Taitasi 3:2 - Baibo Busansulushi Bwa Libuku Ili

² Ubalwiite ayi batanokwaambila muntu shibiibi nabi womwi, sombi kuba beshiluumuno, beshikulibombya alimwi bacite bulemu kumuntu woonse.

Taitasi 3:2 Referans Kwoze

Bene Efeso 4:31

Aboobo mucileeke mfundilishi, kupatana alimwi akukalala. Tamweelete kukalooka nabi kutukana nabi kuba amiyeeyo ya lupato ya mishobo yoonse.

Bene Efeso 4:2

Amuliceeshe, mulibombye alimwi amukomenye myoyo lyoonse. Kamulekelelana kwiinda mulusuno.

1 Timoti 3:3

Taaelete kuba cakolwa, nabi mukali, sombi mubombu, shiluumuno, utasunishi maali.

1 Pita 3:10

Kweelana abwaamba Malembo akwe Lesa ayi, “Uyo usuni kwikala buumi bubotu akukondwa munshiku sha buumi bwakwe, ulyeelete kucileka kwaamba shibiibi alimwi mulomo wakwe teshi ukaambe shabubeshi.

1 Pita 3:8

Cakweelaako, noonse amucatane amoyo womwi akuba amyoyo ibombu. Mulyeelete kusunana abashominyinaanu akunoonyumfwilana nkumbu alimwi akuliceesha.

Jemusi 4:11

Nobamakwesu, mutanoofuyana. Uyo ufuya nabi woombolosha mushominyina, ulacobola akoombolosha Milawo yakwe Lesa. Ono na woombolosha Milawo, ingayi wacileka kwiikonkela, akuba shikuyoombolosha.

Bene Galatiya 5:22

Sombi shisepo sha Mushimu Usalashi, ndusuno, kusangalala, luumuno, kukomenya moyo, nkumbu, kubota moyo, kushomeka,

Mateyo 11:29

Amulipatike lijoko lyangu, mwiiye kuli ndime ceebo nebo ndimoote alimwi ndimubombu mumoyo. Paceebo ceeco, mulaakucana kookesha mumyoyo yanu.

1 Pita 2:1

Aboobo amucileeke bubi boonse, bubeshi, kwaamba nshemutaciti, munyono alimwi amusebaanyo wa mushobo woonse.

Jemusi 3:17

Sombi bantu bacite busongo buswa kwiculu, citaanshi tabacite kampenda alimwi balisuni luumuno, balalicata mukwaamba, balalibombya, mbaankumbu lyoonsebo alimwi balacita shintu shibotu shimwi shoonse. Tabasalululi alimwi tabalyaambi mbobatabete.

Bene Galatiya 6:10

Paceebo ceeco, bulya mbotucite ciindi ceelete, atucite shibotu kubantu boonse, bunene bunene abo bali mulikoto lya bashomi.

2 Samwelo 22:36

“Nobaami baLesa, mwakampa lupulusho lwanu anga ndiyawo alimwi lucafwo lwanu lwanengesha kuba muntu wa bulemu.

Bene Galatiya 6:1

Nobamakwesu, ono na umwi mulikoto lyanu wacita cibiibi cimwi cili coonse, mwebo nomutanjililwa aMushimu Usalashi mulyeelete kumululamika. Mulyeelete kucita boobo cakulibombya, sombi amwebo mucenjele kwaamba ayi mutawiti mumasunko.

1 Timoti 3:11

Bamakaabo abalo balyeelete kuba amibo ibotu, batafuuyi. Balyeelete kuba bantu balibika mpobeelete alimwi bashomeka mushintu shoonse.

1 Bene Tesalonika 2:7

Ee, mbuli batumwi bakwe Klistu necakalulamabo kumusenga shintu, sombi swebo twakalibombya pakati kanu bweenka mbuli mushali mwanakashi mbwaalama bana bakwe.

Bene Filipi 4:5

Amutondeshe buumi bwakulibombya kubantu boonse ceebo Mwaami Jesu uli pafwaafwi kwisa.

1 Bene Kolinto 9:19

Nebo ndyaangulukite, nshibete musha wa muntu uli woonse. Nakubi boobo ndakalisandula musha kubantu boonse kwaamba ayi ndete baanji kuli Lesa.

Kulumbaisha 140:11

Abo babekesha bamwi mutabaleeki ayi banoocikala mucishi. Bubi abukanyonyoole bantu bakali.

2 Bene Kolinto 12:20

Ceebo ntooloonda kwaamba ayi ndaakwisa uko ndaakumucana kamutabete mbuli mbondakalinga kumuyeeyela, nabi mwebo kumbona mbomutasuni. Ntooloonda ayi ndaakucana kwaambana, munyono, bukali, kulisuna, matushi, kufuya, kulisumpula akunyonyongana.

2 Bene Kolinto 10:1

Nebo nePaulo, ntooyanda kumusenga ono. Bantu balaamba ayi na kaandi amwebo ndalibombya, sombi na nkaantabete amwebo ndamukalalila. Kwiinda mukulibombya ankuumbu shakwe Klistu ntoomusenga ayi

Milimo ya Batumwi 23:5

Paulo wakakumbula ayi, “Nobamakwesu, nshindalinga kwishi kwaamba ayi ngumupailishi munene mukwiinga Malembo akwe Lesa alaamba ayi, ‘Tooelete kwaambila muleli wa bantu bako maswi abiibi.’ ”

Tushimpi 25:24

Ncibotu koona pansengwe kwiinda koona muŋanda yomwi amwanakashi shikutobwa.

Tushimpi 6:19

kamboni mubeshi alimwi amuntu shikuleta lupato pakati ka baabo banyumfwana.

Judi 1:10

Sombi bantu aba balacobola cintu cili coonse ncebatanyumfwishi. Ono shintu isho nshebeshi kabotu mukusebensesha mibo yabunyama, nsheshintu sheshi shikabanyonyoole.

Judi 1:8

Sombi bantu aba balacita mbomunya ubo. Kwiinda mukukonkela shiloto shabo, balabisha mibili yabo. Balakaka nkusu shakwe Lesa alimwi akucobola baanjelo bakwe balemekwa.

2 Pita 2:10

bunene bunene abo bakonkela lunkumbwa lwa mibili yabo akusuula bulemu ankusu shakwe Lesa. Bafundishi babeshi aba tabaloondi balalisumpula alimwi tabaloondiiwo abalemekwa ba kwiculu, sombi balabacobola.

1 Pita 4:4

Ono bulya bakunsengwe balakankamana ndibabona kwaamba ayi tamutokala buumi bwakubisha pantu pomwi ambabo, nceceeco ncebatoomutukanina.

1 Bene Kolinto 6:10

beepi, balyabi, bacakolwa, beshimatushi nabi bapambi teshi bakenjile muBweene bwakwe Lesa.

Isaya 40:11

Ulaakunoolama litanga lyakwe lya mbelele anga ngumweembeshi. Ulafukatisha twana twa mbelele mumaansaakwe. Ulatunyamwita pacaamba kufwaafwi amoyo. Ashalo mbelele shine twaana uto ulashibinga cakabotu kabotu.

Tushimpi 19:19

Na muntu ngwa kamoyo kaniini muleke alibonene, ceebo wamufuna, ulaakucibooshawo.