Luke 17:1 - Loina Nuahuana

¹ Coinega Yesu 'ana tomuliyao 'ihegwaediya, 'igwae, “Tomota tupwadi nata 'ebetoho baibaiwana sipaihowadi 'oimiya ma 'abehega si'abi hebe'ugomi, ma 'eguma taiyawedi taudi 'ebetohowedi sipaihowediya tuwa 'atemuyamuyaidi.

Luke 17:1 Referans Kwoze

Madiu 18:7

“Comi mebale'u 'atemuyamuyaimi 'iya, weyahina 'ebe be'u baibaiwadi simiyamiya. Moisa tuwa, 'ilobwaineya ma 'ebe be'uwao bale'uwa simiyamiya, ma hesi 'eguma loheya 'itoho ma 'iyanao 'i'abihebe'udi, 'abwa loheyaina 'ihesilae moisa.

1 Kolinita 8:13

Ma taugu hesi genuwagu ma 'aigeda tasida ya'abihebe'u, 'oinega 'e'ahaiyedi yaguipailediya moisa, ma sahena yalolotohodi, tabu ta 'oidiyega tasidao ya'abihebe'udi.

Loma 14:13

Coinega sahena 'iyadao ta'ahwa'ahwa galagalaedi, ma hesiyage taboi mumugada ma 'ida paihowa ta'itayahi, ma 'ane gesowana 'iyadai 'aigeda ta'abi'abi hewe'a 'ina 'etala he'asisi weyahina.

1 Kolinita 11:19

Ta hesi 'imi 'ewatawatahaina 'ana bwebwe'ana beno 'abehega taiyewedi taudi tohekalesiyao moisa ta'inanadi.

Loma 16:17

Tasigwao bewa 'igu 'ahwanoi madouna 'oimiya, beno wa'itayahigomi towatahao 'oidiyega, weyahina he'itaedi wa'ewediya taudi 'adi wahi'wata, 'oinega ta si'ahwa'ahwa galegale ma weteyage tomota 'idi hemisa si'abi'abi hewe'adi.

Madiu 16:23

Ma Yesu 'itehinowa, ta Pita 'oina 'igwae, “Cowa Seitani, bewa tuwa 'u'ebesinegau! Sahena 'u'au'ausigau! Cino nuwatuhu tomota 'idi nuwatuhu, ma geya Yehoba 'ina nuwatuhu gide.”

1 Kolinita 10:32

Sahena hali tomota wa'abi'abi henuwagaladi, nuwana meYudiya, bo tomiya ganamuli, bo nuwana Yehoba 'ina tohekalesiyao.

Heꞌitaꞌita 2:14

“Eema mumugami tupwana weyahina geya yayaliyaya, weyahina tupwami Balami 'ina he'itao wamulimuliyedi. Ta 'ina he'itaowedi mwalo Balaki 'imuliyediya, ta meIsileli mumuga galana 'ihe'itediya, beno dimwa sihemisaeya, ta 'ana si'ebwaeya, ta to'eheleyedi 'e'ahaiina si'aiya, ta wete silogwaliya.

Heꞌitaꞌita 2:20

“Ma hesi bewa 'oina ginaula 'aigeda weyahina geya yayaliyaya, weyahina Yesibeli 'oina watagwala, tauna wahineina 'ihesaniyeya 'abehega tauna 'aigeda Yehoba 'ana tohepwaila; ma geya. Ma hesi wahineina 'igu topaihowao 'ilisidiya logwali ma da'ule 'oidiyega, weyahina da'uleina sihemiseya, ta 'ana si'ebwaeya, ta to'eheleyedi si'aiya.

Luke 16:31

Ta Ebalahamo wete 'igwaeya, ‘Ceguma Mosese ma palopitao 'idi gwae geya sihemisaedi, geya'abwa wete 'aigeda taiya sihehemisae, bwagana 'eguma 'aigeda to'amasa 'itoholo hila ma 'itauya 'oidiya.’”

1 Timoti 4:1

Yaluyaluwa Tabuna 'ihepwaila latuwa 'abehega tuta 'ana 'ebe gumwala 'oina tomota tupwadi nata tapwalolo silogwahate ma yaluyaluwa galadi ma Tomudulele 'idi he'ita 'abo'abowedi sihesagohedi.