Êsai 30:8 - Sơ̆p Hlabơar Nơ̆r 'Bok Kei-Dei

⁸ Năm bĕ dang ei chih ăn kơ lu sư nơ̆r âu tơ gơ'bang, chih tơmơ̆t nơ̆r noh tơ lăm sơnôm hla bơar, wă roi tơbăt kơ chăl đơ̆ng rŏng ling-lang hlŏng hloi.

Êsai 30:8 Referans Kwoze

Habakuk 2:2

Kră Yang tơl păng khan kơ inh thoi âu: “Ih athei chih dôm tơdrong ih đei 'bôh păng chih mă nhen rơđah tơ gơ'bang, wă kơ lu bơngai oei kơdâu gơh đŏk.

Êsai 8:1

Kră Yang khan kơ inh: “Iŏk bĕ minh hlak gơ'bang să păng chih tơ noh hăm chư hmă kon bơngai gơh băt: Maher-Salal-Hasbas.

Both 31:22

Lăm năr noh, Môis chih nơ̆r hơri 'nâu păng bơtho pơhrăm ăn kơ lu kon pơlei bơngai Isơrael;

Je 51:60

Jêrêmi chih lăm minh sơnôm hla bơar dôm tơdrong răm wă truh kơ dêh char Babilôn, chih dôm nơ̆r roi gah dêh char Babilôn.

Je 36:2

“Iŏk bĕ minh sơnôm hla bơar chih bĕ lăm noh dôm tơdrong Inh đei bơtho khan kơ ih gah bơngai Juđa, Isơrael păng đĭ-đăng adrĕch adrung nai, iŏk đơ̆ng chăl Jôsia, dĭng truh kơ năr 'nâu.

Both 31:19

Thoi noh dang ei, chih bĕ nơ̆r hơri 'nâu păng bơtho ăn kơ kon pơlei bơngai Isơrael hơri, lu sư athei thuơk lăm đon kơ nơ̆r hơri 'nâu wă roi tơbăt ăn Inh kơ nơ̆r Inh chrih ayăt hăm lu sư.

Jo 24:14

'Nâu, dang ei adrol kơ inh wih brŏk tơ kon pơlei inh kơdih. Năm tơ âu bĕ, inh gô roi ăn kơ ih băt lu kon pơlei âu gô pơm kiơ kơ lu kon pơlei ih ning-mônh.

Both 4:30

Kơplah lu iĕm đei tơdrong pơmat-tat păng đei dôm tơdrong truh kơ iĕm, lăm năr mă tuch-luch, lu iĕm gô wih brŏk tơ Kră Yang 'Bok Kei-Dei iĕm păng chu kiơ̆ nơ̆r Sư.

Ju 1:18

Lu sư khan: “Khei 'năr wă tôch ning-mônh, đei lơ bơngai che bơle kơ tơdrong lui bơ̆n; lu sư kiơ̆ kơ jơhngơ̆m lu sư kơdih 'maih pơm tơdrong kư̆ kă na lu sư che bơle.”

II Pet 3:3

Mă loi inh wă tơbăt kơ iĕm gah tơdrong âu: Năr wă jê̆ tôch kơnh đei lơ bơngai 'maih kiơ̆ tơdrong jơhngơ̆m wă kơdih, 'maih pơm lơ tơdrong kiơ̆ mă ưh kơ 'lơ̆ng. Lu sư pơma pơjăm pơma che bơle lu bơngai lui khan:

I Tim 4:1

Yang Bơhngol 'Lơ̆ng khan tơpăt wă kơ bơ̆n băt nhên: Ning-mônh gô đei lu bơngai achăng lê̆ tơdrong lui sư, lu sư wă lui yom kơ lu yang mă pơma hơlĕnh kơ kon bơngai, lu sư gô lui kơ yang kơnê̆ bơtho.

Hôsia 3:5

Đơ̆ng rŏng kơ noh lu bơngai Isơrael gô wih chơchă Kră Yang 'Bok Kei-Dei lu sư păng Đawit pơm pơtao lu sư. Lu sư gô wih brŏk păng hli tơrơ yom kơ Kră Yang păng tơdrong 'lơ̆ng hiôk-hian lăm năr hơtuch kơnh.

Êsêkiên 38:16

Ơ Gôk Ih gô blah kon pơlei Isơrael Inh thoi hơmơ̆l gom teh. Lăm năr hơtuch noh Inh gô ăn kơ ih blah char Inh, wă kơ adrĕch kon bơngai băt kơ Inh, kơplah Inh pơdah tơdrong 'lơ̆ng rơgoh Inh đơ̆ng tơdrong truh tơ ih 'bơ̆t anăp lu sư.

Je 48:47

Mă-lei truh năr hơtuch kơnh Inh gô pơdrâu iŏk lu bơngai bơnă char Môap brŏk,” Kră Yang khan thoi noh. Nơ̆r khan lê̆ adrol kơ bơngai Môap tôch đĭ 'bơ̆t dâu.

Je 23:20

Tơdrong Kră Yang hil ưh kơ ngach ôh, dĭng mă Sư pơm pơkeh thoi Sư tơchĕng wă. Lăm năr ei kơnh lu iĕm gô băt hơdah tơdrong noh.

Êsai 2:2

Gô đei tơdrong truh lăm lu năr hơtuch kơnh: Kông hnam Kră Yang gô oei kơjăp tơ kơpal lu kơ̆l kông, kơjung hloh kơ đĭ-đăng lu groi. Păng rim kơ teh đak gô luh leng năm tơ noh.

Both 31:29

Inh băt gô răm-'băm tơpă, achăng lê̆ trong mă đơ̆ng inh bơtho khan, ning-mônh lu iĕm gô tơblĕk Kră Yang pơm tơdrong kơnê̆ 'mê̆, mă Kră Yang, ưh kơ lăp đon păng tơdrong răm pơmat-tat gô truh kơ lu iĕm.

Êsai 34:16

Chă lăng bĕ lăm sơ̆p hla bơar Kră Yang păng đŏk: Lăm lu kon sem 'nâu ưh kơ đei minh pôm sem ayơ mă ưh kơ đei, kư̆m ưh kơ đei minh pôm sem ayơ mă ưh kơ tôm hơgrop, yua kơ đơ̆ng 'bơ̆r Kră Yang pơkă bơih păng Yang Bơhngol Sư đei akŭm bơih lu sư.

Je 30:2

'Nâu Kră Yang, 'Bok Kei-Dei bơngai Isơrael khan: “Chih răk bĕ lăm sơnôm hla bơar nơ̆r Inh đei bơtho khan kơ ih boih.”

Je 36:4

Jêrêmi krao Baruk kon drŏ-nglo Nêria, Baruk chih tơ lăm sơnôm hla bơar kiơ̆ thoi Jêrêmi roi ăn kơ sư đĭ-đăng dôm nơ̆r Kră Yang khan.