1 Amulumbaishe Mwaami Lesa! Amulumbaishe Mwaami Lesa mwebo nomwikala kwiculu. Amumulumbaishe nomwikala kwiculu kwiine.
NoBaami baLesa, bakwiculu balalumbaisha shaankamiko isho nshemucita, basalalite abo balalumbaisha kushomeka kwanu.
Liculu acishi ca panshi ashilumbaishe Lesa, alwalo lweenge ashintu shoonse shiliimo.
Amwiimbe cakusangalala mwebo nomaculu! Olobesha cakukondwa awebo ocishi ca panshi. Ashinyumfwike nyimbo kuli ndimwe notulundu ceebo Mwaami Lesa woombulusha bantu bakwe alimwi alaakunyumfwila nkumbu abo batoopenshekwa.
Aalumbaishikwe Mwaami Lesa! Omoyo wangu lumbaisha Mwaami Lesa!
Mpeeke bantu abo bakalinga panembo lyakwe Jesu abaabo bakalinga pesule bakatalika koolobesha ayi, “Aalumbaishikwe mwanaakwe Defedi! Ulicite coolwe uyo utoosa muliina lyakwe Lesa! Aalumbaishikwe Lesa kwiculu lya maculu!”
Amulumbaishe Mwaami Lesa noshilengwa shakwe shoonse ncakwiila shoonse shili mubweene bwakwe. Omoyo wangu lumbaisha Mwaami Lesa!