II Kor 1:14 - Sơ̆p Hlabơar Nơ̆r 'Bok Kei-Dei

¹⁴ Dang ei iĕm tam mă băt nhên nhôn bơngai thoi yơ, layơ kơnh iĕm kư̆m hlôh mơ̆n. Thoi noh na mưh Kră Yang Yêsu Krist jur, iĕm hiôk yua kơ nhôn pơm 'lơ̆ng; nhôn kư̆m hiôk yua kơ iĕm lui đơ̆ng nhôn bơtho.

II Kor 1:14 Referans Kwoze

Philip 2:16

Iĕm tơ'bôh kơ lu sư tơdrong 'Bok Kei-Dei ăn kơ kon bơngai arih, thoi noh na lăp truh năr Yêsu Krist jur ning-mônh jơhngơ̆m inh hiôk dêh, yua kơ tơdrong jang inh đei yua; ưh kơ sĭ jang tŭk đĕch ôh.

I Kor 1:8

Sư ăn kơ iĕm oei lui kơjăp truh năr tôch, wă kơ iĕm oei 'lơ̆ng tơpăt huay kơ đei tơdrong yoch kiơ kơplah năr Kră Yang Yêsu Krist jur.

I Tes 3:13

Thoi noh boih na jơhngơ̆m iĕm jing pran kơtang, na lăp Kră Yang bơ̆n Yêsu Krist jur đơ̆ng plĕnh hơdai păng lu bơngai lui kơ Sư ning-mônh, na 'Bă tơm bơ̆n 'Bok Kei-Dei 'bôh iĕm bơngai 'lơ̆ng tơpăt huay kơ đei tơdrong yoch.

Philip 4:1

Yua kơ thoi noh, ơ lu 'nhŏng oh, iĕm athei lui kơjăp thoi noh, na gơh kiơ̆ Kră Yang Yêsu Krist. Inh 'mêm kơ iĕm tơpă păng rơnguơ̆ kơ iĕm dêh 'maih tơ'bơ̆p iĕm dơ̆ng. Yua kơ iĕm lui đơ̆ng inh bơtho oei kiơ̆ khŏm khŏm na jơhngơ̆m inh hiôk dêh dang đe apah kơ tơdrong jang inh tơmam.

I Tes 5:23

'Bok Kei-Dei ăn kơ bơ̆n hiôk-hian ling-lang. Na nhôn apinh Sư ăn kơ iĕm jing bơngai 'lơ̆ng tơpăt lăm tôm tơdrong thoi Sư wă. Păng nhôn apinh Sư wei-lăng bơhngol iĕm, jơhngơ̆m đon iĕm, akâu jăn iĕm, wă kơ iĕm huay kơ đei tơdrong yoch, truh Kră Yang Yêsu jur tơ teh ning-mônh.

Philip 1:6

'Bok Kei-Dei jô̆ iĕm jing bơngai 'lơ̆ng boih, na inh băt tơpă Sư gô tơgŭm iĕm ling-lang truh tơ năr Yêsu Krist jur ning-mônh.

II Kor 5:12

Nhôn pơma thoi noh ưh kơ sĭ nhôn wă pơang kơ iĕm ôh, nhôn pơma wă kơ iĕm hiôk 'bôh nhôn pơm trŏ. Thoi noh na mưh đe jô̆ kơ nhôn khan bơngai pơang, iĕm gơh tơl tơwih kơ lu sư, lu sư wih trŏ kơ bơngai pơang dơ̆ng, yua kơ dôm tơdrong lu sư pơma pơang 'bơ̆t anăp đe ngăl, ưh kơ đei tơpăt ôh.

II Kor 2:5

Tơ̆ng đe pơm kơ inh ưh kơ hiôk, ưh kơ sĭ kơdrô̆ inh ôh sơ'ngon, iĕm kư̆m sơ'ngon lei-lăi. Mă-lei tơdrong noh inh ưh kơ kăl kơ pơma lơ ôh.

Rom 11:25

Ơ 'nhŏng oh, inh ưh kơ wă kơ iĕm pơang kơ đe khan iĕm bơngai hơgei hloh kơ bơngai Isơrael ôh. Na dang ei inh wă tơbăt ăn kơ iĕm minh tơdrong âu mă 'Bok Kei-Dei tam mă tơbăt ăn kơ bơ̆n đơ̆ng sơ̆, tơdrong noh thoi âu: Lu bơngai Isơrael mơ'nah kuă tơpă boih lui kơ 'Bok Kei-Dei, noh na Sư ăn kơ lu bơngai mă kuă noh jing arăng kơ̆l khŏm khŏm truh tơ Sư krao tôm kơ lu khŭl nai bu mă Sư rơih iŏk lui kơ Sư.

I Kor 15:31

Ơ 'nhŏng oh, inh wă roi tơbăt ăn kơ iĕm gah tơdrong đe wă pơrăm inh, na rim năr ưh kơ băt năr ayơ inh lôch, mă-lei inh hiôk tơpă lăm jơhngơ̆m inh yua kơ iĕm lui kơjăp kơ Kră Yang bơ̆n Yêsu Krist boih, na inh mah roi tơbăt ăn kơ iĕm thoi noh.

I Kor 11:18

Tơdrong mă mônh thoi âu: Inh kơtơ̆ng ang đơ̆ng đe khan lăm lu iĕm akŭm đei tơklah băl đon đei 'bar pêng khŭl. Đe khan kơ inh thoi noh inh kư̆m lui kơ sư 'biơ̆ mơ̆n.

Philip 1:26

Na iĕm gô ư-ang Yêsu Krist ăn kơ inh gơh năm tơ iĕm dơ̆ng.

II Kor 9:2

yua kơ inh băt kơ iĕm 'maih tơgŭm bôl tơpă. 'Noh na inh roi pơang tơdrong lu iĕm mă oei tơ dêh Grĕk kơ lu bơngai lui tơ dêh Masêđôn, tơdrong iĕm 'maih tơgŭm lu đe noh đơ̆ng sơnăm sơ̆ boih. Lu sư 'bôh iĕm chơgăm, lu sư kư̆m 'maih mơ̆n.