Êsai 1:17 - Sơ̆p Hlabơar Nơ̆r 'Bok Kei-Dei

¹⁷ Pơhrăm iŏk bĕ tơdrong 'lơ̆ng, chă lu tơdrong tơpăt, tơiung lu bơngai đe pơjuă, dŏng tơgŭm lu bơngai mơti, pơma dŏng lu bơngai adro.

Êsai 1:17 Referans Kwoze

Mi 6:8

Ơ kon bơngai: Tơdrong mă Kră Yang wă kơ ih pơm 'lơ̆ng tơpăt, wă kơ đei tơdrong 'mêm mơnat păng yak năm hăm jơhngơ̆m iơ̆m dim, pơyom kơ 'Bok Kei-Dei ưh?

Je 22:3

'Nâu nơ̆r Kră Yang khan: Pơm bĕ dôm tơdrong tơpăt hơnơ̆ng tơdrong trŏ; pơklaih bĕ lu bơngai mă đe rôp đơ̆ng ti lu bơngai pơjuă pơđep. Lê̆ kơ rôp pơgŏ păng kư̆m 'nĕ pơm kơnê̆ kơ lu bơngai tơmoi, lu kon mơti 'bă păng lu yă adro 'Nĕ kơ pơlôch tuh pham kơ lu bơngai ưh kơ yoch tơ anih âu.

Êsai 1:23

Lu yŏng pơgơ̆r iĕm tă kơ blơ̆ blĕch ngăl, pơm buăl hăm lu bơngai tơtông, rim 'nu lu sư tă kơ 'maih chă pơgâm sa tơmam, 'maih druh kiơ̆ mŭk tơmam đe ăn, ưh kơ dŏng tơgŭm lu bơngai mơti, pă 'maih lăng dŏng tơgŭm lu drŏ-kăn adro.

Tơdrông Pơđơk 31:9

Pơih 'bơ̆r ih ha pơma sek mă tơpăt. Tơgŭm kiơ̆ kơ trŏ lăp kơ lu bơngai dơnuh hin, hăm bơngai pơmat-tat.

Sa 8:16

'Nâu tơdrong lu iĕm athei pơm: Athei pơma tơpăt dih băl, arih hiôk chơt hăm rông 'bôt, athei sek tơlang mă tơpăt hơnơ̆ng.

Jêphania 2:3

Chơchă bĕ Kră Yang ơ lu bơngai chu yom lăm teh đak, pơm kiơ̆ bĕ nơ̆r Kră Yang tơtă, chơchă tơdrong tơpăt Sư, chơchă bĕ tơdrong gơh găt, dah rŏ lăng đe gô ôn iĕm hlơp lăm năr Kră Yang hil.

Da 4:27

Thoi noh! Ơ Pơtao, apinh ih mơ̆ng nơ̆r inh bơtho khan kơ ih; iŏk bĕ tơdrong tơpăt na huai iŏk đơ̆ng yoch, 'mêm bĕ kơ lu bơngai dơnuh hin wă huai iŏk đơ̆ng dôm tơdrong kơnê̆ ih pơm. Thoi noh tơdrong hiôk-hian ih gô oei đei đunh năr.

Ya 1:27

Bơngai lui bu băt kơ năm ngôi tơ lu kon mơti, lu bơngai adro apo pơmat-tat kơ'bah kơ'bôch păng sư ưh kơ kiơ̆ thoi lu bơngai tơ ala teh ưh kơ lui, bơngai noh boih 'Bă tơm bơ̆n 'Bok Kei-Dei jô̆ sư lui kơjăp hăm pơm tơpăt.

Both 14:29

Lu bơngai Lêwi, yua kơ lu ưh kơ đei mŭk tơmam teh jang sa tơ lăm lu iĕm ôh păng lu bơngai tơmoi, lu bơngai mơti păng lu bơngai yă adro mă oei hơdai lăm pơlei iĕm, kư̆m gô năm sa phĭ mah; thoi ei Kră Yang 'Bok Kei-Dei iĕm ăn pŭn kơ dôm tơdrong jang đơ̆ng tơpang ti iĕm kơdih pơm.

Horiso 34:14

Weh kơ tơdrong kơnê̆ păng pơm bĕ tơdrong 'lơ̆ng. Chơchă bĕ tơdrong hiôk-hian păng druh kiơ̆ tơdrong ei.

Êsai 56:1

Kră Yang khan thoi âu: Athei wei bĕ tơdrong 'lơ̆ng tơpăt. Păng pơm bĕ tơdrong trŏ 'lơ̆ng; yua kơ tơdrong dŏng pơklaih Inh wă jê̆ truh păng tơdrong 'lơ̆ng tơpăt Inh wă jê̆ pơdah bơih.

Êsai 58:6

Noh hăm trŏ ưh kơ trŏ ơ̆t kơ sŏng sa mă Inh lăp đon hrĕch lê̆ tơlei glang tơdrong kơnê̆, plôh lê̆ đêl đe chô̆ đơ̆ng 'long ăt. Tơlĕch achăng lu bơngai đe pơjuă pơđep gơh hơgei, gơ̆ lê̆ rim 'long ăt dah kiơ?

Je 21:12

Kră Yang khan: “Ơ adrĕch Đawit, Pơm bĕ tơdrong 'lơ̆ng tơpăt hơnơ̆ng rim pơgê hrôih, Dŏng pơklaih bĕ lu bơngai đe sa pơgâm, đơ̆ng ti lu bơngai pơjuă pơđep, Kơnh hli kơ Inh hil khơ̆ng thoi ŭnh, ưh kơ đei bu kĕ pĭt, Yua kơ đơ̆ng tơdrong lu iĕm đei pơm yoch kơnê̆.”

Je 35:15

Inh đei lơ wơ̆t boih wơh đĭch đam Inh, lu bơngai khan lê̆ adrol năm khan kơ lu iĕm: Dang ei ăn đĭ kơ lu iĕm weh bĕ đơ̆ng yoch, tơplih bĕ tơdrong lu iĕm pơm; păng kư̆m 'nĕ kơ kiơ̆ lu yang nai, lei na lu iĕm gơh mơ̆t oei tơ lăm char mă Inh gô ăn kơ lu iĕm păng kơ 'bok lu iĕm. Mă-lei lu iĕm ưh kơ wă pơgling đon mơ̆ng kiơ̆ Inh.

Êsêkiên 18:31

Athei hŭt lê̆ bĕ tơdrong yoch kơnê̆ ataih đơ̆ng lu iĕm mă lu iĕm đei pơm boih, pơm ming bĕ kơ lu iĕm kơdih, jơhngơ̆m 'nao păng tơdrong arih 'nao, ơ adrĕch Isơrael, thoi yơ lu iĕm wă kơ lôch?

Le 22:21

Ih 'nĕ kơ pơm kơnê̆ kơ lu bơngai tơmoi păng kư̆m 'nĕ kơ pơjuă lu sư, yua kơ lu iĕm kư̆m đêl jing bơngai tơmoi oei lăm dêh Êyiptơ.

Tơdrông Pơđơk 15:25

Kră Yang gô teh tơhuŏng hnam lu bơngai pơang; Mă-lei sư gô bơwei hơdral teh lu drŏ-kăn adro.

Tơdrông Pơđơk 21:3

Pơm tơdrong tơpăt, băt pơm tơdrong trŏ Noh Kră Yang lăp đon hloh kơ tơmam soi pơyơ̆r.

Êsai 10:2

Hơngah kơ pơm tơdrong tơpăt lu bơngai hoh kơ đei păng ưh kơ pơm tơdrong trŏ kơ lu bơngai dơnuh hin lăm kon pơlei pơla Inh. Tơgar iŏk tơmam đơ̆ng lu drŏ-kăn adro, hơđuh iŏk tơmam đơ̆ng lu kon mơti.

Êsêkiên 22:7

Tơ lăm ih đei bơngai, pơjăm mĕ 'bă; pơgŏ pơđep lu tơmoi; pơjuă lu kon mơti pơm kơnê̆ kơ lu bơngai adro.

Êsêkiên 45:9

Kră Yang khan thoi âu: Ơ lu yŏng pơgơ̆r Isơrael, noh tôm boih! 'Nĕ pă pơm kơnê̆ păng pơjuă pơđep; pơm bĕ tơdrong 'lơ̆ng tơdrong tơpăt; 'nĕ pă pơpuh kon pơlei Inh dơ̆ng, Kră Yang khan.