆ng.

Hơri Hiôk 1:4

Chông ba inh kiơ̆ ih bĕ kơdâu mă hrĕnh. Pơtao chông inh boih mơ̆t tơ anih sư.

I Kor 2:14

Lu bơngai kiơ̆ kơ sĕch akar wă khan lu ưh kơ lui, lu sư ưh kơ iŏk ôh dôm tơdrong đơ̆ng Yang Bơhngol 'Lơ̆ng 'Bok Kei-Dei, yua kơ lu sư ưh kơ đei Yang Bơhngol 'Lơ̆ng bơtho. Na lu sư ưh kơ hlôh, lu sư lăng dôm tơdrong 'noh nhen lĕ tơdrong kơtul đĕch.

Luka 15:24

yua kơ kon inh nhen lĕ lôch boih, mă-lei arih dơ̆ng. Sư hiong boih, mă-lei dang ei 'bôh sư dơ̆ng.’ Thoi noh lu sư ngôi pơchơt băl hloi.

Êsai 53:6

Đĭ-đăng lu bơ̆n thoi triu jrok trong. Rim 'nu kiơ̆ trong kơdih: Lei na Kră Yang iŏk đĭ tơdrong yoch lu bơ̆n tơpŭ ăn kơ sư.

I Yo 5:19

Păng bơ̆n kư̆m băt bơ̆n kon 'Bok Kei-Dei boih păng bơ̆n băt đĭ-đăng dôm lu bơngai mă lĕch đơ̆ng ala teh âu mă ưh kơ lui kơ Kon Sư, yang Satan pơgơ̆r lu sư.

II Kor 3:7

Tơdrong pơkă noh sơ̆ chih tơ tơmo lat wă phak pơlôch lu bơngai ưh kơ chu. Na lăp Môis iŏk tơmo lat noh đơ̆ng 'Bok Kei-Dei sơ̆, muh măt Môis rang hơdah dêh, truh tơ lu bơngai Isơrael mah pă kĕ lăng muh măt sư, mă-lei muh măt Môis rai đunh ưh pă rang hơdah boih.

Rom 2:2

Bơ̆n băt boih 'Bok Kei-Dei wă phak dôm lu bơngai pơm yoch trŏ tơpă.

Yo 5:25

“Inh khan tơpăt kơ iĕm dơ̆ng, ning-mônh kư̆m thoi dang ei mơ̆n, lu bơngai lôch gô kơtơ̆ng nơ̆r Kon 'Bok Kei-Dei krao sư, na bu mă mơ̆ng Sư krao, sư 'noh gô iung arih.

Jop 32:18

Yua kơ inh đei lơ nơ̆r wă pơma, lăm jơhngơ̆m inh pơdrŭt inh pơma.

Jang 18:5

Lăp bre Silas păng Timôthê truh tơ Pơlei Kôrintô đơ̆ng dêh char Masêđôn, na Pôl lê̆ tơdrong pơm hnam tua-la-tăng iŏk gah tơdrong bơtho sư dơ̆ng, bơtho lu bơngai Juđê khan Yêsu boih 'Bok Krist mă 'Bok Kei-Dei ăn wă pơgơ̆r bơ̆n.

Luka 24:29

Mă-lei bre noh pơtơm Sư khŏm khŏm khan: “Ih năm 'bĭch hơdai păng nhi 'biơ̆ wăi, yua kơ dang ei đĭ kơsơ̆ boih.” Na Yêsu chu bre sư.

Luka 15:32

Trŏ mơ̆n ba ngôi păng oh e, yua kơ sư nhen lôch boih mă-lei dang ei sư arih dơ̆ng; sư hiong đơ̆ng ba, mă-lei dang ei ba 'bôh sư dơ̆ng.’ ”

Rom 6:6

Sơ̆ bơ̆n akâu so, mă-lei dang ei dang đe pơ̆ng pơlôch bơ̆n hơdai hăm Yêsu tơ 'long pơglang boih, wă tơhiong đĭ dôm tơdrong so na mă bơ̆n gơh rơngei đơ̆ng tơdrong yoch.

Rom 6:13

Bơ̆n 'nĕ pă ăn akâu bơ̆n pơm yoch, bơ̆n athei pơjao akâu bơ̆n kơ 'Bok Kei-Dei đĕch, wă kơ 'Bok Kei-Dei wei-lăng chăl arih bơ̆n tơpăt ling-lang dang bơ̆n iung arih đơ̆ng lôch.

Kôlôsê 3:3

yua kơ bơ̆n nhen lôch boih, bơ̆n dang oei hơdai Yêsu Krist hăm 'Bok Kei-Dei.

I Ho 11:18

Na pêng 'nu bơngai 'nâu năm mơ̆t tơpăt kơđông linh Philistin sŏ iŏk đak đơ̆ng lăm sơlŭng jê̆ 'măng jang pơlei Betlehem, chĕp ba ăn kơ Đawit nhă mă-lei sư ưh kơ wă nhă, sư tuh hloi đak 'noh 'bơ̆t anăp Kră Yang,