Jelemiya 24:10 - Baibo Busansulushi Bwa Libuku Ili

¹⁰ Ndaakubatumina nkondo, nsala amwaalu kushikila bakanyonyooke mucishi ico ncendakapa mbabo abamashali babo bakulukulu.”

Jelemiya 24:10 Referans Kwoze

Isaya 51:19

Mapensho aya esa camambili pali ndimwe. Anu ngani weenga wamuumbulushaako? Kunyonyooka kwamupolela, ncakwiila nsala ankoondo shenjila. Anu ngani weenga wamuumbulushaako?

Esekelo 33:27

“Balwiite ayi nebo neMwaami Lesa Shinkusu shoonse ndaamba ayi, ‘Kweelana ambocibete lushinisho ayi ndi muumi, mbweeke ubo abo bakacaala mumatongo balaakucaikwa munkondo. Abo bekala muluundu ndaakubaaba kubanyama ba muluundu. Abalo abo boonse bekala mushiyubilo amushimfwengo, balaakufwa kumwaalu.

Esekelo 7:15

Pansengwe pali nkondo, mukati muli mwaalu ansala. Abo bali mumishi balaakufwa kunkondo abalo abo bali mundabala inene balaakucaikwa kunsala akumwaalu.

Jelemiya 34:17

Paceebo ceeco nebo neMwaami Lesa ntokwaamba ayi, “Mwebo tamukwe kunyumfwila maswi angu pakukaka kwaangulula bakwabanu baEbulu. Aboobo ntoomwaangulula ayi mukafwe kunkondo, mwaalu alimwi akunsala. Ndaakumulengesha kulensha bunya kubwaami boonse bwa pacishi ca panshi.

Jelemiya 27:8

“Ono na umwi mushobo nabi bwaami bukabule kusebensela Nebukadinesa mwaami wa bene Babiloni nabi kusumina bweendeleshi bwakwe, mushobo uyo ndaakuupa mulandu wa nkondo, nsala amwaalu kushikila Nebukadinesa akanyonyoole mushobo uyo cakumaninina.

Jelemiya 19:7

Mumusena uno ndaakunyonyoola miyeeyo ya bene Juda aya bene Jelusalemu. Ndaakulengesha balwani babo kubakoma akubacaya munkondo. Mituntu yabo ilaakuba shakulya sha bayuni abanyama bamuluundu.

Jelemiya 16:4

Balaakufwa kumalwashi ayoosha. Teshi bakalilweewo nabi kubikwa. Sombi mibili yabo ilaakubabo anga ngamatombe apantantaala peculu lya nshi. Balaakuloba kunkondo akunsala. Lyalo mituntu yabo ilaakuba cakulya ca bayuni abanyama bamuluundu.

Jelemiya 15:2

Ono na bakwiipushe ayi, ‘Ino tuye kuli?’ ubalwiite ayi, ‘Mwaami Lesa waamba ayi, abo beelete kufwa lufu ŋanda, balaakufwa. Abo beelete kufwa kunkondo, balaakufwa munkondo. Abo beelete kufwa kunsala, balaakufwa kunsala. Abo beelete kutolwa mubusha, balaakuya mubusha.’

Jelemiya 9:16

Ndaakubapalanganishisha pakati ka mishobo iyo balo nabi bamashali babo bakulukulu njebatakwe kwishibaawo. Ndaakubatandaanya amakoto a bashilumamba kushikila nkabanyonyoole cakumaninina.’ ”

Jelemiya 5:12

Bantu ba Mwaami Lesa bakaamba shabubeshi pali nguwe ayi, “Taaku nceshi akacitewo! Teshi tukapolelwewo mapensho. Ncakwiila ayi teshi tukapolelwewo nkondo nabi nsala, sobwe.

Ciyubululo 6:8

Ndindakalangilisha, ndakabona liaki litubulukite. Uyo wakalinga kutantiteewo liina lyakwe wakalinga Lufu. Lyalo musena wa bafu wakamukonkela pesule. Balo bakapekwa nkusu shakucaya cipansha comwi ca shone ca bantu boonse mucishi ca panshi. Nkusu shabo shakalinga shakucaya kwiinda munkondo, nsala, malwashi alimwi abanyama bakali ba muluundu.

Dutolonomi 28:21

Ulaakukonkanya kumutumina malwashi kushikila kukabule muntu nabi womwi eshi akacaale mucishi ico ncemuli pafwaafwi kubwesa akwikalaamo.

Jelemiya 21:9

Anu uyo woonse weshi akekale mundabala ino ulaakufwa kunkondo, nsala nabi mwaalu. Sombi uyo woonse weshi akaye mukulyaaba mumaansa a bene Babiloni abo batooshinguluka ndabala yanu inene, ulaakuba abuumi. Ulaakucatwa, sombi teshi akacaikwe.

Jelemiya 42:17

Ndushinisho, boonse abo bashinishitebo kuya mukwikala kuIjipiti, balaakufwa kunkondo, nsala alimwi akumwaalu. Taaku nabi womwi weshi akapuluke nabi kuloboka mapensho ayo ngweshi nkabaletele.’

1 Baami 14:15

Mwaami Lesa ulaakupensha bantu bene Isilaeli alimwi balaakunootutuma anga nditete lili mukalonga. Ulaakukusha bene Isilaeli mucishi ici cibotu ico ncaakapa bamashali babo bakulukulu, alimwi ulaakubapalanganya kwiindilila Mulonga wa Yufuletisi. Ulaakucita boobo mukwiinga bakasonkomona bukali bwakwe kwiinda mukupanga shikoshanyo sha lesa mwanakashi Ashela.

Jelemiya 9:15

Paceebo ceeco, nebo neMwaami Lesa, Shinkusu shoonse, Lesa wa bene Isilaeli ndaamba ayi, ‘Amubone, ndaakulengesha bantu aba kulya shakulya shilula akunwa maanshi akola.

Jelemiya 14:12

Nabi bakalikashe kulya, kulila kwabo teshi nkakunyumfweewo. Nabi bakabenge milambu yabo yakutenta akupa shipo sha fulaulo teshi nkashitambulewo, sobwe. Sombi ndaakubanyonyoola kunkondo, nsala alimwi akumwaalu.”

Jelemiya 29:17

Ee, Mwaami Lesa Shinkusu shoonse waamba ayi, ‘Ndaakubatumina nkondo, nsala amwaalu alimwi ndaakubalengesha kuba anga ninkuyu shibiibi cakutalikwa.

Jelemiya 29:18

Ndaakubatandaanya kunkondo, nsala amwaalu akubalengesha kupatwa kubwaami boonse bwa pacishi ca panshi. Lyalo balaakuba cintu ceelete kushinganwa, kuloondwa, kushibulukwa akusekwa pakati ka mishobo iyo njendakabatandilaako.

Jelemiya 32:24

“Bene Babiloni bapanga shitunta shakutantilaawo pakulwana kushingulusha ndabala inene ayi beekoome. Ono kwiinda munkondo, nsala amwaalu, ndabala inene iyi ilaakwaabwa mumaansaabo. Nkokwaamba ayi makani oonse ngomwakaamba nobaLesa ngalushinisho.

Jelemiya 32:25

Nakubi boobo noBaami baLesa ndimwe mwakantuma ayi ngule muunda amaali a silifa pameenso abakamboni nakubi kwaamba ayi ndabala inene iyi itooyanda kunyonyoolwa kubene Babiloni.”

Jelemiya 42:22

Aboobo bulya amwishibe kwaamba ayi mulaakufwa kunkondo, kunsala akumwaalu kumusena uko nkomusuni kuya mukwikala.”

Esekelo 6:11

Mwaami Lesa Shinkusu shoonse waamba ayi, “Amukambe mapaka, mulishe minkiti panshi akulila ayi, ‘Maawe!’ ceebo ca bubi boonse ashintu shilensha bunya isho bene Isilaeli nshebacita. Balaakufwa kunkondo, kunsala akumwaalu.