Jelemiya 16:16 - Baibo Busansulushi Bwa Libuku Ili

¹⁶ Mwaami Lesa waamba ayi, “Sombi bulya ntootuma beshikucaya nswi baanji kuya mukubacata. Kuswawaawo ndaakutuma bapalu baanji abo beshi bakese mukubafwima mumalundu oonse, mutulundu toonse alimwi amushimfwengo shili mumyaandami.

Jelemiya 16:16 Referans Kwoze

Amosi 4:2

Mwaami Lesa Shinkusu shoonse, utoolumbila mukusalala kwakwe ayi, “Ncakwiila ciindi cilaakushikila ndyeshi mukatolwe busha kamukobetwe ndobo. Ee, womwi awomwi ulaakunooya cikwelaanishikwa kundobo tibili akuwakweelaako.

Mika 7:2

Bantu baluleme bamana mucishi cesu, taaku nabi womwi ululeme uciliimo. Uli woonse utoofwima kucaya muntunyina. Ncakwiila womwi awomwi ulisuni kucatisha mubye mubukonde.

1 Samwelo 26:20

Ono kutandeka ayi mfwite mumusena uli kulaale akubete Mwaami Lesa. Ino nceebonshi mwaami wa cishi ca Isilaeli utoosa ciyandoola ndime nenjina, anga ngumuntu utooya cifwima bakancele mutulundu.”

Matalikilo 10:9

Nimulodi wakalinga mufwimi wiindaawo kwiinda mulucafwo lwa Mwaami Lesa. Nceceeco bantu ncebacitile mwaambo wakwaamba ayi, “Lesa aakulengeshe kuba mufwimi wiindaawo mbuli Nimulodi!”

Jelemiya 25:9

ndaakwiita bantu ba kumatwa amusebenshi wangu Nebukadinesa mwaami wa bene Babiloni. Ndaakubalengesha kulwana cishi ca Juda abantu boonse bekalaamo pantu pomwi amishobo yoonse ibashingulukite. Ndaakubanyonyoola cakumaninina akubalengesha kuba cintu ceelete kuloondwa, kushibulukwa alimwi akunyonyooka kwamuyayaya. Nebo neMwaami Lesa ndaamba.

Amosi 5:19

Cilaakuba anga ngumuntu utoocica nkalamu, nakubi boobo wakumana abeya. Ono ayi enjile muŋanda yakwe akuyaamina kulubumbu, walumwa nsoka.

1 Samwelo 24:11

Ta, amubone kasani aka! Ndakatimbula kulikonko lya cakufwala canu ca peculu sombi nshikwe kumucaya. Ono munyumfwishe akwishiba kwaamba ayi nshiciteewo mulandu wakucita cilubite nabi kumwaashukila. Taaku ncindakamulubishisha, sombi mutooya cimfwima ayi muncaaye.

Isaya 2:21

Bantu balaakucicila mushimfwengo amutulundu twa myaandami akuyuba mushilindi. Balaakucita boobo ceebo cakuloonda bukali, nkusu abulemu bwa Mwaami Lesa, bushiku aakunyamuka ayi atenkaanye cishi ca panshi.

Isaya 7:19

Ashalo shilaakwisa akwikala mushinyika, mushimfwengo sha mumabwe, pacikupu coonse ca myuumfwa alimwi amumafulo oonse.

Jelemiya 4:29

Ono baakunyufwabo ciyobeyobe ca bashilumamba balwanina pamaaki abeshimata, bantu mumandabala oonse balaakucica. Bamwi balaakucicila muluundu, bamwi balaakulityaanisha pakati ka myaandami. Mandabala oonse alaakubula amuntu ukalaamo. Taaku muntu nabi womwi weshi akekalemo tubili.

Jelemiya 6:9

Mwaami Lesa Shinkusu shoonse utookwaamba ayi, “Bene Isilaeli abayobololwe cakutashiyaako nabi womwi bweenka buyapwa minyansa mumuunda. Amuboololokeemo bweenka muntu uyapa minyansa mbwaacita.”

Jelemiya 49:5

Nebo neMwaami Lesa Shinkusu shoonse ndaakumuletela shiyoosha kuswa kumbasu shoonse. Noonsebo mulaakutandaanishikwa, cakwaamba ayi taakuuwo aweshi akabunganye tubili abo beshi bakacice.

Malilo 4:18

Ncakwiila bantu bakalinga kutukonkela ciindi coonsebo. Tetwakalinga kukonsha kweenda mumikwakwa yesu. Nshiku shesu shakalinga kuya cimana. Ndushinisho lufu lwakalingabo pamulyango ceebo ciindi ca meelelesho esu cakalinga cashikila.

Osiya 10:10

Ndaakusuna, ndaakubapa mulandu. Mishobo ilaakulibungabunga mukulwana mbabo. Balaakutolwa mubusha ceebo ca shibiibi shabo shiinji.

Sefaniya 1:12

“Paciindi ico ndaakuyandoola muJelusalemu alilampi akupa mulandu kubaabo balibona kubota abo bali anga nguwaini wakalila panshi. Balo balayeeya ayi, ‘Mwaami Lesa taaku nceenga wacita, kucita cibotu nabi cibiibi.’

Malilo 4:19

Abo bantu bakalinga kututandaanya bakalinga kucabeene kwiinda bamumbankwashi mwiculu. Bakatutandaanya kuya mukwiinda mutulundu akutubelamina muluyanga.