Luka 23:14 - Baibo Busansulushi Bwa Libuku Ili

¹⁴ Lyalo wakabaambila ayi, “Uyu muntu mwakamuleta kuli ndime ayi ulayungoola bantu ayi babukile cishi cino. Ono nebo ndindamwiipushisha noonse kamuliiwo, ndacana kwaamba ayi taaciteewo mulandu pashikani shoonse nshemwalinga kwaamba pali nguwe.

Luka 23:14 Referans Kwoze

Danyelo 6:4

Mpomunyaawo bacinenenene bamwi pantu pomwi abeendeleshi abo bakatalika kuyandoola mpweenga bapeta Danyelo mulandu munshila iyo njaakalinga kweendelesheshamo bwaami. Sombi bakaalilwa mukwiinga Danyelo wakalinga kushomeka alimwi taakwe kucitawo cilubite nabi cakutashomeka.

Bene Ebulu 7:26

Jesu anu ngoMupailishi Munene utucafwa munshila shoonse shiyandika. Ulisalalite alimwi taacite kampenda nabi bubi muli nguwe. Wakapusanishikwa abamucita shibi alimwi wakasumpulwa kwiinda shoonse sha kwiculu.

Milimo ya Batumwi 13:28

Nakubi kwaamba ayi tabakwe kucanina Jesu cilubo cakumucailaawo, bakasenga kuli Pilato ayi acaikwe.

Mateyo 27:54

Ono munene wa bashilumamba mwaanda, abashilumamba abo mbwaakalingaabo kabalindilila Jesu, ndibakabona citentanshi ashimwi shintu shoonse shakacitika, bakaloonda abuumbi, akwaamba ayi, “Ncakwiila, uyu muntu wakalinga Mwanaakwe Lesa!”

Mateyo 27:24

Ono Pilato ndyaakabona ayi taaku nceshi cicitike, alimwi ayi inga paakuba shimfulunganya, wakabwesa maanshi akusamba kumaansa pameenso a bantu boonse akwaamba ayi, “Nebo nshicite mulandu palufu lwa muntu uyu! Ngumulandu wanu nobeene!”

Mateyo 27:19

Pilato ndyaakalinga kushiite pacuuna cakoombolosheshaawo, mukaakwe wakatumya maswi akwaamba ayi, “Mutaciti cintu nabi comwi pamuntu uyo utacite mulandu ceebo sunu mashiku ndapenshekwa abuumbi muciloto ceebo ca nguwe.”

Mateyo 27:4

akubaambila ayi, “Ndakabisha kwaaba muntu utacite mulandu.” Balo bakamukumbula ayi, “Ono tucite buyani swebo? Ngamakani ako omwiine ayo!”

Milimo ya Batumwi 17:11

Bene Biliya bakalinga kucite myoyo yakunyumfwishisha kwiinda bene Tesalonika. Bakalinga kukutika maswi amyoyo yabo yoonse alimwi lyoonse bakalinga kwiindulukaamo muMalembo akwe Lesa kwaamba ayi babone na shakalinga kwaamba Paulo nshalushinisho.