II Kor 10:18 - Sơ̆p Hlabơar Nơ̆r 'Bok Kei-Dei

¹⁸ Ưh kơ sĭ Kră Yang lăp đon kơ bơngai mă pơang akâu kơdih ôh, Sư lăp đon kơ bơngai bu mă Sư 'bôh pơm 'lơ̆ng pơm trŏ.

II Kor 10:18 Referans Kwoze

Luka 16:15

Na Yêsu khan kơ lu sư: “Lu iĕm lăp đon kơ đe khan kơ iĕm bơngai 'lơ̆ng ră, mă-lei 'Bok Kei-Dei băt kơ jơhngơ̆m lu iĕm kơnê̆. Tơdrong kon bơngai ala teh âu pơang khan 'lơ̆ng ră, mă-lei 'Bok Kei-Dei lăng kơnê̆ kơ Sư.

Tơdrông Pơđơk 21:2

Trong kon bơngai wă tă tơpăt kiơ̆ kơ măt sư kơdih. Mă-lei đei Kră Yang lăng lăm jơhngơ̆m.

I Kor 4:5

Thoi noh mă bu bu bơngai thoi yơ bơ̆n 'nĕ chă sek pơma tơdrong sư, gô mơ̆ng kơ Kră Yang jur đĕch, Sư gô tơbăt hơdah ăn tôm tơdrong kon bơngai mă oei ôn pơhrĕp păng tôm tơdrong kon bơngai tơchĕng wă. Hơtai ei kơnh đĭ-đăng rim 'nu kơ bơ̆n mă pơm kiơ̆ kơ Sư wă gô đei nơ̆r Kră Yang bơnê.

Rom 2:29

Bơngai bu wă kiơ̆ tơdrong 'Bok Kei-Dei, sư kiơ̆ hăm đĭ jơhngơ̆m đon sư, bơngai noh 'Bok Kei-Dei jô̆ sư bơngai Juđê. Dah bơ̆n adrin kiơ̆ Sư hăm đĭ jơhngơ̆m klơm klak, 'nĕ kiơ̆ pôm 'bơ̆r, bơngai noh 'Bok Kei-Dei jô̆ dang sư kăt tơdra akar mơ̆n. Dah bơ̆n pơm thoi noh, bơ̆n ưh kơ kăl kơ kon bơngai lăp đon kơ bơ̆n ôh, yua kơ bơ̆n đei 'Bok Kei-Dei lăp đon kơ bơ̆n boih.

II Kor 10:12

Lu bơngai noh 'bơ̆r lu sư kơdih đĕch khan trŏ kơ lu sư pơm jơ̆ng 'bang Yêsu Krist. Nhôn ưh kơ pơ̆n pơm thoi noh ôh, nhôn gô mơ̆ng kơ 'Bok Kei-Dei ăn. Lu bơngai noh lu sư ưh kơ hlôh, na lu sư tah akâu kơdih pơm jơ̆ng 'bang Yêsu.

Yo 12:43

Lu kră ei wă kơ lu bôl buăl sư lăp đon kơ lu sư hloh kơ lu sư wă kơ 'Bok Kei-Dei lăp đon kơ lu sư.

Tơdrông Pơđơk 27:2

Lê̆ kơ đe pơư kơ ih, kơdih akâu ih 'nĕ kơ pơma 'bơm. Lê̆ kơ đe pơư pơma, tơ'ngla ih 'nĕ yua 'bơ̆r ih kơdih ôh.

I Pet 1:7

Tơdrong gleh 'Bok Kei-Dei wă pơlong lăng tơdrong lui bơ̆n, wă kơ băt bơ̆n lui tơpă dah ưh. Bĭ maih đe kư̆m 'buh pơlong sư tơ ŭnh wă kơ băt sư maih tơpă dah ưh; na tơdrong bơ̆n lui kơ Yêsu Krist kăl hloh kơ maih tơpă, yua kơ maih sư gô hiong răm. Na bơ̆n kon bơngai trŏ kơ 'Bok Kei-Dei pơlong lăng tơdrong lui bơ̆n wă kơ bơ̆n lui kơjăp, na Sư gô bơnê kơ bơ̆n, hăm ăn kơ bơ̆n hiôk kơplah năr Yêsu Krist jur ning-mônh.

II Kor 13:7

Nhôn krao khan apinh 'Bok Kei-Dei tơgŭm iĕm huay kơ pơm yoch, na đe gô băt kơ nhôn gơh tơgŭm iĕm yua kơ Yêsu Krist oei hơdai nhôn. Mă-lei nhôn ưh kơ gan kăl kơ đe băt tơdrong noh ôh. Nhôn krao khan kơ Sư wă kơ Sư tơgŭm iĕm đĕch. Tơ̆ng iĕm pơm 'lơ̆ng, nhôn truh tơ noh, nhôn ưh pă kăl kơ bơtho iĕm boih păng nhôn kư̆m ưh pă kăl kơ tơbăt kơ iĕm nhôn jơ̆ng 'bang Yêsu Krist.

II Kor 6:4

Mă nhôn đei tơdrong đe pơm kơnê̆ pơmat-tat kơ nhôn, nhôn kư̆m ưh kơ đei pơm kiơ kơ đe, yua kơ nhôn đĭch đam 'Bok Kei-Dei jang kiơ̆ thoi Sư wă, wă kơ đĭ-đăng bơngai lăng tơdrong jang nhôn 'lơ̆ng.

Rom 14:18

Bơngai mă lui yom kơ Yêsu thoi noh, bơngai noh 'Bok Kei-Dei lăp đon, mă tơduă kon bơngai kư̆m lăp đon mơ̆n.

II Tim 2:15

Ơ Timôthê, ih athei adrin jang tơdrong 'Bok Kei-Dei wă kơ Sư lăp đon kơ tơdrong jang ih tơpă. Ih jang thoi noh ih huay kơ mơlâu kơ tơdrong jang ih ôh, yua kơ ih bơtho trŏ tơdrong 'Bok Kei-Dei.

II Kor 5:12

Nhôn pơma thoi noh ưh kơ sĭ nhôn wă pơang kơ iĕm ôh, nhôn pơma wă kơ iĕm hiôk 'bôh nhôn pơm trŏ. Thoi noh na mưh đe jô̆ kơ nhôn khan bơngai pơang, iĕm gơh tơl tơwih kơ lu sư, lu sư wih trŏ kơ bơngai pơang dơ̆ng, yua kơ dôm tơdrong lu sư pơma pơang 'bơ̆t anăp đe ngăl, ưh kơ đei tơpăt ôh.

II Kor 3:1

Nhôn pơma thoi noh, nhôn wă kơ iĕm băt kơ nhôn pơm 'bok bơtho iĕm hă? Ưh ôh. Nhôn ưh kơ kăl kơthơ đe chih tơbăt kơ iĕm, kơthơ iĕm chih tơbăt kơ đe khan nhôn 'bok bơtho iĕm ôh. Lu bơngai nai sư wă thoi noh tơpă, mă-lei lu nhôn ưh ôh.

I Kor 11:19

Iĕm ling-lang juăt kơ tơklah dih băl đon thoi noh iĕm tơchĕng lăng, bu kơ iĕm pơm đon 'lơ̆ng đon kơnê̆.

Rom 16:10

Inh đei nơ̆r jet gia Apelơ, sư đei tơdrong gleh mă-lei sư oei lui kơ Yêsu Krist kơjăp. Inh kư̆m wă jet gia lăng hnam dơnŏ đe Rihtô sư thoi yơ.

Jang 2:22

Pêtrôs oei pơma: “Ơ lu đe Isơrael, mơ̆ng inh bĕ. Yêsu Pơlei Nasaret, bơngai mă 'Bok Kei-Dei wơh Sư pơm tơdrong mơsêh mơyang, pơm tơdrong hlĭch hlăch, tơ'bôh kơ iĕm tơdrong chrơp, 'Bok Kei-Dei yua Sư pơm lu tơdrong 'noh tơ lăm lu iĕm, thoi lu iĕm đei băt boih.

Tơdrông Pơđơk 12:8

Bơngai bu gơh hơgei đei đon tơpăt đe bơnê. Mă-lei bơngai bu jơhngơ̆m kơnê̆ đe pơchê pơjăm.