Horiso 25:5 - Sơ̆p Hlabơar Nơ̆r 'Bok Kei-Dei

⁵ Apinh chông ba inh lăm trong tơpăt Ih păng bơtho tơ'bôh kơ inh, Yua kơ Ih boih Kră Yang 'Bok Kei-Dei dŏng pơklaih inh. Rim năr inh chang gô Ih.

Horiso 25:5 Referans Kwoze

Tơdrông Pơđơk 8:34

Pŭn hiôk dêh bơngai bu mơ̆ng kiơ̆ nơ̆r Inh; Oei lăng măng năr 'bơ̆t 'măng jang Inh, gô răp 'bơ̆t 'măng hnam Inh.

Horiso 25:10

Lu trong Kră Yang 'mêm mơnat păng tơpăt ngăl Ăn kơ bu mă bơwei nơ̆r Sư pơkă păng tơdrong Sư pơgơ̆p.

Êsai 30:18

Mă tơpă, Kră Yang oei gô wă pơm 'lơ̆ng kơ lu iĕm, Tơpă Sư gô 'mêm mơnat kơ lu iĕm. Kră Yang jơ̆ Kră Yang 'Bok Kei-Dei 'lơ̆ng tơpăt. Pŭn hiôk dêh kơ bơngai bu oei chang gô Sư!

Tơdrông Tơ'bôh 7:17

Kon Triu oei hơdai Pơtao bơ̆n 'Bok Kei-Dei, Sư wei-lăng lu đe noh, anhăk ba lu sư truh boih tơ tu đak mă ăn kơ kon bơngai arih ling-lang. 'Bok Kei-Dei sut đak măt lu sư huay pă nhơ̆m hmoi boih.”

Yo 14:26

'Bok Dŏng iĕm ei, anăn Sư Yang Bơhngol 'Lơ̆ng, Sư 'noh 'Bă Inh wă wơh Sư jur oei păng iĕm jang tang Inh. Sư gô bơtho iĕm tôm tơdrong păng Sư gô tơ'blŏk ăn kơ iĕm tôm tơdrong mă Inh bơtho iĕm boih.

Yo 16:13

Mă-lei lăp Yang Bơhngol 'Lơ̆ng mă tơbăt ăn kơ iĕm tơdrong 'Bok Kei-Dei ei truh, Sư bơtho ăn kơ iĕm tôm tơdrong 'Bok Kei-Dei. Sư ưh kơ bơtho tơdrong Sư kơdih ôh, Sư bơtho iĕm dôm tơdrong Sư kơtơ̆ng đơ̆ng 'Bă Inh. Sư kư̆m bơtho gah tơdrong ning-mônh mơ̆n.

Horiso 88:1

Ơ Kră Yang, 'Bok Kei-Dei, Tơ'ngla dŏng pơklaih inh măng năr inh krao ôr 'bơ̆t anăp Ih.

Horiso 79:9

Ơ Kră Yang 'Bok Kei-Dei Tơ'ngla dŏng pơklaih nhôn, yua kơ wă ư-ang anăn Ih apinh Ih tơgŭm nhôn. Yua kơ anăn Ih, apinh Ih dŏng pơklaih lu nhôn, păng mơnat ăn kơ tơdrong yoch lu nhôn.

Ne 9:20

Ih ăn boih kơ lu sư yang Bơhngol 'lơ̆ng tơpăt Ih wă bơtho tơ'bôh ăn kơ lu sư, kư̆m ưh kơ sơngah mana kơ 'bơ̆r lu sư sa păng đak nhă kơ lu sư rơhing.

I Yo 2:27

Gah iĕm Yêsu Krist ăn kơ iĕm Yang Bơhngol 'Lơ̆ng boih. Na lăp Yang Bơhngol 'Lơ̆ng oei lơ̆m jơhngơ̆m iĕm, iĕm ưh pă wă kơ lu đe noh bơtho iĕm dơ̆ng ôh, kơlih kơ Yang Bơhngol 'Lơ̆ng bơtho iĕm tôm tơdrong. Dôm tơdrong Sư bơtho tơpăt ngăl, ưh kơ sĭ Sư bơtho tơdrong hơlĕnh ôh. Thoi noh na iĕm athei răk dôm tơdrong Sư pơkă hŏ wă kơ iĕm lui kơjăp kơ Yêsu Krist.

Rom 8:14

Dôm lu bơngai lui yom kơ Yang Bơhngol 'Lơ̆ng 'Bok Kei-Dei, lu sư jing kon 'Bok Kei-Dei.

Luka 18:7

Pơma kơ kiơ kơ 'Bok Kei-Dei Sư gô tơdŏng tơpă lu bơngai mă Sư đĭ rơih boih mă oei krao khan kơ Sư măng năr. 'Bok Kei-Dei hăm ngê̆ gô đunh ưh?

Êsai 49:10

Lu sư gô ưh kơ đei pơngot, ưh kơ đei ol kơ đak, hơyuh tŏ dah măt 'năr ưh kơ đei pơm kơ lu sư tŏ. Yua kơ Tơ'ngla 'mêm mơnat lu sư, gô chông anhăk ba lu sư năm truh tơ jê̆ cheng đak glung.

Horiso 119:66

Apinh Ih bơtho inh hlôh wao. Wă kơ inh pơm trŏ. Yua kơ inh lui kơ nơ̆r Ih tơtă.

Horiso 107:7

Dui ba lu sư rok trong tơpăt. Lu sư năm truh tơ pơlei tih mă gơh oei.

Êsai 42:16

Inh gô chông lu bơngai măt tol rok trong lu sư ưh kơ biơh năm, dui lu sư rok trong iĕ mă lu sư ưh tam juăt; inh gô tơplih măng mu jing hơdah 'bơ̆t anăp lu sư, Inh gô pơm kơ teh jrŭ đơng jing dơnă. Tơpă inh gô pơm lu tơdrong noh păng ưh kơ achăng tŭk lu sư ôh.

Je 31:9

Lu sư brŏk hăm nhơ̆m hmoi, păng krao khan, Inh gô pơlung păng chông ba lu sư, Inh gô bơrơng lu sư rok cheng đak glung, rok trong dơhnă, lu sư huay kơtơih pơ̆k, yua kơ Inh boih 'bă kơ lu adrĕch Isơrael, păng Êphraim kon kơdră Inh.

Êsai 54:13

Đĭ-đăng kon ih gô đei Kră Yang bơtho tơ'bôh, păng tơdrong hiôk-hian kon hơ'lơ̆p ih gô tih tơpă.

Êsai 35:8

Tơ noh gô đei minh pôm trong glung tih. Minh pôm trong đe krao trong 'Lơ̆ng Rơgoh. Bơngai 'mê̆-'mach ưh kơ gơh năm trong noh. Mă-lei 'măn lu bơngai kiơ̆ Kră Yang năm trong noh. Mă khan đơ̆ng kơ hlôh kơwao kư̆m huay kơ jrok.

Tơdrông Pơđơk 23:17

'Nĕ ăn jơhngơ̆m ih arih 'ngeng kơ lu bơngai yoch. Mă-lei athei arih băt hli yom kơ Kră Yang rim năr.

Horiso 119:97

Inh 'mêm kơ khôi juăt Ih dêh! Prăt năr inh tơchĕng kơ khôi juăt noh.

Yo 6:45

Lu 'bok pơtruh nơ̆r 'Bok Kei-Dei chih lăm sơ̆p hla bơar lu sư sơ̆ thoi âu: ‘'Bok Kei-Dei gô bơtho đĭ-đăng bơngai.’ Inh khan kơ iĕm, bơngai bu mơ̆ng nơ̆r 'Bă Inh păng lui kơ nơ̆r Sư bơtho, lu bơngai 'noh gô truh tơ Inh.

Horiso 86:3

Ơ Kră Yang! Apinh Ih mơnat kơ inh, yua kơ prăt năr inh krao apinh Ih.

Horiso 24:5

Bơngai noh gô đei pŭn hiôk đơ̆ng Kră Yang, Păng tơdrong tơpăt đơ̆ng Kră Yang 'Bok Kei-Dei, Tơ'ngla dŏng pơklaih Sư.

Horiso 22:2

Ơ Kră Yang 'Bok Kei-Dei inh! Prăt năr inh krao khan, Ih ưh kơ tơl tơwih. Kơmăng inh kư̆m pă đei pơdơh.a

Horiso 119:33

Ơ Kră Yang, apinh bơtho tơ'bôh kơ inh kiơ̆ trong Ih tơtă. Na inh gô wei răk dĭng truh tơ năr tôch.

Horiso 119:26

Inh đei roi boih trong inh kơ Ih. Na Ih đei tơl tơwih kơ inh; apinh Ih bơtho inh dôm tơdrong juăt Ih.

Jop 36:22

Âu, Kră Yang 'Bok Kei-Dei đei tơdrong Mơsêh Mơyang Tih Hloh kơ đĭ-đăng, Hăm đei 'bok thây ayơ bơtho tơ'bôh thoi Kră Yang ưh?

Horiso 68:20

Kră Yang 'Bok Kei-Dei jơ̆ Kră Yang 'Bok Kei-Dei mă huai iŏk lu bơ̆n; Noh đơ̆ng Kră Yang na mă bơ̆n gơh klaih đơ̆ng lôch

Horiso 25:8

Kră Yang 'lơ̆ng rŏ păng tơpăt. Yua kơ thoi noh Sư gô bơtho tơ'bôh trong kơ lu bơngai yoch.

Bl 49:18

Ơ Kră Yang! Inh chang tơdrong dŏng pơklaih đơ̆ng Ih!

Mi 7:7

Mă-lei gah inh, inh gô lăng Kră Yang, chang gô 'Bok Kei-Dei Tơ'ngla dŏng pơklaih inh; 'Bok Kei-Dei Kră Yang gô mơ̆ng nơ̆r inh.