Êsai 22:13 - Sơ̆p Hlabơar Nơ̆r 'Bok Kei-Dei

¹³ Mă-lei lăng to lăm lu iĕm đei tơdrong chơt hiôk kư̆ kă 'bet sa rơmo, 'buh sa triu, sa 'nhĕm, et tơdrô: “Et sa bĕ yua kơ dơning bơ̆n gô lôch!”

Êsai 22:13 Referans Kwoze

Êsai 56:12

Lu sư khan: “Năm bĕ, inh gô iŏk tơdrô, bĕ bơ̆n et tơdrô kơtang mơ̆ng kơ wă; Năr dơning kư̆m gô lei-lăi thoi năr 'nâu, et sa rai tih hloh dơ̆ng.

I Kor 15:32

Inh đei tơdrong gleh truh kơ inh tơ Pơlei Êphêsô dang lĕ inh tơblah păng sem bri. Dah inh adrin tơblah păng sư, mă-lei inh ưh kơ tơchĕng tơdrong inh gô iung arih ning-mônh, lei tơdrong inh adrin 'noh ưh kơ đei yua kiơ kơ inh ôh. Dah 'Bok Kei-Dei ưh kơ tơiung arih lu bơngai bơ̆n đơ̆ng lôch, lei bơ̆n kuă kơ kiơ kơ sa et phĭ mah rơkah rơkai chă tơdrong hiôk ling-lang, yua kơ bơ̆n wă lôch hiong hiơt thoi ei?

Ya 5:5

Iĕm oei tơ ala teh âu hiôk jơnap tơpă. Sŏng sa phĭ mah rơkah rơkai bek lơluĭnh thoi rơmo, na đe wă rơih rơmo bek noh boih 'buh sa.

Êsai 5:22

Răm-'băm dêh kơ bơngai bu khan nuih mưh et tơdrô, đei jơhngơ̆m pran hrâu đơ̆ng tơdrô.

Êsai 5:12

Lăm năr et sa lu sư reh brŏ, hlôm lillul teh hơgơ̆r hăm et tơdrô, mă-lei lu sư ưh kơ tơchĕng tơdrong Kră Yang pơm; lu sư kư̆m ưh kơ 'bôh đêl dôm tơdrong đơ̆ng ti Kră Yang pơjing.

Êsai 5:11

Răm-'băm dêh kơ bơngai bu mă đơ̆ng hrôih, drôih chơchă tơdrô, pơgŏk kơ tơdrô dĭng măng, dĭng tơdrô soh chhông lu sư!

Êsai 26:10

Lu bơngai kơnê̆ pơm mă đơ̆ng Kră Yang mơnat ăn ră, kư̆m ưh kơ wă hŏk iŏk tơdrong 'lơ̆ng tơpăt, lu sư oei pơm tơdrong kơnê̆ lăm teh đak 'lơ̆ng tơpăt, păng ưh kơ 'bôh ôh tơdrong 'lơ̆ng rŏ tih-tin Kră Yang.

Êsai 29:1

Răm-'băm dêh kơ pơlei Ariêl, pơlei Ariêl jơ̆ pơlei Đawit pơm anih sư oei, sơnăm âu truh kơ sơnăm nai thim dơ̆ng. Ăn kơ tơdrong iĕm akŭm tih đei dăr wơwĭr hơnơ̆ng.

Êsai 47:8

“Thoi noh, ơ lu bơngai 'maih hiôk đĕch. Tơchĕng khan ưh pă đei tơdrong anat kiơ đơ̆ng âu tơ anăp, mơ̆ng bĕ âu: Ih khan lăm jơhngơ̆m. ‘Inh âu, adrĕch yŏng mơng ưh pă đei bơngai bu dang inh, inh gô ưh kơ đei layơ sơ'ngon thoi yă adro kư̆m ưh kơ đei nhơ̆m hmoi thoi bơngai hiong kon hơ'lơ̆p.’

Êsai 58:3

Lu sư Jet: “Yua kơ kiơ lu nhôn ơ̆t kơ sŏng sa mă-lei Ih ưh kơ 'bôh? Lu nhôn tơjur akâu mă-lei Ih ưh kơ băt?” 'Nâu, lăm năr lu iĕm ơ̆t kơ sŏng sa, lu iĕm ling-lang chă tơdrong lu iĕm wă kơdih. Sa pơgâm lu bơngai jang kơ iĕm.

Êsêkiên 16:49

'Nâu tơdrong yoch oh drŏ-kăn ih Sôđôm: Sư păng lu kon drŏ-kăn sư pơang, sŏng sa phĭ jơnap, tơmam sa rơkah rơkai, mă-lei ưh kơ tơgŭm lu bơngai dơnuh hin pơmat-tat.

Hôsia 9:1

'Nĕ kơ chhôk hal. Ơ bơngai Isơrael! 'Nĕ kơ chơt hiôk dêh thoi adrĕch adrung nai! Ih achăng lê̆ boih Kră Yang 'Bok Kei-Dei lu iĕm. Păng pơm kơnê̆, pơm pơyô kư̆ kă boih, Lăp đon boih iŏk drŏ-kăn đi tơ jơ̆p-jang anih preh 'ba.