Êsai 29:11 - Sơ̆p Hlabơar Nơ̆r 'Bok Kei-Dei

¹¹ Noh jing tôm tơdrong tơ'bôh kơ iĕm 'nâu, nhen thoi nơ̆r pơma lăm sơ̆p hla bơar mă đe chĭt đơ̆p lê̆ bơih. Tơdah ăn kơ bơngai gơh đŏk na khan: “Apinh ih đŏk lăng hla bơar âu!” Na sư gô tơl tơwih: “Inh ưh kơ gơh kơ đŏk yua kơ sơ̆p hla bơar âu đe chĭt đơ̆p lê̆ bơih.”

Êsai 29:11 Referans Kwoze

Mathiơ 13:11

Yêsu khan: “'Bok Kei-Dei ăn kơ iĕm băt gah tơdrong Sư wă pơgơ̆r kon bơngai thoi yơ, mă-lei Sư ưh kơ ăn kơ lu bơngai tơpôl noh băt ôh.

Da 12:4

Bê̆ gah ih, ơ Đaniel ih athei chih răk lê̆ nơ̆r âu păng athei pơ̆ng pơklep lê̆ sơ̆p hla bơar âu dĭng truh tơ năr tôch. Đei lơ bơngai yak nơnăm to âu păng tơdrong hŏk hơgei gô rai tŏk rai lơ.

Êsai 8:16

Chô̆ kơjăp bĕ nơ̆r tơbăt âu păng pơklep mă kơjăp tơdrong juăt lăm lu đĭch đam Inh.

Da 12:9

Sư tơl thoi âu: Ơ Đaniel, năm bĕ; yua kơ dôm lu nơ̆r âu đei chih lê̆ boih păng đei chơ̆m pơsĭt kơ chăl tuch-luch ei.

Mathiơ 11:25

Kơplah noh Yêsu krao khan kơ 'Bă Sư khan: “Ơ 'Bă, Ih boih Kră Yang plĕnh teh. Inh bơnê kơ Ih, yua kơ dôm tơdrong Inh bơtho, Ih tơbăt kơ lu bơngai mă băt gơnang kơ Ih thoi lu hơ'lơ̆p băt gơnang kơ mĕ 'bă; păng Ih ưh kơ wă tơhlôh kơ lu bơngai mă gơnang kơ akâu sư kơdih hŏk hơgei.

Tơdrông Tơ'bôh 6:1

Đơ̆ng noh na inh 'bôh Kon Triu hek hla bơar đêl đe pơklep tơdra noh. Sư hek tơdra mă mônh lăm tơpơh tŏ tơdra noh, inh kơtơ̆ng minh pôm lăm puăn anăn sem noh, sư krao minh 'nu bơngai hao aseh kok, sư pơma 'bơ̆r re dang grơ̆m glaih tơdrăng, sư khan thoi âu: “Tơ âu bĕ.”

Mathiơ 16:17

Yêsu khan: “Ơ Simôn, kon Yôhan, ih hiôk tơpă. Kon bơngai ưh kơ đei tơbăt kơ ih tơdrong noh ôh. 'Bă Inh mă oei tơ plĕnh ti đĕch tơbăt kơ ih tơdrong noh.

Êsai 28:7

Mă-lei lu đe noh kư̆m wing măt yua kơ sik hơmu pơm. Nơnăm 'ma 'ngiĕo yua kơ suai kơ tơdrô 'lơ̆ng! 'Bok soi păng 'bok khan lê̆ adrol wing măt yua kơ suai kơ tơdrô 'lơ̆ng, tơdrô pơrăm đĭ đon tơchĕng lu sư, tơdrô pơm kơ lu sư yak năm we-wo 'ma 'ngiĕo oei mơngưt mơngat kơplah lu sư đei tơdrong tơ'bôh. Lu sư glăi lăm tơdrong sek tơlang.

Êsai 29:12

Dah mă ih ăn kơ bơngai ưh kơ gơh đŏk na khan: “Apinh ih đŏk sơ̆p hla bơar âu,” Na sư tơl khan: “Inh ưh kơ băt kơ đŏk.”

Êsai 29:18

Lăm năr noh lu bơngai klĭk gô kơtơ̆ng dôm nơ̆r đơ̆ng lăm sơ̆p hla bơar; măt lu bơngai tol đơ̆ng lăm măng mu gô lăng 'bôh.