II Kor 11:9 - Sơ̆p Hlabơar Nơ̆r 'Bok Kei-Dei

⁹ Kơplah inh oei păng iĕm noh, inh kư̆m jơ̆l ră mơ̆n mă-lei inh ưh kơ pơgŏ athei iĕm 'me inh ôh. Inh đei lu 'nhŏng oh bơ̆n đơ̆ng dêh Masêđôn chă tơgŭm mơnat kơ inh bơ̆n kon jên bơ̆n tơmam sa. Bĭ mă layơ inh ưh kơ wă athei iĕm tơgŭm inh ôh.

II Kor 11:9 Referans Kwoze

I Tes 2:9

Ơ 'nhŏng oh, iĕm hăm băt tơchĕng tơdrong nhôn bơ̆jang gleh tơpă dah ưh? Nhôn bơ̆jang bơtho rah păng jang rah păng ti 'me akâu nhôn kơdih, nhôn wă kơ iĕm huay mơnat kơ nhôn tơmam sa lăm nhôn bơtho iĕm tơdrong 'nao 'lơ̆ng 'Bok Kei-Dei ki.

I Tes 2:6

Nhôn bơtho iĕm ki ưh kơ sĭ nhôn wă kơ iĕm dah đe nai ư-ang kơ nhôn hơgei ôh. Mưh nhôn wă, pôm tơdrong sŏng sa đĕch iĕm gơh mơnat ăn kơ nhôn yua kơ nhôn jơ̆ng 'bang Yêsu Krist, mă-lei nhôn ưh kơ wă kơ iĕm mơnat ăn kơ nhôn tơmam sa ôh.

Hêbrơ 11:37

Lu mơ'nah đe klơ̆m sư păng tơmo, mơ'nah đe ot kơtĕch akâu sư păng juơ, mơ'nah đe koh pơlôch păng đao. Lu mơ'nah jơ̆l kơ dơnuh hin chă hrŭk hrăi ao pơm păng akar triu, akar bơbe. Lu sư dơnuh tơpă mă-lei đe oei areh kơ lu sư, pơm kơnê̆ kơ lu sư 'mơ̆i.

Philip 2:25

Dang ei inh athei Êpaphôdit jah brŏk tơ iĕm, đơ̆ng iĕm wơh sư năm ăn kơ inh tơmam, hăm iĕm wă kơ sư tơgŭm inh tơ âu. Sư 'nhŏng oh bơ̆n 'lơ̆ng tơpă, jang tơgŭm inh, dang linh tơgŭm băl tơdrong tơblah.

II Kor 9:12

Iĕm hơlăng kơ đe jên tơmam, ưh kơ sĭ yua kơ sư jơ̆l đĕch ôh, iĕm kư̆m dang tơgŭm sư bơnê kơ 'Bok Kei-Dei.

II Kor 6:4

Mă nhôn đei tơdrong đe pơm kơnê̆ pơmat-tat kơ nhôn, nhôn kư̆m ưh kơ đei pơm kiơ kơ đe, yua kơ nhôn đĭch đam 'Bok Kei-Dei jang kiơ̆ thoi Sư wă, wă kơ đĭ-đăng bơngai lăng tơdrong jang nhôn 'lơ̆ng.

Jang 20:33

Inh ưh kơ 'nhĕng jên đe dah hơbĕn ao đe ôh.

Jang 18:3

Bre sư bơ̆jang tơdrong pơm hnam tua-la-tăng na Pôl năm oei hloi tơ hnam bre sư, jang hơdai păng sư yua kơ Pôl juăt kơ jang tơdrong noh mơ̆n. Pôl kư̆m bơtho rah tơdrong 'Bok Kei-Dei.

Ne 5:15

Mă-lei lu kră wei-lăng adrol kơ inh pơgŏ kon pơlei tơgŭm tơmam sa păng sik, 'nguaih kơ puăn-jĭt sêikơl jên hu; lu bơngai đĭch đam kiơ̆ wei-lăng sư kư̆m wang chă apinh đơ̆ng kon pơlei đơ̆ng, mă-lei gah inh ưh kơ pơm thoi noh ôh; yua kơ hli yom kơ Kră Yang 'Bok Kei-Dei.

Jang 18:5

Lăp bre Silas păng Timôthê truh tơ Pơlei Kôrintô đơ̆ng dêh char Masêđôn, na Pôl lê̆ tơdrong pơm hnam tua-la-tăng iŏk gah tơdrong bơtho sư dơ̆ng, bơtho lu bơngai Juđê khan Yêsu boih 'Bok Krist mă 'Bok Kei-Dei ăn wă pơgơ̆r bơ̆n.

Rom 15:26

Jên noh đơ̆ng lu bơngai tơmoi mă ưh kơ khŭl Juđê tơ dêh Masêđôn păng dêh Grĕk mơnat ăn kơ lu bơngai lui dơnuh hin tơ Pơlei Jêrusalem wă kơ lu sư chă asong băl jên noh.

I Kor 16:17

Inh chhơp kơ jơhngơ̆m inh tơpă yua kơ inh 'bôh đe Sêphanna, Phơttuna păng Achaikơ đơ̆ng iĕm năm ngôi tơ inh. Inh rơnguơ̆ đĭ-đăng kơ iĕm ră, mă-lei 'bôh lu sư boih, dang 'bôh iĕm mơ̆n.