Bene Kolose 3:10 - Baibo Busansulushi Bwa Libuku Ili

¹⁰ akwinjila mubuumi bupya. Buumi ubu Mulengi wanu utoobubotesha lyoonse mucikoshanyo cakwe kwaamba ayi mumwishibe kabotu.

Bene Kolose 3:10 Referans Kwoze

Bene Loma 12:2

Bwikaalo bwanu butabi anga mbwa bantu ba mucishi ca panshi, sombi amusuminishe Lesa kwaamba ayi asandule myoyo yanu kwiinda mukumupa miyeeyo ipya. Lyalo ndyeshi mukeshibe kuyanda kwakwe Lesa, nkokwaamba ayi shintu shibotu, shimukondelesha alimwi shitacite kampenda.

Bene Efeso 2:10

Ceebo cakuba muli Klistu, Lesa wakalengesha ayi tube mbotubete bulya, kwaamba ayi tucite milimo ibotu iyo Lesa njaakabambilabo limwi ayi twiiciite.

Bene Kolose 3:12

Mwebo muli bantu abo Lesa mbwaakasuna akumusala kwaamba ayi mube bantu bakwe. Paceebo ceeco, mulyeelete kuba beshinkumbu, bacita kabotu, baliceesha, balibombya akuba bantu bacata myoyo.

2 Bene Kolinto 5:17

Aboobo na muntu waba muli Klistu ulaba abuumi bupya. Shikulukulu shamana, nkokwaamba ayi shoonse shaba shipya.

Kulumbaisha 51:10

NobaLesa, amulenge moyo usalalite muli ndime. Mubike moyo upya ushomeka muli ndime.

Esekelo 11:19

Ndaakubapa myoyo ipya alimwi atulango tupya. Ndaakukusha myoyo yabo iyumu anga ngamabwe akubapa myoyo inyumfwila ndime.

Bene Kolose 3:14

Pashintu shoonse ishi mulyeelete kuba alusuno, lwalo ndolucatanya shintu shoonse ishi, kwaamba ayi shilulame.

Esekelo 36:26

Ndaakumupa myoyo ipya alimwi atulango tupya. Ndaakukusha myoyo yanu iyumu anga ngamabwe akumupa myoyo inyumfwila ndime.

1 Joni 2:5

Sombi uyo ukonkela maswi akwe Lesa, lusuno lwakwe Lesa luli muli nguwe cakumaninina. Mboboobo mbotwishiba ayi tuli muli nguwe cancinencine.

Bene Loma 13:14

Tatweelete kubika maano musheesho shiyanda mubili, sombi Jesu Klistu abe nsheshakulwanisha shesu.

1 Joni 2:3

Na tulakonkela milawo yakwe Lesa, anu inga tweshiba kwaamba ayi tulimwishi.

Bene Loma 8:29

Abo Lesa mbaakasalila limwi, wakababika palubasu kwaamba ayi bakabe anga nguMwanaakwe alimwi ayi Mwanaakwe uyo akabe mutaanshi pakati ka bamakwabo baanji.

Joni 17:3

Buumi butamaani ubu nkwishiba ndimwe nobaLesa bancinencine nweenkabo akwishiba Jesu Klistu uyo ngomwakatuma.

Esekelo 18:31

Amuleke shilubo shoonse nshemwakacita, mube amoyo upya alimwi atulango tupya. Ceebonshi mutooyanda kufwa mwebo nobene Isilaeli?

Ciyubululo 21:5

Mpomunyaawo ukala pacuuna ca bwaami wakaamba ayi, “Ono bulya shintu shoonse ntooshipanga cipya!” Wakandwiita alimwi ayi, “Ulembe shintu ishi mukwiinga maswi aya alyeelete kushomwa alimwi ngalushinisho.”

Bene Efeso 2:15

Lakwe wakamanisha Milawo akwiisha koonse kwa baJuda ayi pamishobo yobilo ilya, apange mushobo womwi muli nguwe akuleta luumuno munshila yeeyo.

Bene Galatiya 6:15

Mukwiinga kupalulwa nabi kutapalulwa taaku mbokubeteewo, sombi cintu cinene nkuba abuumi bupya.

2 Bene Kolinto 4:6

Ceebo Lesa wakaamba ayi, “Akube mumuni umunika kuswa mumunshinshe.” Lesa eenkabo uyo ngoolengesha mumuni kumunika mumyoyo yesu, kwaamba ayi twishibe bulemu bwakwe bumunika pameenso akwe Klistu.

2 Bene Kolinto 3:18

Swebo soonse sotucite shiwa shitafweketwe shisani, tuli anga nshilola shitondesha bulemu buswa kuMwaami. Tutoosandululwa kuba mbuli nguwe, kuswa mubulemu bumwi kuya mubuumbi bwiindaawo, kwiinda muMwaami uli nguMushimu.

Bene Loma 13:12

Ciindi ca mashiku camana butooyanda kuca. Ono atucileeke kucita shamumunshinshe, sombi tubwese shakulwanisha sha mumumuni.

Bene Galatiya 3:27

Paceebo ceeco, mwebo nomwakabombekwa akucatana pantu pomwi aKlistu, muli anga mulifwete buumi bwakwe Klistu.

Isaya 52:1

Amubuke, Amubuke! Amubuke nobamundabala inene ya Siyoni! Amube ankusu mbuli kataanshi. Amufwale shakufwala shanu sha bulemu, nobamundabala ya Jelusalemu, ndabala inene isalalite. Balya bakunsengwe batapalwitwe teshi bakenjilewo tubili mundabala yanu.

Bene Ebulu 6:6

Lyalo balo bakacileka kushoma! Inga tatubasanduliiwo kuswa kushibiibi shabo alimwi mukwiinga mukucileka kushoma, cilibo anga batoopopa Mwanaakwe Lesa pamucilingano alimwi akumulensha nsoni pameenso a bantu.

Isaya 59:17

Mpeeke wakafwala bululami anga ncakufwala ca pacaamba ca nkondo Kumutwi wakafwalaako lupulusho anga ncimpoompo. Kuyanda kuboosha cishole kubalwani bakwe akwalo wakakufwala akufwala moyo mpwampwa anga ncakufwala cakwe ca peculu.

Jobo 29:14

Ndakalinga kucita shintu shiluleme ciindi coonse. Ndushinisho milimo yangu yoonse yakalinga ibotu.

Matalikilo 5:1

Ulu ndolunyungu lwakwe Adamu. Lesa ndyaakalenga Adamu, wakamulenga mucikoshanyo cakwe.

Bene Loma 6:4

Aboobo kwiinda mukubombekwa kwesu, cili anga twakafwa akufukilwa pantu pomwi anguwe kwaamba ayi bweenka Jesu Klistu mbwaakabushikwa kuswa kubafu kwiinda mubulemu bwa nkusu sha baIshi, aswebo twikale mubuumi bupya.

2 Bene Kolinto 4:16

Nceceeco ncetutabooleli pesule. Nakubi kwaamba ayi mibili yesu itooya cicembela, sombi Mwaami utooya citufushishako nkusu muMushimu bushiku abushiku.

Filimoni 1:6

Ndapaila kwaamba ayi kwiinda mukwaamba shalushomo lwako, bantu beshibe abuumbi shibotu shoonse nshetucite muli Klistu.