Esther 3:12 - Sơ̆p Hlabơar Nơ̆r 'Bok Kei-Dei

¹² Lăm năr mơjĭt-pêng khei mă mônh, krao lu bơngai jang chih hla bơar tơbăt kơ tơdrong juăt kiơ̆ kơ Haman tơtă boih kơ lu kuan tih pơtao đĭ-đăng lu kră pơgơ̆r tơring păng đĭ kơ lu kră pơgơ̆r rim kon pơlei lăm jơ̆p kơ dêh, tơring ayơ chih kiơ̆ kơ nơ̆r sư kơdih, adrĕch ayơ chih kiơ̆ nơ̆r pơma sư kơdih. Lu đe chih tơdrong kĭ anăn pơtao Asêrus păng iŏk tơkhiĕn pơtao chơ̆m hla bơar noh.

Esther 3:12 Referans Kwoze

I Pot 21:8

Jêsebel chih hla bơar yua hăm anăn pơtao Ahap păng chơ̆m tơdra đơ̆ng pơtao, đơ̆ng noh gơih ăn kơ lu kră pơlei păng lu bơngai đe pơyom oei hơdai hăm pơlei Nabôt.

Esther 1:22

Sư tơjur nơ̆r chih ăn kơ đĭ-đăng char lăm dêh char sư pơgơ̆r kiơ̆ kơ nơ̆r pơma lăm rim tơring, wă kơ rim 'nu drŏ-nglo jing pơm yŏng tơ'ngla lăm hnam dơnŏ sư kơdih, yua nơ̆r sư kơdih chă bơtho tơ'bôh.

Da 6:15

Mă-lei lu đe noh năm khan kơ pơtao thoi âu: Ơ pơtao, apinh ih 'blŏk kiơ̆ kơ tơdrong juăt bơngai Mêđi păng bơngai Pherơsơ, tơdrong pơkơ̆m dah tơdrong juăt ayơ đei pơjing boih, ưh pă gơh tơplih dơ̆ng.

Da 6:12

Lu sư năm tơ pơtao păng roi kơ pơtao, gah tơdrong mă sư đei kĭ boih lăm hla bơar pơkơ̆m noh thoi âu: Ơ pơtao ih đei kĭ boih lăm hla bơar pơkơ̆m noh păng pơkă lăm pêng-jĭt năr, dah đei bu krao khan kơ yang nai dah krao khan kơ bơngai nai 'nguaih kơ ih na gô klơ̆m lê̆ sư tơ lăm war dăm-brang hăm trŏ ưh? Pơtao drơ̆ng trŏ tơpă kiơ̆ tơdrong juăt lu bơngai Mêđi păng bơngai Pherơsơ, ưh pă tơplih boih.

Da 6:8

Dang ei, ơ pơtao, chih pơkăm tơbăt bĕ păng kĭ hloi măt ih lăm noh, wă kơ kĭ huay kơ tơplih, kiơ̆ thoi tơdrong juăt bơngai Mêđi păng bơngai Pherơsơ, ưh pă gơh tơplih boih.

Esther 9:27

thoi noh na bơngai Juđa iŏk răk năr kơ lu sư kơdih păng răk kơ lu kon sâu sư păng ăn kơ lu bơngai mơ̆t khŭl sư, wă kơ rim sơnăm wei răk 'bar năr âu kiơ̆ kơ hla bơar đei chih boih, ưh kơ gơh bu hiơt.

Esther 8:2

Pơtao plôh iŏk tơkhiĕn mă đêl sư pơsĭt đơ̆ng Haman jao kơ Morđêkai yă pơtao Esther jao ăn kơ Morđêkai wei-lăng hnam đêl Haman oei.

Esơra 8:36

Lu sư pơjao hla bơar nơ̆r tơtă đơ̆ng pơtao ăn kơ lu 'bok kuan wei tơring păng ăn kơ lu 'bok kuan wei pơgơ̆r char gah bơmơ̆t đak krong, na lu sư tơgŭm kon pơlei păng tơdrong jang hnam akŭm Kră Yang 'Bok Kei-Dei.

Esther 3:11

Pơtao khan kơ Haman jao boih kơ ih pơm bĕ mơ̆ng kơ ih wă.

Da 3:10

Ơ pơtao ih boih pơkă, bơngai bu kơtơ̆ng keng, brŏ, 'lal re, athei đĭ-đăng kon bơngai drap kơkuh kơ rup man păng maih noh.

Da 6:25

Đơ̆ng noh, pơtao Đarius chih tơbăt ăn kơ đĭ-đăng kon pơlei pơla, tơ jơ̆p dêh char, tơ rim adrĕch, rim nơ̆r pơma kơpal teh thoi âu: Hơpơi kơ lu iĕm đei tơdrong pŭn hiôk rai dêh.