Êsai 26:7 - Sơ̆p Hlabơar Nơ̆r 'Bok Kei-Dei

⁷ Trong lu bơngai 'lơ̆ng tơpăt jơ̆ tơpăt, ơ Kră Yang 'Lơ̆ng tơpăt, Ih pơm ăn trong kơ lu bơngai 'lơ̆ng tơpăt dơhnă hiôk.

Êsai 26:7 Referans Kwoze

Êphêsô 2:10

Tơdrong 'Bok Kei-Dei ăn kơ bơ̆n jing bơngai 'nao, yua kơ bơ̆n pôm đon hăm Yêsu Krist. Tơdrong bơ̆n jing bơngai 'nao noh Sư wă kơ bơ̆n pơm tôm tơdrong 'lơ̆ng tơpăt ngăl, na blŭng-a sơ̆ 'Bok Kei-Dei wă kơ bơ̆n pơm 'lơ̆ng ling-lang thoi noh.

I Yo 3:7

Ơ lu kon hơ'lơ̆p, 'nĕ lui kơ đe hơlĕnh kơ iĕm khan bơngai lui bơ̆n ưh kơ kăl pơm 'lơ̆ng tơpăt. Inh khan kơ iĕm thoi âu: Bơngai bu pơm 'lơ̆ng tơpăt, bơngai 'noh đei đon 'lơ̆ng tơpăt kư̆m thoi Yêsu bơngai 'lơ̆ng tơpăt mơ̆n.

II Kor 1:12

Tơdrong nhôn hiôk, nhôn hiôk yua kơ tơdrong âu: Jơhngơ̆m đon nhôn mơn kơdih nhôn pơm 'lơ̆ng kơ đĭ-đăng bơngai; mă loi pơm 'lơ̆ng pơm tơpăt hăm iĕm. Mă-lei nhôn ưh kơ bơnê kơ akâu nhôn kơdih hơgei ôh, nhôn bơnê kơ 'Bok Kei-Dei tơgŭm nhôn pơm 'lơ̆ng thoi noh.

Êsai 42:16

Inh gô chông lu bơngai măt tol rok trong lu sư ưh kơ biơh năm, dui lu sư rok trong iĕ mă lu sư ưh tam juăt; inh gô tơplih măng mu jing hơdah 'bơ̆t anăp lu sư, Inh gô pơm kơ teh jrŭ đơng jing dơnă. Tơpă inh gô pơm lu tơdrong noh păng ưh kơ achăng tŭk lu sư ôh.

I Yo 3:10

Bơ̆n gơh kơnăl tơduă bơngai bơ̆n, bơngai bu kon 'Bok Kei-Dei, bơngai bu kon yang Satan sư phara thoi âu: Bơngai bu ưh kơ pơm 'lơ̆ng tơpăt păng ưh kơ 'mêm kơ 'nhŏng oh sư, bơngai 'noh ưh kơ sĭ kon 'Bok Kei-Dei ôh.

Tơdrông Pơđơk 20:7

Bơngai tơpăt băt oei arih sa 'lơ̆ng tơpăt, Pŭn hiôk dêh kơ lu kon sâu sư!

Horiso 11:7

Yua kơ Kră Yang 'Lơ̆ng tơpăt; Sư 'mêm kơ tơdrong tơpăt: Lu bơngai mă tơpăt gô lăng 'bôh muh măt Sư.

I Kor 4:5

Thoi noh mă bu bu bơngai thoi yơ bơ̆n 'nĕ chă sek pơma tơdrong sư, gô mơ̆ng kơ Kră Yang jur đĕch, Sư gô tơbăt hơdah ăn tôm tơdrong kon bơngai mă oei ôn pơhrĕp păng tôm tơdrong kon bơngai tơchĕng wă. Hơtai ei kơnh đĭ-đăng rim 'nu kơ bơ̆n mă pơm kiơ̆ kơ Sư wă gô đei nơ̆r Kră Yang bơnê.

Êsai 35:8

Tơ noh gô đei minh pôm trong glung tih. Minh pôm trong đe krao trong 'Lơ̆ng Rơgoh. Bơngai 'mê̆-'mach ưh kơ gơh năm trong noh. Mă-lei 'măn lu bơngai kiơ̆ Kră Yang năm trong noh. Mă khan đơ̆ng kơ hlôh kơwao kư̆m huay kơ jrok.

Horiso 1:6

Yua kơ Kră Yang băt trong lu bơngai tơpăt, Mă-lei trong lu bơngai kơnê̆ gô hiong răm.

Jop 31:6

Apinh Kră Yang 'Bok Kei-Dei dan inh tơ kơpal 'long kŏng mă trŏ, Na Sư gô băt kơ inh 'lơ̆ng tơpăt.

I Ho 29:17

Ơ Kră Yang 'Bok Kei-Dei inh, inh băt kơ Ih 'bôh nhen lăm jơhngơ̆m klơm klak kon bơngai păng Ih hiôk gah tơdrong 'lơ̆ng tơpăt. Gah inh kư̆m kiơ̆ tơdrong 'lơ̆ng tơpăt lăm jơhngơ̆m hiôk pơyơ̆r ăn kơ ih lu tơmam 'nâu. Dang ei inh hiôk dêh inh 'bôh kon pơlei Ih oei tơ âu kư̆m đei pơyơ̆r ăn kơ Ih hăm jơhngơ̆m hiôk.

Jêphania 3:5

Kră Yang oei tŏk-bŏk sư jơ̆ tơdrong tơpăt, ưh kơ đei pơm kơnê̆, rim pơgê sư pơdah tơdrong tơpăt Sư, tơ hơdah ưh kơ đei layơ ưh. Mă-lei lu bơngai kơnê̆ ưh kơ băt mơlâu.

Horiso 11:4

Kră Yang oei tơ Anih 'lơ̆ng rơgoh Sư; Tang-dŏ Pơtao Sư tơ plĕnh ti; Măt Sư nger lăng, Gơnur măt Sư tưk lăng kơchăm tơ kon bơngai,

Horiso 25:4

Ơ Kră Yang, apinh Ih Tơ'bôh kơ inh trong Ih, Păng bơtho inh băt dôm trong gơlong Ih.

Horiso 25:5

Apinh chông ba inh lăm trong tơpăt Ih păng bơtho tơ'bôh kơ inh, Yua kơ Ih boih Kră Yang 'Bok Kei-Dei dŏng pơklaih inh. Rim năr inh chang gô Ih.

Horiso 27:11

Ơ Kră Yang, bơtho tơ'bôh kơ inh trong Ih, Yua kơ đei lu bơngai pơm kơnê̆ kơ inh, Apinh Ih dui ba inh lăm trong tơhnă.

Tơdrông Pơđơk 4:18

Mă-lei trong lu bơngai tơpăt thoi hơdah pơchrang, Pơchrang hơdah truh tơ 'năr dơ̆ng.

Êsai 52:12

Lu iĕm weh lĕch ưh kơ mah hăt hot, kư̆m ưh kơ mah kơdâu klĕnh; Kră Yang gô năm adrol kơ lu iĕm păng Kră Yang 'Bok Kei-Dei Isơrael năm đơ̆ng rŏng wei-lăng iĕm.

Êsai 57:2

Sư mơ̆t lăm tơdrong hiôk-hian. Lu bơngai arih 'lơ̆ng tơpăt, gô lôch pơdơh tơ anih sư kơdih.

Je 10:23

Ơ Kră Yang! Inh băt kon bơngai ưh kơ gơh pơm yŏng kơ sư kơdih, Kŭm ưh kơ gơh bơwei kơnao yak lu sư kơdih mơ̆n.

Hôsia 14:9

Bu jing bơngai hơgei, sư athei băt hlôh dôm tơdrong âu? Bu mă băt lăng hơlen, sư athei lăng bĕ lu tơdrong noh. Trong Kră Yang 'lơ̆ng tơpăt, lu bơngai tơpăt gô yak trong noh; mă-lei lu bơngai pơm yoch glăi gô yak kơtơih pơ̆k tơ noh.

Horiso 5:9

Yua kơ lăm 'bơ̆r lu sư ưh kơ đei tơdrong tơpă; Jơhngơ̆m lu sư tă kơnê̆ ngăl. Hơlŏng lu sư thoi bơsat tơpơih Hơpiĕt lu sư 'bĕnh hăm tơdrong pơdăr.

Tơdrông Pơđơk 3:6

'Blŏk băt bĕ kơ Kră Yang lăm rim trong ih pơm, Na sư gô pơm kơ trong ih tơpăt.

Tơdrông Pơđơk 11:5

Lu bơngai tơpăt 'lơ̆ng gô dơ̆ng tơpăt lăm trong lu sư, Mă-lei lu bơngai kơnê̆ gô pơ̆k huŏng lăm tơdrong kơnê̆ lu sư.

Tơdrông Pơđơk 21:8

Trong lu bơngai pơm kơnê̆ đŏng đĕo; Mă-lei tơdrong jang bơngai 'lơ̆ng rơgoh noh oei tơpăt ling-lang.

Êsai 30:18

Mă tơpă, Kră Yang oei gô wă pơm 'lơ̆ng kơ lu iĕm, Tơpă Sư gô 'mêm mơnat kơ lu iĕm. Kră Yang jơ̆ Kră Yang 'Bok Kei-Dei 'lơ̆ng tơpăt. Pŭn hiôk dêh kơ bơngai bu oei chang gô Sư!