Êsai 41:14 - Sơ̆p Hlabơar Nơ̆r 'Bok Kei-Dei

¹⁴ Ơ adrĕch Jakôp thoi hơdrông, ơ lu kon pơlei Isơrael, 'nĕ kơ hli kơ kiơ, Inh gô tơgŭm iĕm, Kră Yang pơma thoi noh, Tơ'ngla 'Lơ̆ng tơpăt đe Isơrael păng Tơ'ngla huai iŏk lu iĕm.

Êsai 41:14 Referans Kwoze

Êsai 43:14

Kră Yang, Tơ'ngla huai iŏk lu iĕm, Kră Yang 'lơ̆ng Rơgoh đe Isơrael khan thoi âu: “Yua kơ lu iĕm, Inh wơh đe năm truh tơ pơlei Babilôn, pơm kơ lu sư kơdâu đĭ wă khan lu bơngai Kalđê, kơdâu ôn jur tơ lu thŏng-nan nhơ̆m hmoi.

Êsai 54:5

Yua kơ Tơ'ngla pơjing iĕm noh klo iĕm. Anăn Sư Kră Yang Tih Hloh. Tơ'ngla huai iŏk iĕm noh mă Tơ'ngla Rơgoh Isơrael; Sư noh boih Kră Yang 'Bok Kei-Dei kơ đĭ plĕnh teh.

Horiso 22:6

Mă-lei inh nhen thoi hơdrông ưh kơ trŏ kon bơngai. Inh jing tơmam pơm kơ kon bơngai pơjăm, Păng tơmam pơm ăn kơ kon pơlei hiĕk ăr.

Je 50:34

Mă-lei Tơ'ngla mă dŏng pơklaih lu sư pran kơtang tơpă; anăn sư Kră Yang Tih Hloh, Sư gô dŏng lu sư tơpă, Ăn jơ̆p kơ teh đak sư hiôk-hian, Mă-lei kon pơlei Babilôn đei chhŭr nuih.”

Horiso 19:14

Ăn kơ nơ̆r pơma đơ̆ng 'bơ̆r inh, Ơ Kră Yang Ih jơ̆ thoi tơmo pĕng inh, Păng jơ̆ Kră Yang dŏng pơklaih inh, Hăm tơdrong tơchĕng đơ̆ng lăm jơhngơ̆m inh jing 'lơ̆ng pơm kơ Ih lăp đon!

Jop 25:6

Pơma kiơ kơ kon bơngai nhen thoi kơnu hơdrông, Păng kon sâu kon bơngai jơ̆ kơnu hơdrông.

Jop 19:25

Mă-lei inh băt sĭt Tơ'ngla Dŏng Pơklaih inh oei arih, Sư gô iung dơ̆ng lăm năr tôch kơnh wă pơma dŏng inh kơpal teh.

Tit 2:14

Kră Yang Yêsu Krist ăn akâu Sư kơdih chu lôch tang kon bơngai bơ̆n. Sư huai iŏk bơ̆n wă kơ bơ̆n huay pă pơm yoch dơ̆ng. Sư ăn kơ bơ̆n jing kon 'lơ̆ng Sư păng Sư ăn kơ jơhngơ̆m bơ̆n wă pơm 'lơ̆ng hăm đe ling-lang.

Êsai 49:26

Inh gô pơm kơ lu bơngai pơjuă pơđep iĕm lu sư gô pơlôch dih băl, lu sư jing suai yua kơ đơ̆ng hil blĕk, thoi lĕ suai sik; Đĭ-đăng kon bơngai gô băt kơ Inh, Kră Yang Tơ'ngla dŏng pơklaih iĕm, Tơ'ngla huai iŏk iĕm păng Tơ'ngla mơsêh adrĕch Jakôp.”

Êsai 48:17

Kră Yang Tơ'ngla dŏng pơklaih iĕm Tơ'ngla 'Lơ̆ng Rơgoh Isơrael khan: “Inh bơih Kră Yang, 'Bok Kei-Dei iĕm, Tơ'ngla bơtho iĕm mă đei tơdrong 'lơ̆ng kơ iĕm păng dui ba iĕm lăm trong iĕm gô năm.

Êsai 47:4

Tơ'ngla dŏng pơklaih lu bơ̆n, anăn Sư Kră Yang Tih Hloh, Tơ'ngla 'Lơ̆ng Rơgoh Isơrael.

Êsai 44:24

Kră Yang, đei khan thoi âu: “Inh huai iŏk lu iĕm Inh pơjing lu iĕm đơ̆ng lăm klak. Inh bơih Kră Yang, Inh bơih Tơ'ngla pơm pơjing tôm tơmam. Minh 'nu Inh đĕch bơlang lu plĕnh, lơ̆k teh âu, ưh kơ đei bu 'nguaih kơ Inh.

Êsai 44:6

Kră Yang pơgơ̆r plĕnh teh, Pơtao păng 'Bok huai iŏk Isơrael, Kră Yang Tih Hloh khan thoi âu: “Inh blŭng-a păng tuch-luch, 'nguaih kơ Inh ưh kơ đei Yang nai dơ̆ng ôh.

Tơdrông Tơ'bôh 5:9

Na lu đe ei hơri minh tơdrong 'nao thoi âu: “Pôm Ih đĕch trŏ kơ hek lăng hla bơar đe pơklep noh yua kơ Ih lôch tang kon bơngai, păng pham Ih lĕch sĕch Ih huŏng huai iŏk kon bơngai brŏk tơ 'Bok Kei-Dei đơ̆ng rim dêh char, rim adrĕch adrung, rim khŭl bơngai, rim kơ nơ̆r pơma.

Galati 3:13

Bơ̆n ưh kơ kĕ ôh kiơ̆ tôm tơdrong juăt 'Bok Kei-Dei, na trŏ yơh kơ 'Bok Kei-Dei wă phak bơ̆n, mă-lei Yêsu Krist dŏng pơklaih bơ̆n wă huai iŏk bơ̆n đơ̆ng tơdrong yoch wă kơ 'Bok Kei-Dei huay kơ phak bơ̆n. Sơ̆p hla bơar 'Bok Kei-Dei khan boih thoi âu: “Kon bơngai bu pơm yoch na tơduă kon bơngai phak pơlôch bơngai mă pơm yoch noh atol sư tơ kơpal 'long, 'Bok Kei-Dei kư̆m wă kơ phak bơngai mă pơm yoch noh tơpă mơ̆n.” Na Yêsu lôch tơ 'long pơglang kư̆m trŏ kơ phak thoi noh yua kơ tơdrong yoch bơ̆n.

Luka 12:32

“Ơ lu 'nhŏng oh, iĕm bơngai kơtuei ră, mă-lei iĕm 'nĕ kơ hli, yua kơ 'Bă bơ̆n 'Bok Kei-Dei wă ăn kơ iĕm gơh pơgơ̆r đe ning-mônh.

Mathiơ 7:14

Trong 'măng mơ̆t tơ anih arih ling-lang iĕ păng anat kơ yak tơpă, na hui bơngai 'bôh 'măng iĕ noh.

Êsai 63:16

Mă-lei Ih bơih 'Bă lu nhôn mă khan Abraham ưh kơ băt kơ lu nhôn Isơrael kư̆m ưh kơ jô̆ lu nhôn; Ơ Kră Yang Ih jơ̆ 'Bă lu nhôn. Anăn Ih jơ̆ Tơ'ngla dŏng pơklaih lu nhôn ling-lang đơ̆ng sơ̆.

Êsai 60:16

Ih gô mŏm đak toh lu dêh char păng lu pơtao thoi mĕ gô tơmŏm 'me rong Ih. Ih gô băt kơ Inh bơih Kră Yang Tơ'ngla dŏng pơklaih ih Tơ'ngla huai iŏk ih păng Tơ'ngla mơsêh pran kơtang adrĕch Jakôp.

Êsai 59:20

“Tơ'ngla dŏng pơklaih gô truh tơ Siôn; năm tơ lu bơngai lăm adrĕch adrung Jakôp, mă achăng hŭt tơdrong yoch.” Kră Yang pơma thoi noh.

Êsai 54:8

Lăm jơhngơ̆m Inh oei hil mĭl dêh. Inh ôn muh măt Inh ưh kơ đei lăng iĕm minh rơwưh minh bruh minh 'biơ̆. Mă-lei yua kơ jơhngơ̆m đon 'mêm mơnat tih ling-lang. Inh gô mơnat kơ iĕm.” Kră Yang, Tơ'ngla dŏng pơklaih iĕm khan thoi noh.

Êsai 49:7

Kră Yang, Tơ'ngla dŏng pơklaih, Kră Yang 'Lơ̆ng Rơgoh Isơrael khan kơ bơngai mă kon bơngai pơjăm mă teh đak areh, hăm bơngai pơm đĭch kơ lu bơngai yŏng pơgơ̆r thoi âu: Lu pơtao gô 'bôh ih na iung; lu kon pơtao gô hơtơ̆p kŭl-tăng kơkuh. Yua kơ Kră Yang jơ̆ Tơ'ngla tơpăt, Tơ'ngla Rơgoh 'Lơ̆ng Isơrael, jơ̆ Tơ'ngla rơih iŏk ih.

Rom 9:27

Gah tơdrong lu bơngai Isơrael, Êsai sư khan thoi âu: “Mă lu bơngai Isơrael lơlap lơlang dang pơlao chuơh dơsĭ, hui bơngai klaih đơ̆ng tơdrong yoch,

Both 7:7

Kră Yang 'mêm kơeng păng rơih iŏk lu iĕm ưh kơ sĭ yua kơ lu iĕm bơngai lơ hloh kơ adrĕch lu đe nai ôh. Tơpă lu iĕm tŏ sĕt hloh kơ lu adrĕch lu đe nai.

Horiso 46:5

Kră Yang 'Bok Kei-Dei oei lăm pơlei noh, pơlei ei ưh kơ đei pơpơ̆. Lăp 'brưch pơgê hrôih Kră Yang 'Bok Kei-Dei tơgŭm sư boih.

Horiso 78:35

Lu sư 'blŏk kơ Kră Yang 'Bok Kei-Dei jơ̆ tơmo tih lu sư. Kră Yang 'Bok Kei-Dei Tih Hloh jơ̆ Kră Yang dŏng pơklaih lu sư.

Êsai 35:10

Lu bơngai mă Kră Yang huai iŏk bơih gô brŏk. Năm mơ̆t tơ pơlei Siôn hăm tơdrong hơri chơt hiôk. Tơdrong hơri chơt hiôk ling-lang gô oei lăm kơ̆l lu sư. Lu sư gô đei tơdrong chơt hiôk, 'nă hal, na tơdrong ơh sơ'ngon chhŭr nuih gô hiong đĭ.

Êsai 41:10

'Nĕ hli yua kơ Inh oei hơdai iĕm, 'nĕ tơrơ dêh, yua kơ Inh bơih Kră Yang 'Bok Kei-Dei iĕm! Inh gô ăn kơ iĕm pran; tơpă inh tơgŭm iĕm, Inh gô wei-lăng iĕm hăm ti gah 'ma 'Lơ̆ng Tơpăt Inh.

Êsai 44:22

Inh sŭt lê̆ bơih tơdrong lu iĕm pơm yoch nhen thoi sŭt lê̆ hơmơ̆l, tơdrong yoch lu iĕm nhen thoi tŭk. Wơ̆t brŏk bĕ tơ Inh, yua kơ Inh huai iŏk lu iĕm bơih.”

Je 46:27

“Ơ Jakôp đĭch đam Inh, 'nĕ kơ hli! Ơ Isơrael 'nĕ tơrơ tăr wăr! Inh gô pơklaih ih đơ̆ng anih ataih hơtŏ, dŏng pơklaih adrĕch adrung ih đơ̆ng dêh char mă oei pơm đĭch. Jakôp gô wih brŏk arih jang sa hiôk-hian, ưh pă đei hli kơ bu dơ̆ng.”

Nhom 3:57

Năr inh krao Ih, Ih năm jê̆ inh boih, đei khan boih kơ inh: 'Nĕ kơ hli kơ kiơ!

Da 10:12

Đơ̆ng noh bơngai ei khan thoi âu; ơ Đaniel 'nĕ kơ hli; yua kơ đơ̆ng nơ̆r blŭng-a mă ih đei đon hlôh drap kơkuh 'bơ̆t anăp Kră Yang 'Bok Kei-Dei ih păng lu nơ̆r ih pơma kơ Kră Yang 'Bok Kei-Dei kơtơ̆ng boih, yua kơ lu nơ̆r ih noh na inh truh tơ âu.

Hôsia 11:9

Inh pơgơ̆t jơhngơ̆m tơtŏ Inh, păng Inh ưh kơ wă pơlôch pơrăm boih Êphraim, Yua kơ Inh jơ̆ Kră Yang 'Bok Kei-Dei, ưh kơ trŏ kon bơngai ôh. Inh Tơ'ngla rơgoh 'lơ̆ng 'bơ̆t anăp lu iĕm, ưh kơ wă hil pơrăm lu iĕm ôh.

Jôsuê 17:18

mă-lei char gah kông noh jing teh lu iĕm mă khan bri kơdrơ̆ng, lu iĕm chong muih jang truh tơ jơ̆p-jang mă să ataih, yua kơ lu iĕm gơh puh tơweh lu kon pơlei Kanaan, mă khan lu sư đei gre aseh mam pran kơtang ră.

Êsai 37:4

Rŏ lăng Kră Yang 'Bok Kei-Dei ih gô kơtơ̆ng dôm nơ̆r Rapsaka pơma, bơngai đơ̆ng pơtao Asiri wơh sư năm tơ âu wă pơma pơjăm Kră Yang 'Bok Kei-Dei arih ling-lang păng Kră Yang gô phak sư kiơ̆ thoi dôm nơ̆r mă Kră Yang 'Bok Kei-Dei kơtơ̆ng bơih, noh bơih ih krao khan bĕ kơ lu bơngai mă oei oei tơ âu!”

Êsai 43:3

Yua kơ Inh Kră Yang 'Bok Kei-Dei iĕm, Tơ'ngla 'lơ̆ng rơgoh Isơrael, Tơ'ngla dŏng pơklaih iĕm. Inh ăn bơih dêh char Êyiptơ jing tơmam huai iŏk iĕm. Char Kus păng Sêba pơm tơmam huai tơplih kơ iĕm.