Bib sou entènèt

1 Bità 3:18 - The New Testament in the Babanki language

¹⁸ Kə bòŋ ə yenə ngəʼ a ji na ghèn byìʼì ando no Yesò fa wen a ngeŋ ə yen li ngəʼ ə pfʉ byìʼì mbyɨsə vəghəŋ ə mwetə shyèʼ wen to ghàyn ə mùʼ. Ghə̀ ndiʼ wù kənyʉ̀ kətɨməkə ali ə pfʉ ə bwoŋsə̀ viʼi nyʉ̀ ə byɨvə ə ne la vəghəŋ vi a Nyìngòŋ. Viʼi ə zhwi wen, ali a pfʉ to kətsoʼ kə əwenə wen, Nyìngòŋ ə ne kəzhwì kə wenkə faŋ ə sə tsi to tsì.

Gade chapit la Kopi

tounen moute ⬆

1 Bità 3:18
34 Referans Kwoze

Hibùlù 9:28

A lə diʼ fa ji a ghèn a və ə nku Yesò ghə̀ pfʉ to aghayn ə mùʼ ə shʉ mbyɨsə viʼi no vəghoʼo. Ghə̀ lu bwenə ko ghə̀ be vi ə shʉ mbyɨsə viʼi, ghə̀ lu vi ə bwoŋsə̀ viʼi vyi a və nyʉ̀ʼ kəʼtə wen nə̀ tətyɨm tə vəwenə no tsèm.

Hibùlù 9:26

Kə ndiʼ ali mu ghə̀ ə nfaŋ li ə sə zen kətʉ kə viʼi no aghayn to kədə̀ŋ no fa chʉ a və nshɨtə mbyi. Alì luwen diʼ mu ghə̀ nvi to aghayn ə mùʼ ə ku wèn ə wen a kəku ə shʉ̀ ə mbyɨsə viʼi. Ghə̀ nè ando vəghəŋ sə tsi a məntsi məkəmwetə.

2 Kolìntyàns 5:21

Nò tèbe Yesò fa wen a ngeŋ ə ko ne mbyɨ ali Nyìngòŋ ə lyɨ̀ wen a wu mbyɨ ndiʼ vəghəŋ chò fa wen ə nti a nkàyn ashɨ Nyìngòŋ.

1 Bità 4:6

A le kənyʉ̀ ki a və ə nboŋ shə̀ʼtə̀ ntɨm ə jùŋ no tèbè a viʼi vyi a və pfʉkə li. Nyìngòŋ ə nsə diʼ mu ghə̀ ə soʼ li vəwenə achʉʼ a vəwenə nbo tsì a kətsoʼ kə wèn to ndə̀ŋndəŋ ando ghə̀ nsoʼ viʼi və tsèm. Və nshə̀ʼtə̀ ntɨm ə jùŋ nà ghèn a vəwenə ndiʼ vəwenə ntsi a kəzhwì to ando Nyìngòŋ ə kəŋ.

Taytùs 2:14

Ghə̀ nku li ə̀wen ə wen ə̀ zèn ətʉ vəghəŋ fa mbyɨsə no sətsèm ə̀ bè nè la vəghəŋ layn ə̀ kwʉ̀ʼ ə ndiʼ viʼi wen a və kòŋə̀ ə nè tò ənyʉ̀ juŋəvə.

1 Joyn 1:9

Vəghəŋ sətsèn ə dì a wèn byìʼì mbyɨsə vəghəŋ, Nyìngòŋ à lyesə ku ə mbyɨsə vəghəŋ ə̀ bè shʉ̀ vəghəŋ, vəghəŋ laynə fa ə mbyɨsə sətsèm, byìʼe ghə̀ dìʼ wù kənyʉ̀ kətɨməkə be diʼ wìʼ ə və nzhəʼtə̀ à wen ə wèn.

Lumans 4:25

Nyìngòŋ ə ku wen la və zhwi byìʼì mbyɨsə vəghəŋ ə bwensə lùsə wen fa pfʉ ə ne la vəghəŋ ndiʼ ti a nkàyn ashɨ ə Nyìngòŋ.

1 Bità 4:1

Ando vəghəŋ ə kɨ la Yesò Klistò ə nyen li ngəʼ kətsoʼ kə wèn, ghə̀ŋ ə boŋsə kiʼi to əkwoʼtə yì a ghə̀ nkiʼ, bvɨtə ə yen ngəʼ byìʼì ando no ndò a ghə̀ yenə ngəʼ a nse ashə to nə̀ Yesò, kə bè nè ə nè mbyɨ.

Lumans 8:3

Nyìngòŋ ə sə diʼ mù ghə̀ nè li kənyʉ̀ ki a Əsoʼ ə wʉ ə ne byìʼì njòsə wen sə a sə bwaʼa. Ghə̀ ne alə̀ a ji la ghə̀ ntɨm li Wàyn wen, ghə̀ vi a nse to no wen ə wìʼ ghèn a ghə̀ kòŋ mbyɨ lə. Ghə̀ vi ku wenə wen ə pfʉ ə lòʼ ə mbyɨsə viʼi. A diʼ a ji na ghèn a Nyìngòŋ ə byɨbsə kədyòʼ kə mbyɨ fa njòsə wen.

Gàlesìyà 3:13

Klistò mbwensə li zen kətʉ kə vəghəŋ fa ngəʼ yi a Əsoʼ ə nshiʼsə a vəghəŋ kətʉ. Ghə̀ ne alə a ji la ghə̀ shi li ngəʼ na yi a vəghəŋ a kəshi, byìʼì ando və nyoʼo li a ŋwàʼlə̀ la, “Ngəʼ Nyìngòŋ ne diʼ no tèbe a ndò yi a və sɨŋsə wen a fəkoʼ.”

Gàlesìyà 1:4

Yesò ə nku li wen ə wen ə pfʉ byìʼì mbyɨsə vəghəŋ ə bwoŋsə vəghəŋ fa mbyi ghèn a mbyɨ ə ghoʼ tsu lə̀. A diʼ to kənyʉ̀ ki a Nyìngòŋ ə Tìʼ vəghəŋ ə nkəŋə.

2 Kolìntyàns 13:4

Kə diʼ nəmwèʼè la ghə̀ ko kiʼ tebè kədyòʼ azhʉ̀ a və mbàyntə wen a kəntò ali, ə bwensə lu sə tsi byìʼì kədyòʼ kə Nyìngòŋ. Kə le diʼi la à diʼ ə ntsìnə̀ yi a yès ə̀ tsì və ghə̀ŋ, yès gho kədyòʼ to nə̀ wen ali be boŋ tsi to tsi byìʼì kədyòʼ kì a Nyìngòŋ ə nkù li a wen.

Lumans 5:2

A ne wen la vəghəŋ nkiʼi ətyɨm ə jùŋə ghə Nyìngòŋ ə byìʼì əbyɨmə ə vəghəŋ. Vəghəŋ ə ti to a kwi ətyɨm ə jùŋə ghə̀ a ghèn be naynə, kɨ nəmwèʼè la Nyìngòŋ ə lu gətə ku vəghəŋ nə̀ əbayn yì a ghə̀ kiʼi.

Lumans 1:4

Nyìngòŋ ə nlùsə Bobo vəghəŋ Yesò Klistò a ghèn fa pfʉ ə diʼ adyòʼ la ghə̀ diʼ to no Wàyn Nyìngòŋ, kiʼi Kəzhwì kə Nyìngòŋ.

Jems 5:6

Ghə̀ŋ ə ne li la və soʼ ə̀ byɨ̀sə viʼi ntosə, ə̀ byɨ̀sə vəwenə kèn la vəwenə soyn li ghə̀ŋ.

Shwèʼ 3:14

Yesò ndìʼ wù Nyìngòŋ, diʼ wu ŋwoʼə be diʼ wù kənyʉ̀ kətɨməkə, alì ghə̀ŋ tyen wen ə̀ bòŋsə̀ gàʼ və shìsə̀ wìʼ a ghə̀ nzhwilə̀ viʼi.

2 Kolìntyàns 1:24

Vəghəŋ ə kɨ to no nəmwèʼè la əbyɨmə ə ghəŋə to, ko yès ə lu kòŋ ə ntenlə wìʼ tenlə la ghə̀ ne kənyʉ̀ kumə əbyɨmə ə wen. Yès ə boŋsə kòŋ ə vi la vəghəŋ tsentə ə ne kənyʉ̀, kə vi to nə̀ saŋlə a ghə̀ŋ.

Lumans 8:11

Kəzhwì kə Nyìngòŋ a ghə̀ ə nlùsə Yesò Klistò fa pfʉ sətsen ə ntsi a ghə̀ŋ a ntìntìn, Nyìngòŋ a ku ntsìnə̀ a ghə̀ŋ a wen ashə a ghə̀ diʼ lu ə pfʉ lə, chò fa wen a kəzhwì yi a kə tsi a ghə̀ŋ a ntìntìn.

Shwèʼ 22:14

Ghə̀ gàʼ à mò la, ‘Nyìngòŋ yì a vətìʼ və vəghəŋ nlù sə gumlə̀ lì, ə tsuʼ li wù la wù kɨ kənyʉ̀ a ghə̀ kəŋə la wù nè be yen ə̀ kɨ wù kənyʉ̀ kə tɨmə kə yì a ghə̀ shwèʼè à wen, bè zhʉ̀ ando ghə̀ gàʼà à wù fà wen a ngə̀ŋ,

Matìyò 27:19

Bilate mbù bù a ngə̀ŋ soʼo nsoʼ Yesò, wì wen tɨm ntɨm à wen gàʼà la, “Kə a we kəvu kə̀ a wèn wìʼ ghèn a və kəŋə zhwi wen tò kədyàŋ lə̀, byìʼàndo mà tə yèn ngəʼ no nànto a jòmsə nəntʉʼʉ lan byìʼì wen.”

Matìyò 27:24

Bilate nè yèn la ghə̀ yènə ngəʼ tò kədyàŋ mu soyn zi ghə̀ be fʉ̀, ghə̀ lyɨ̀ mu ə shʉ̀ avu wen tsu tò vəwenə a shɨ gàʼà la, “mà ko kiʼ kəvu a pfʉ wìʼ ghèn. Nsoʼ ghə̀ŋ.”

Joyn 16:10

ə diʼ jisə tɨməsə byìʼàndo mà sə dyʉ̀ a ben ə Tìʼ ghom, ko ghə̀ŋ be ə diʼ ə yen mo.

Efisyàns 3:12

Əbyɨmə ə vəghəŋ ə̀ tsentə yì a vəghəŋ ə kiʼi vəghəŋ və Klistò ne li la vəghəŋ ə diʼ mù və zizi və sə dyʉ̀ a Nyìngòŋ ko və lu fwàynə̀ tebè kəfo, kɨ nəmwèʼè la ghə̀ a shisə vəghəŋ.

Hibùlù 9:14

Mənlyuŋ mə nyàm ə sətsen ndiʼ nè la wìʼ ndiʼ nə̀ laynə to ando kə ndiʼ, mənlyuŋ mə Yesò ne mɨŋsə kiʼi kədyòʼ ə ne ə wìʼ ndiʼ nə̀ laynə ale? Ghə̀ ə nkuli wenə wen a Nyìngòŋ a kəku, ko ghə̀ kiʼ əmbyɨ, mu gyàmtə̀ Kəzhwì ki a kə diʼ to məzhʉ̀ ə tsèm. Ghə̀ nè alə ə shʉ̀ ə laynsə tətyɨm tə vəghəŋ fa nyʉ̀ yì a və vi nə̀ pfʉ ndi vəghəŋ ə̀ kuʼsə Nyìngòŋ yi a ghə̀ tsi.

Hibùlù 10:10

Ando Yesò Klistò nsə diʼ mu ghə̀ ku li ə wèn ə wen to ghaynə əmùʼ ə ne kənyʉ̀ ki a Nyìngòŋ ə nkəŋ la ghə̀ nè, kə nè la vəghəŋ ə nlaynə kwʉ̀ʼ ashɨ Nyìngòŋ.

1 Bità 3:19

A diʼ kəzhwì kə wen na kènkə a kə nlu ədyʉ̀ shə̀ʼtə̀ kənyʉ̀ kə Nyìngòŋ a zhwi a ngə̀ŋ nfɨŋ,

Swiv nou:

Lyen patwone

Piblisite

Piblisite