Êphêsô 3:17 - Sơ̆p Hlabơar Nơ̆r 'Bok Kei-Dei

¹⁷ Păng inh kư̆m apinh Yêsu Krist mơ̆t oei lăm jơhngơ̆m iĕm yua kơ iĕm lui kơ Sư. Păng inh apinh Sư ăn kơ iĕm đei đon 'mêm mơnat kơ bôl buăl lăm tôm tơdrong,

Êphêsô 3:17 Referans Kwoze

Kôlôsê 2:7

Sư pơm tơm kơ bơ̆n na iĕm athei gơnang kơ Sư mă tơpă wă kơ lui kơjăp kiơ̆ thoi đe bơtho iĕm sơ̆, na tơdrong lui iĕm rai đunh rai wơ̆. Mă tôm tơdrong kiơ kiơ athei bơnê kơ 'Bok Kei-Dei ngăl.

I Yo 4:16

Bơ̆n băt kơ Sư 'mêm mơnat kơ bơ̆n tơpă. 'Bok Kei-Dei Sư gah tơdrong 'mêm mơnat đĕch, na bơngai bu 'mêm mơnat kơ đe tơpă, bơngai 'noh pôm đon păng 'Bok Kei-Dei păng 'Bok Kei-Dei oei lăm sư.

Yo 14:23

Yêsu khan kơ sư: “Bơngai bu 'mêm kơ Inh, bơngai 'noh sư gô lui yom kơ tơdrong Inh bơtho. 'Bă Inh 'mêm kơ sư, na nhi 'Bă Inh jur oei hăm sư.

Galati 2:20

Inh dang lĕ lôch hơdai hăm Yêsu Krist tơ 'long pơglang sơ̆ boih yua kơ akâu inh kơdih ưh kơ gơh pơm minh tơdrong kiơ ôh. Na dang ei inh ưh pă gơnang kơ akâu inh kơdih boih, inh gơnang kơ Yêsu Krist mă arih lăm akâu inh, lê̆ kơ Sư chă dui ba inh kiơ̆ kơ tơdrong Sư wă. Inh gơnang kơ Sư yua kơ Sư Kon 'Bok Kei-Dei tơpă, Sư 'mêm mơnat kơ inh mah ăn akâu Sư kơdih lôch tang inh.

Rom 5:5

Bơ̆n băt kơ tơdrong bơ̆n chang gô noh ưh kơ jor ôh, yua kơ 'Bok Kei-Dei ăn kơ bơ̆n Yang Bơhngol 'Lơ̆ng Sư, na Yang Bơhngol 'Lơ̆ng Sư ăn kơ bơ̆n băt 'Bok Kei-Dei 'mêm kơ bơ̆n tơpă.

Tơdrông Tơ'bôh 3:20

Dang ei Inh oei dơ̆ng tơ 'ngoaih 'măng wă krao iĕm. Bu kơtơ̆ng 'bơ̆r Inh krao na pơih kơ Inh 'măng, bơngai noh Inh wă mơ̆t oei hăm sư, sŏng sa hơdai sư.

II Kor 6:16

Hnam 'Bok Kei-Dei hăm rup yang nai ưh kơ gơh tơmơ̆t băl ôh. Lu bơ̆n kư̆m dang hnam oei 'Bok Kei-Dei mă arih ling-lang, yua kơ Sư khan boih thoi âu: “Inh wă oei hơdai iĕm, nơnăm hơdai iĕm; Inh pơm Kră Yang iĕm, iĕm jing kon pơlei pơla Inh.”

Êsai 57:15

Yua kơ Tơ'ngla Tih Hloh kơ đĭ-đăng, Tơ'ngla oei đei ling-lang. Anăn Sư Kră Yang 'Lơ̆ng Rơgoh, đei khan thoi âu: “Inh oei tơ anih kơpal hloh păng 'Lơ̆ng Rơgoh. Mă-lei kư̆m oei hơdai hăm bơngai đei jơhngơ̆m sơ'ngon tơbral tơdrong yoch, wă tơiung ming jơhngơ̆m lu bơngai băt tơjur akâu, wă pơlung jơhngơ̆m lu bơngai băt sơ'ngon kơdih yoch.

I Yo 4:4

Ơ lu kon hơ'lơ̆p, gah iĕm kon 'Bok Kei-Dei tơpă, lu bơngai ayăt kơ Yêsu Krist thuơ kơ iĕm boih. Lu sư thuơ kơ iĕm kơlih kơ Yang Bơhngol 'Lơ̆ng oei lăm lu iĕm, Sư pran hloh kơ yang mă oei lăm lu bơngai ala teh âu.

Kôlôsê 1:27

Wă khan lu bơ̆n boih kon Sư, na Sư wă tơgŭm bơ̆n tôm tơdrong, tôm kơ khŭl kon bơngai jơ̆p kơ teh đak. Tơdrong Sư tơgŭm bơ̆n noh thoi yơ, wă khan thoi âu: Sư ăn Yêsu Krist oei lăm bơ̆n, na bơ̆n gơh băt kơ ning-mônh bơ̆n gô oei arih hiôk jơnap hăm Sư.

Kôlôsê 1:23

Na iĕm kư̆ kơ lui mă kơjăp, lui khŏm khŏm na huay kơ achăng lê̆ tơdrong 'nao 'lơ̆ng Sư, tơdrong mă bơ̆n gô oei hiôk jơnap hăm 'Bok Kei-Dei. Iĕm kơtơ̆ng boih đe anăn tơdrong 'nao 'lơ̆ng; tơdrong 'nao 'lơ̆ng noh boih đe bơtho jơ̆p-jang kơ teh đak, na inh dang ei kư̆m bơtho tơdrong 'noh mơ̆n.

Yo 17:23

Inh pôm đon hăm lu sư păng ba pôm đon dih băl, wă kơ lu sư pôm đon tơduă lu sư mơ̆n; na lu bơngai ala teh âu băt kơ Ih wơh Inh tơpă păng lu bơngai ala teh gô băt kơ Ih 'mêm kơ lu bơngai pơhrăm păng Inh, noh kư̆m thoi Ih 'mêm kơ Inh mơ̆n.

Yo 14:17

Lu bơngai oei ala teh âu mă ưh kơ lui, lu sư ưh kơ gơh sơng iŏk Sư ôh, kơlih kơ lu sư ưh kơ gơh 'bôh Sư păng ưh kơ băt kơ Sư. Mă-lei iĕm, iĕm băt kơ Sư, kơlih kơ Sư oei păng iĕm, Sư kư̆m gô oei lăm jơhngơ̆m iĕm mơ̆n.

Luka 6:48

sư noh thoi lĕ kơ bơngai sir jrăng hnam jrŭ pơm hnam tơ kơpal tơmo kŭk. Na lăp đak krong tih blŭng hnam noh ră, mă-lei hnam noh oei kơjăp, na sư ưh kơ kĕ adrŏ ôh, yua kơ sư pơm kơpal tơmo kơjăp tơpă.

Mathiơ 13:6

Lăp 'năr tŏ boih sư jô na lôch hloi, yua kơ rơh sư chăt ưh kơ jrŭ.

Galati 5:6

Bu kiơ̆ Kră Yang Yêsu Krist, tơdrong kăt tơdra akar ưh kơ đei kăl kiơ ôh. Minh tơdrong lui kơ Kră Yang Yêsu Krist păng 'mêm mơnat kơ đe, noh kăl.

Yo 6:56

Bơngai bu sa sĕch akar Inh păng huch sa pham Inh, bơngai 'noh sư oei păng Inh, Inh oei lăm sư.

I Kor 8:1

Gah tơdrong sa tơmam đe sơmah kơ yang, iĕm khan iĕm băt tôm boih gah tơdrong noh. Mă-lei inh khan kơ iĕm, bơngai bu pơm sa pơjĭp tơmam đe sơmah kơ yang 'bơ̆t anăp đe 'nhŏng oh sư 'nao lui, lu bơngai 'noh sư ưh kơ hlôh tôm ôh gah tơdrong sa tơmam đe sơmah. Sư wă pơang akâu sư kơdih đĕch khan hlôh tôm boih. Dah sư tơchĕng mơnat kơ bôl sư 'nao lui ưh tam băt tôm tơdrong lei sư ưh kơ sa ôh tơmam đe sơmah noh, wă kơ bôl sư huay kơ jrok.

I Kor 3:6

Inh pơtăm găr sư boih, na Apôlê pruih đak, mă-lei 'Bok Kei-Dei ăn kơ tơmam noh gơh wơ̆ tih.

II Kor 13:5

Iĕm athei pơlong lăng tơdrong arih iĕm, hăm thoi bơngai lui tơpă dah ưh. Iĕm hăm băt kơ Yêsu Krist oei hơdai iĕm? Hli kơ iĕm ưh kơ lui kơ Sư đĕch, na Sư ưh kơ oei hơdai iĕm.