रोमि 2:8 - बान्‍तावा राई

⁸ मेन आप्‍पि खाङ्‌मान्‍चिन मिन्‍मा म़मुयाङ्‍ओचि, अ़छ़ङ य़ङ मान्‍काङ्‌कादा खोन्‍कि अ़अ़त्‍पादा काकोन्‍चिएदा अ़चुच़ऱपा खोन्‍कि अ़चुमाइसुङ छुक।

रोमि 2:8 Referans Kwoze

खाङ्‌मुमा 16:19

तोक्‍पो सहरा सुम्‌का धाङ लिसा, खोन्‍कि हेन्‍कोप्‌चिदाओ झारा सहराचि म़भुङ्‌साखारा। तोक्‍पो सहरा बेबिलोन्‌आ मुओ हेवाचि निनाम्‍हाङ्‌आ अ़मित्‍ता, खोन्‍कि खोक्‍कोसोओ तोक्‍पो अ़चुमाइसुङ मो सहराएदा ता।

१ पत्रुस 4:17

देकिनालो छ़ङ्‌छेन्‍मा निनाम्‍हाङ्‌ओ अ़चुम़नाचिदाङ्‌का पुङ्‌मा ग़रि ताचिआयुङ्‌सा। खोन्‍कि ओ छ़ङ्‌छेन्‍मा आन्‍कान्‌एदाङ्‌काङा पुङ्‌नालो निनाम्‍हाङ्‌ओ अ़चुनुय़ङ्‌खान्‌दा लोमावा मान्‍च़कादाचिओ अ़चुछ़ङ्‌छेन्‍मा देत्‍नि लि?

२ थेसलोनिकि 1:8

निनाम्‍हाङ मान्‍सिन्‍कादाचि खोन्‍कि आन्‍हाङ्‌पा येसु ख्रिस्‍तओ अ़चुनुय़ङ्‌खान मान्‍लोक्‍कादाचि खोक्‍कोसाआ दन्‍दा म़प़चि।

खाङ्‌मुमा 14:10

निनाम्‍हाङ्‌आ अ़चुच़ऱपाओ अ़न्‍नुनु छोयाङ्‌ओ अङ्‌गुरा माङ्‌वाछाङ मोचि दुङ्‌म़मेत्‍तुचि। मोसोओ अ़तुप्‌य़ङ मोचि म़सेङ्‌याङ्‌ओ निनाम्‍हाङ काफाचि खोन्‍कि थुबाछाओ अ़चुबुदा मि खोन्‍कि गन्‍ध़क्‌दा तोक्‍पो दुखा म़प़चि।

हिब्रु 11:8

साकोङ्‌छ़ङ्‌लाम्‍पा अब्राहाम लोमावा चुवा, खोन्‍कि खारानि लोवाओदात्‍नि खारा। मो युङ्‌खा आदेङ खोसाआ पाङ्‌यिवा तोक्‍मा दोराङाओ। खादात्‍नि खाराङाओ मो मान्‍सिन्‍दोङुनुछाङ खो खारा।

हिब्रु 10:27

मेन मोचिओ निम्‍पाङ क़माकात्‍तुओ निनाम्‍हाङ्‌ओ अ़चुछ़ङ्‌छेन्‍मा खोन्‍कि ङेङ्‌चि च़ऱप्‍पाओ मिआ राङ्‌माखान्‍मा ओन्‍ङा याक।

हिब्रु 5:9

मो दुखा अ़आङ्‌ताचिआकि अ़चुलोमाय़ङ काकाङ्‌चि झारासोओ निम्‍पाङ खोक्‍को अ़धुन्‌ओ लेन्‍खालाम म़लिसा।

तितस 3:9

मेन अ़काचि मात्‍द़ङ्‌ओ दुम्‍छ़न्‍मा, सुन्‍तुम्‌चिओ ओन्‍दादाभान्‍को छाप्‍माय़ङ अ़चुऩङ्‌चि खोन्‍कि मोसाओ य़ङ्‌हुप्‌ओ अ़तुक्‌वादा खिमाम्‍हुमा छिरानुम। मोचि सोज्‍जेओ खोन्‍कि अ़काचि मात्‍द़ङ्‌ओ य़ङ्‌चि ओ।

१ कोरिन्‍थि 11:16

मेन साङ ओसोओ अ़तुक्‌वादा दुम्‍छ़न्‍मानि मिन्‌याङ्‌नालो आन्‍कान्‍काएदा नि च़माथाङ्‌मा मात्‍द़ङ, ना निनाम्‍हाङ्‌ओ अ़चुसाम्‍भुङ्‌चिएदाङा युङ्‌याङ।

रोमि 15:18

अ़ङ्‌का खालुसुङ्‌ओ य़ङ्‌चि खोन्‍कि मुङ्‌ओ काचिचिलाम्‍पा देत्‍नि ख्रिस्‍तआ निरावाचि लोमावा काच़चि म़मुयुङ्‌सुचि, मो य़ङ्‌चिदाङ्‌का दित्‍छाङ चेप्‍मा अ़ङ्‌का राक अ़मुऩङ।

रोमि 10:16

मेन झारा इस्राएलिचिआ नुय़ङ्‌खान मान्‍लोक्‌अ़दा, देकिनालो निनाम्‍हाङ्‌य़ङ खाकालु यसैया य़ङ्‌याङ, “हाङ्‌पो, आन्‍कान्‍काएदाङ्‌का अ़एनाओ य़ङ साङ्‌आ साकोङ्‌छ़ङ मुयुङ्‌सु कि?”

रोमि 9:22

निनाम्‍हाङ्‌आ अ़चुच़ऱपा खोन्‍कि अ़चुसावा खाङ्‌मुमा म़स़नालो खोक्‍कोसाआ खाङ्‌मुमा अ़ऱ। मेन खाक्‍कोचि दन्‍दा प़मा खान्‍तुचिओ म़मुयाङ, दि खोक्‍को मो म़नाचिओ निम्‍पाङ अ़न्‍नुनु काहुङ ऩमुनिनिन?

रोमि 6:17

मेन निनाम्‍हाङ आलाङ्‌ने, देकिनालो खानानिन अ़क्‍दु हेवाओ अ़हारुक त़मुन्‌येन, हान खाक्‍को अ़छ़ङ चिन्‍माय़ङ खानानिन्‌आ त़तोक्‍तुम, मो झारा साकोङ्‌वाआ त़लोउम्‌युङ्‌सुम।

रोमि 1:18

निनाम्‍हाङ्‌ओ अ़चुच़ऱपा झारा म़नाचिओ अ़चुहेवा खोन्‍कि अ़चुओ अ़अ़त्‍पाओ अ़देङ्‌सालाप्‍पादा निनाम्‍मादुङ्‌का खाङ्‌मुसायुङ्‌सा। मो अ़चुओ अ़अ़त्‍पा काचिआ अ़छ़ङ तिमुयुङ्‌सु।

१ पत्रुस 3:1

मोवात्‍निङा खिम्‍हाङ्‌माचि ओ, खानानिन्‌छाङ आम्‍नुओ खिम्‍हाङ्‌पाचिओ अ़चुक़म्‍मादा युङानिन। खोन्‍नालो मोचि निनाम्‍हाङ्‌ओ अ़चुय़ङ्‌दा साकोङ्‌छ़ङ ऩमुनिन्‌नुछाङ, आम्‍नुओ च़माथाङ्‌माआ मोचि देत्‍छाङ मान्‍लोमाङ फान्‍मा त़ऱम्‍च़म।

२ कोरिन्‍थि 12:20

देकिनालो अ़ङ्‌का ताङाहिदा अ़ङ्‌का मिन्‍ङावात्‍नि खानानिन अ़धित्‍नान्‍निमिन हे, खोन्‍कि खानानिन्‌आछाङ त़मिनिन्‌येन्‌वा अ़ङ्‌का त़धित्‍नाङ्‌ऩम़ङ हे निकिना अ़ङ्‌का क़ङाङा। आम्‍नुओ रादा खिमा, ऩङ्‌च़, माइसुङ, फेक्‍मान्‍चिन, सुङ्‌मा, दुम्‍लुमा, ऱक्‍भाक खोन्‍कि ङेन लि हे निकिना अ़ङ्‌क़मा कात्‌याङ।

गलाति 5:20

सेम्‍पोक ब़क्‍मा, म़क्‍फेङ, ङेङ, खिमा, ऩङ्‌च़, च़ऱपा, आप्‍पि नुलोक कामित्‍नान्‍चिन, फेक्‍मा, रुहुप-रुहुप लिमा,

फिलिप्‍पि 1:17

मेन होरा कामुचिआ सेङ्‌याङ्‌ओ मिन्‍माआ माआङ, अ़ङ्‌का छेक्‍ङाङाओदा अ़चाअ़त्‍मा तेप्‍मा प़मानि म़मिन्‌कि अ़अ़त्‍पा मिन्‍माआ ख्रिस्‍त खाअ़लु।

फिलिप्‍पि 2:3

देम्‍खाछाङ आप्‍पि खानानिन खाङ्‌मान्‍चिन माङ्‌लो तोक्‍पो लिमाओ निम्‍पाङ देत्‍छाङ माच़दानिन, मेन सिम्‍नान्‍चिन्‍सा निचि खानानिन आप्‍पिदाङ्‌का अ़धिवा मित्‍तानुम्‍च़म।

याकुब 3:14

मेन आम्‍नुओ साकोङ्‌वादा चात्‍लो ऩङ्‌च़ खोन्‍कि आप्‍पि ओन्‍ङा तोक्‍मामिन्‍मा याक्‌याङ्‌नालो आम्‍नुओ खारुदा ऱफोक्‌वा मान्‍मुदानिन, खोन्‍कि अ़छ़ङ य़ङ सोज्‍जेओ मान्‍मुदानुम।

याकुब 3:16

खादा ऩङ्‌च़ खोन्‍कि आप्‍पि ओन्‍ङा तोक्‍मामिन्‍मा याक, मोदा म़पुप्‍खात, खोन्‍कि झारा अ़अ़त्‍पा काचि लि।