Sekaliya 12:5 - Baibo Busansulushi Bwa Libuku Ili

⁵ Lyalo bamatanjilili ba bene Juda balaakunoolyaamboosha ayi, ‘Bene Jelusalemu mbayumu ceebo Mwaami Lesa Shinkusu shoonse nguLesa wabo.’

Sekaliya 12:5 Referans Kwoze

Sekaliya 10:12

Ndaakulengesha bantu bangu kuba ankusu alimwi balaakunoonambila akunyumfwilabo ndime. Nebo neMwaami Lesa ndaamba.”

Jowelo 3:16

Mwaami Lesa ulaakubuluma kuKalundu ka Siyoni akululuma kuswa kundabala inene ya Jelusalemu. Lyalo cishi ca panshi aliculu shilaakutenkaana. Sombi Mwaami Lesa ulaakuba ciyubilo ca bantu bakwe, ee, ulaakufuna bantu bakwe bene Isilaeli.

Kulumbaisha 18:32

Ono uyu Lesa eenka nceciyubilo cangu ciyumu nta, alimwi ulanengesha kweenda, nshila yangu keetuba.

Kulumbaisha 144:1

Aalumbaishikwe Mwaami Lesa Mwaandami wangu, uyo wiisha maansaangu kulibambila kulwana, aminwe yangu kulibambila nkondo.

Kulumbaisha 18:39

Mwakampa nkusu shakulwana munkondo akunengesha kukoma balwani bangu.

Isaya 28:6

Ulaakupa boomboloshi moyo wakoombolosha cakutanyengelela. Kubaabo bakunkana abalwani kuminjililo ya ndabala ulaakunoobapa nkusu.

Sekaliya 12:6

“Pabushiku ubo ndaakulengesha bamatanjilili ba bene Juda kuba anga nimbabula yabikwa pamulwi wa nkuni. Ee, kubabo anga ncimunimweenge cabikwa pamile ya bwiisu. Nkokwaamba ayi balaakunyonyoola mishobo yoonse ibashingulukite. Sombi balo bene Jelusalemu balaakunooshiitebo kwakubula cakulisukama mundabala yabo.

Sekaliya 10:6

“Ndaakupa nkusu bene Juda ee, ndaakupulusha bene Isilaeli. Ndaakubanyumfwila nkumbu akubaboosha boonse. Ncakwiila balaakubabo anga nshina kubafutatilaawo kale. Nebo ndime Mwaami Lesa, Lesa wabo, ndushinisho ndaakukumbula mipailo yabo.

Jelemiya 33:26

Ono mbocibete lushinisho ayi ndakacita boobo, mbweeke ubo mbweshi nkacite kweelana acipangano cangu abamulunyungu lwakwe Jakobo alimwi amusebenshi wangu Defedi. Ndaakusalawo muntu womwi pabamulunyungu lwakwe Defedi ayi alele bamulunyungu lwakwe Abulaamu, Isaki aJakobo. Ndaakufwita nkumbu bantu bangu akubalengesha kuswitilila alimwi.”

Jelemiya 30:21

Mutanjilili wabo ulaakunooli mwine mishaabo. Ncakwiila muleli wabo ulaakuswa pakati kabo. Ndaakumusenya pafwaafwi alakwe ulaakuba muliimfwa lyangu, ceebo taaku weenga waliyuminisha kunsena pafwaafwi na nshina kumwiita.

Isaya 60:17

“Mumusena wa bulonse nebo ndaakukuletela golodi alimwi ndaakukuletela silifa mumusena wa nshimbi. Ndaakulengesha luumuno kuba anga ngomweendeleshi wako, abwalo bululami anga ngomuleli wako.

Isaya 32:1

Amubone kulaakuba mwaami weshi akanoolela cabululami. Abalo beendeleshi balaakunokweendelesha cakutanyengelela.

Isaya 29:10

Mwaami Lesa wamulengesha kushinshila ayi moone cakufwa. Balaluki abo bali anga ngomeenso anu wabacala pameenso. Ee, wacala meenso a beshikubona abo bamutanjilila.

Isaya 1:26

Ndaakukupa boomboloshi alimwi bweenka mbuli kukataanshi, alimwi ndaakukupa beshikupanda maano bweenka mbuli kukale kale. Kuswawaawo ulaakwiitwa ayi Ndabala ya Bululami, ee, Ndabala Ishomeka.”

Isaya 1:23

Batanjilili bako mbaashu alimwi baleendelana abeepi. Ncakwiila mbantu basunishi makulo akutambula shipo. Tabeemikaniniwo banabanshiwa munkuta nabi kukutika na bamukalubinje banakashi baleta makani kuli mbabo.

Isaya 1:10

Nobene Jelusalemu, amukutike shitokwaamba Mwaami Lesa. Amukutike mwebo nobaleli nomuli anga mbaleli bene Sodoma aGomola, ee, nobantu nomuli anga mbene Sodoma aGomola.

Kulumbaisha 46:1

Lesa nceciyubilo cesu alimwi ngootupa nkusu, ulilibambite kutucafwa lyoonse ndituba mumapensho.

Boomboloshi 5:9

Moyo wangu uli pabamatanjilili bene Isilaeli, uli pabantu bakalyaaba cakusangalala. Aalumbaishikwe Mwaami Lesa.

Sekaliya 12:4

Pabushiku ubo ndaakulengesha maaki abo oonse kuba aboowa alimwi ndaakufulunganya beshi kwaatanta boonse. Ndaakunoolama mushobo wa bene Juda, sombi ndaakupofosha maaki a mishobo imwi yoonse.

Sekaliya 14:14

Abalo bene Juda balaakunoolwana mukufuninina Jelusalemu. Balaakubwesa shintu sheshi bakasaale kuswa kumishobo imwi. Ncakwiila balaakusaala buboni buli mbuli golodi, silifa kubikaawo ashakufwala shiinji abuumbi.

Isaya 28:5

Pabushiku ubo Mwaami Lesa Shinkusu shoonse ulaakuba anga ngumushini wa bulemu, ulaakuba anga ningala ya maluba yeebeleka, kubantu bakwe beshi bakacaaleewo.

Isaya 45:24

“Mukwaamba liina lyangu balaakunokwaamba ayi, ‘MuMwaami Lesa mweenkabo, momuli bululami alimwi ankusu.’ ” Boonse abo bandwana balaakwisa kuli ndime akulenshekwa nsoni.