Bene Efeso 5:3 - Baibo Busansulushi Bwa Libuku Ili

³ Ceebo muli bana bakwe Lesa, bufuule, kucita shintu shitaluleme alimwi akukumbwa camunyono shintu sha bamwi bantu, tasheelete kwaambwa pakati kanu, sobwe.

Bene Efeso 5:3 Referans Kwoze

Bene Kolose 3:5

Amucaye lunkumbwa loonse lwa mucishi ca panshi ulo luli muli ndimwe, mbuli bufuule, kucita shintu shitaluleme, lunkumbwa lubiibi, miyeeyo ibiibi alimwi abupambi. Mukwiinga kupamba akwalo kulikoshenye akulambila shibumbwabumbwa.

Bene Efeso 5:5

Mulyeelete kwishiba cancinencine ayi taakuuwo mufuule, uyo ucita shitaluleme, nabi shikukumbwa camunyono shintu sha bamwi (mukwiinga lunkumbwa lwa munyono lulaba ngolesa wabo) weshi akatambuleko Bweene bwakwe Klistu alimwi aLesa.

1 Bene Tesalonika 4:3

Lesa ncaasuni ncakwaamba ayi mube abuumi busalalite, nkokwaamba ayi mulyeelete kusoonoka kubufuule bwa mushobo uli woonse.

1 Bene Kolinto 6:18

Bufuule kamubutalamuka. Shibiibi shimwi shoonse shicita muntu tashibishi mubili wakwe, sombi cibiibi ca bufuule cilabisha mubili wakwe mwiine.

1 Bene Tesalonika 4:7

Mukwiinga Lesa taakwe kutwiitila bufuule, sombi kuba abuumi busalalite.

1 Bene Kolinto 6:13

Aumwi muntu inga waamba ayi, “Cakulya nca lifumo, alyalo lifumo ndya cakulya.” Nakubi boobo Lesa ulaakunyonyoola shoonse shobilo. Mubili teshi wakucitisha bufuule napaceyi, sombi ngwakusebensesha mulimo wa Mwaami Jesu alimwi Mwaami ulaubambila shiyandika.

Bene Efeso 5:12

Cilalensha nsoni akwaamba shintu shicita bantu batanyumfwili Lesa mubushishi.

Mateyo 15:19

Mukwiinga mumoyo momuswa miyeeyo ibiibi, ya bucayi, bulale, bufuule, bwiipi, bukamboni bwakubeca alimwi abufuyishi.

Ciyubululo 2:21

Ndakamupa ciindi cakwaamba ayi asanduke kuswa kushibiibi shakwe, sombi taasuni kucileka bufuule bwakwe.

1 Bene Kolinto 10:8

Tutaciti bufuule bweenka bwakacita bamwi pakati kabo. Balo ndibakacita boobo, bantu bali shuulu makumi obilo ashotatwe bakafwa bushiku bomwi.

Ciyubululo 22:15

Sombi pansengwe lya ndabala inene iyi mpopali bakabwa abaloshi, bafuule abacayi, abo balambila shibumbwabumbwa alimwi ababeshi mumyaambo amicito.

Ciyubululo 21:8

Sombi boowa, batashomi, basuni kucita shibiibi, bacayi, bafuule, baloshi, balambila shibumbwabumbwa alimwi ababeshi boonse, musena wabo ndweenge lwa mulilo alimwi asalufa. Ulu ndolufu lwabili.”

Ciyubululo 2:14

“ ‘Sombi ndicite matongooshi amwi pali ndiwe ceebo mulikoto lyanu muli bamwi bakonkela kwiisha kwakwe Balamu. Lakwe wakeeisha Balaki bwakulengesha bene Isilaeli kubisha kwiinda mukubanyengelela ayi balye shakulya shakabengwa kushibumbwabumbwa alimwi akucita bufuule.

1 Bene Kolinto 5:1

Ono ntoonyumfwa kwaamba ayi kuli cikololo ciyoosha citoocitika pakati kanu ico bakunsengwe ncebatakoonshi kucita. Citokwaambwa ayi musankwa utokoona abanyina bakamucanaamo.

Esekelo 33:31

Bantu bangu balesa kuli ndiwe bweenka mbobacita lyoonse akwikala kunembo lyako ayi bakutike maswi ako, sombi tabaciti nshoobaambila, sobwe. Balaamba ayi balashomeka kuli ndime, sombi myoyo yabo ilibo mukubilila munshila italuleme.

Kulonga 20:17

“Utakumbwi ŋanda ya shikamukobonyoko camunyono. Utakumbwi mukamwiine, musha wakwe musankwa nabi mwanakashi, ŋombe shakwe, mbongolo shakwe nabi shintu shakwe shimwi.”

Ciyubululo 9:21

Peculu lya waawo tabakwe kusanduka kuswa kubucayi, buloshi, bufuule nabi bwiipi.

2 Pita 2:3

Ceebo cakusuna bubile, balaakusebensesha makani akubeca. Mulandu wabo utoobalindilila kuswabo kale kale alimwi kunyonyoolwa kwabo kulibambitwe kale.

Bene Ebulu 12:16

Mulyeelete kucenjela kwaamba ayi kutabi mufuule nabi womwi mulikoto lyanu, nabi muntu ucobola Lesa mbuli Esau, uyo wakoolisha bunene bwakwe ceebo ca cakulya ca linkanda lyomwibo.

2 Bene Kolinto 12:21

Ntooloonda kwaamba ayi ndaakwisaako alimwi, Lesa inga wanengesha kunyumfwa nsoni pameenso anu mukwiinga ndaakutalika kulila ceebo ca baabo boonse bakabisha kale kale, batana kusanduka kuswa kushibiibi shabo sha lunkumbwa, cikololo ashimwi shoonse shakutalilemeka.

Taitasi 2:3

Mbweeke ubo banakashi bamanene kobaambila ayi banookala buumi busalalite. Tabeelete kuba bafuyishi nabi bacakolwa, sombi balyeelete kunokwiisha shintu shibotu.

2 Timoti 3:2

Ceebo bantu balaakuba beshikulisuna, beshikuyandisha buboni, beshikulilumbaisha, beshikulisumpula, beshimatushi, batanyumfwili bashali, bataluumbi, batasalalite,

Milimo ya Batumwi 15:20

Sombi tulyeeletebo kubalembela nkalata yakubalwiita ayi tabeelete kulya shakulya shitasalalite ceebo nshipo shakapekwa kushibumbwabumbwa, kutacita cikololo, kutalya nyama shakashinwa alimwi abulowa.

Kulonga 18:21

Sombi kwiilikaawo, ulyeelete kusala basankwa bamwi beenga basebensa mulimo wa butanjilili. Bamwi balyeelete kuba batanjilili ba bantu bali cuulu, bamwi mwaanda, bamwi makumi osanwe alimwi abamwi likumi. Bantu abo mbweshi ukasaale balyeelete kuba bantu balemeka Lesa, bashomeka alimwi batakoonshi kutambula mashinka kanwa.

2 Pita 2:14

Tabalangibo mwanakashi cakutamukumbwa, balisunibo kucita bufuule lyoonse. Balalengesha bateshi bayumu mulushomo kubisha. Bakeshibila kuyandishisha buboni. Lesa ulaakubapa mulandu!

2 Pita 2:10

bunene bunene abo bakonkela lunkumbwa lwa mibili yabo akusuula bulemu ankusu shakwe Lesa. Bafundishi babeshi aba tabaloondi balalisumpula alimwi tabaloondiiwo abalemekwa ba kwiculu, sombi balabacobola.

1 Pita 5:2

Amweembele litanga lyakwe Lesa ilyo ndyaakamupa kuteshi cakukakatishikwa, sombi cakukondwa kweelana akuyanda kwakwe Lesa. Mutasebensi mulimo wanu ceebo cakulangoolabo maali, sombi musebense amoyo woonse cakulibenga.

Taitasi 1:11

Aba balyeelete kukashikwa mukwiinga batoonyonyonganya bamumaanda boonse mbobapolela kwiinda mukwiisha shintu isho nshebateelete. Balacita boobo kwaamba ayi babilile mpawo.

Taitasi 1:7

Ono ceebo mutanjilili wa coonde utokweendelesha mulimo wakwe Lesa, ulyeelete kubula kampenda. Taaelete kuba muntu ulyuuma mucaamba, ufwambaana kukalala, cakolwa, mukali nabi usunishi buboni.

1 Timoti 3:3

Taaelete kuba cakolwa, nabi mukali, sombi mubombu, shiluumuno, utasunishi maali.

1 Timoti 2:10

Sombi baliboteshe amilimo ibotu yeelete banakashi balyaamba ayi balalambila Lesa.

Bene Filipi 1:27

Ono cinene ncakwaamba ayi bwikaalo bwanu bulyeelete kweendelana aMakani Abotu ayo aamba shakwe Klistu. Nabi ndesa mukumubona nabi ndabuula kwisa, ndyeelete kunyumfwa ayi mulimfwibo cakutatenkaana camuyeeyo womwi alimwi ayi mulacafwana kwiimikanina lushomo ndomucite muMakani Abotu.

Bene Loma 16:2

Amumutambule mbuli muKlistunyinaanu bweenka mbobeelete kutambulana bantu bashoma muli Lesa. Amumucaafwe mushintu shoonse shiyandika mukwiinga lakwe wakalinga kucafwa bantu baanji kubikaawo anebo.

Bene Loma 6:13

Mutasuminishi cipansha ca mubili wanu nabi comwi kububi ayi cibe citabatisho ca shibiibi, sombi amulyaabe kuli Lesa mbuli bantu bakalinga kufwite, sombi Lesa wabapa buumi. Mulyeelete kulyaaba kuli Lesa kwaamba ayi amusebenseshe mukucita shiluleme.

Bene Loma 1:29

Myoyo yabo iliswitebo shibiibi sha mishobo yoonse mbuli bubi, balisunibo shoonse kashili shinebo, balacitilana shintu shibiibi, munyono, bucayi, inkondo, bubeshi amiyeeyo ibiibi kubabyaabo alimwi mbafuishi.

Milimo ya Batumwi 20:33

Nshina kuyandawo kale kubwesa maali nabi cakufwala ca muntu umwi kwiinda mulunkumbwa.

Luka 16:14

BaFalisi ndibakanyumfwa makani aya, bakatalika kushibuluka Jesu mukwiinga balo bakalinga kusunishi maali.

Mika 2:2

Ncakwiila na balisuni myuunda baleebwesa, na balisuni maanda balaabwesa. Balabwesa ŋanda ya muntu mukumwiinda kumaano akubwesa buboni bwakwe mbwaakapyana munshila njemunya.

Jelemiya 22:17

Sombi mwebo meenso anu amyoyo yanu ilibo kumpindu yakucana kwiinda mubwiipi, kutila bulowa bwa bantu batacite mulandu, alimwi amukulyatilila akupensha bantu.”

Jelemiya 8:10

Paceebo ceeco, bamakaabo ndaakubapa kubasankwa bamwi, ayalo myuunda yabo kubantu bamwi. Kutalikilabo kumuntubo kushika kubalemekwa, boonse beenka basuni kubilila mubwiipi. Balaluki abapailishi boonse abalo mbeshikubeca.

Jelemiya 6:13

Kuswabo kubantu bataaku ambobabete kushika akubaabo balemekwa, boonse balicitebo miyeeyo yabumbilileewo. Balaluki abapailishi abalo ngumushobo womwibo, boonse balacenjeeka bantu.

Tushimpi 28:16

Muleli utacite maano ulalela bantu calunkutwe, sombi uyo upatite bubile bwakucanina munshila shibiibi ulaakukala buumi bulaamfu.

Kulumbaisha 119:36

Amwiishe moyo wangu kusuna kwiisha kwanu. Ee, amunjiishe kusuna kwiisha kwanu kuteshi bubile.

Kulumbaisha 10:3

Ncakwiila bamucita shibi balalisumpula mulunkumbwa lwa myoyo yabo ibiibi. Balalumbaisha bantu balyabi, sombi balasebaanya liina lya Mwaami Lesa.

1 Samwelo 8:3

Ono tebakalinga kweensha mulimo uyo kweelana ambobakalinga kubona baishiwabo kabacita. Balo bakalinga kusunibo kucana maali. Aboobo bakalinga kutambula makulo akoombolosha cakunyengelela.

Joshuwa 7:21

pashintu isho nshetwakabwesa, ndakabonawo cakufwala ca peculu cibotu abuumbi ca kuBabiloni, makilogilamu obilo a silifa alimwi acipimpita ca golodi cakalinga kulema musa wa kilogilamu. Ndakakumbwa shintu isho akushibwesa. Anu ndakashifukila mutente yangu, silifa njeili panshi peene.”

Shakubelenga 25:1

Ono bene Isilaeli ndibakalinga kuShitimu, basankwa bakatalika kukumana abanakashi bene Moabu abo bakalingaako.

Kulonga 23:13

“Kamukonkela shintu shoonse nebo neMwaami Lesa nshendamulwiita. Mutapaili balesa bamwi, tamweelete kubanda nabibo meena abo.

1 Timoti 6:10

Ceebo kusuna maali ngomatalikilo a bubi boonse. Bamwi bakalinga kwaasuni abuumbi, aboobo beengaila kuswa kulushomo akulinjisha mubuumba bunene.

Luka 12:15

Lyalo Jesu wakaambila bantu abo ayi, “Amucenjele alimwi mulibaambe ayi mutabi bantu basunishi bubile. Ceebo buumi bwa muntu tabubete mukufula kwa buboni mbwaacite.”

Bene Lefi 15:18

Na musankwa amwanakashi bakumana, boonse bobilo balyeelete kusamba. Nakubi boobo teshi bakanoosalalite kushikila macolesha.