22 अ़ङ्का मान्ताङाओ खोन्कि मोचि खामान्एत्ङाच़ङ्ओ दे, मोचि हेवाओ लाहि मान्पाक्चिओ, मेन हान ना अ़चुओ हेवाओ निम्पाङ मोचिएदा दित्छाङ अ़ऩङ्मुखा मात्द़ङ।
येसुआ मोचि म़लासुलोचि, “खानानिन दोप्म़क्चि ओनालो हेवाओ लाहिदा मान्छुक्त़दान्ओ, मेन खानानिन ‘आन्कान्का खा-खान्का’नि त़य़ङिन, खोन्ओसा आम्नुओ हेवा युङ्याक।”
खोन्ओसा साङ नुलोक च़मा लेकिछाङ अ़च़निन, खो हेवा मु।
म़नाचिआ निनाम्हाङ मान्सिन्माङ बुया अ़मुवाओ काचिदा अ़चुम़क अ़सिप्ता। मेन हान खोक्कोसाआ झारादात्निओ झारा म़नाचि अ़चुहेवादाङ्का म़लानेनि म़य़ङ्याङ।
निनाम्हाङ्ओ अ़धुन्ओ अ़चुसावा खोन्कि अ़चुच़माथाङ्मा अ़खान्मिन। मेन खोक्कोसाआ निनाम्मा हेन्खामा मुन्मा पुङ्माय़ङ्दाङ्काङा खोक्कोसाआ अ़मुयाओ सामाचिलाम्पा निनाम्हाङ्आ खाङ्अ़मुसायुङ्सा। खोन्ओसा म़नाचिआ निनाम्हाङ ऩसिन्तुन्ओदा देम्खाछाङ ऩलेत्तुन्चिन।
अ़ङ्का ऩङाकाछित खोन्कि अ़ङ्य़ङ मान्लोक्कादाओ निम्पाङ अ़क्छा छ़ङ्काछेन म़युङ्याङ। खाक्को य़ङ अ़ङ्का चेउङ मो य़ङ्आङा आदेङ्ओ लेन्दा मोसोओ अ़छ़ङ छेन्तु।
लेत्वाचिवात्नि युङानिन। खोन्नुछाङ लत्वाओ अ़ऩङ त़मुम्कि अ़अ़त्पा काचि मान्मुदानिन, मेन निनाम्हाङ्ओ अ़चुहारुक लिसानिन।
खोन्ओसा नि छ़ङ्काछेन म़ना, खाना साङ्नुछाङ, अ़ऩङ मुमा त़तोक्नान, देकिनालो खाना नि छ़ङ्त़छेन्तुहिदा दिदा खाना छ़ङ्त़छेन्तु, मो य़ङ्दा खाना छ़ङ्ऩछेन, देकिनालो खाना छ़ङ्काछेन्छाङ मो काचि त़मु।
मो हारुक्ओ अ़हाङ्पा अ़हारुक्आ अ़मित्तुन्योन्ओ लेन, खोन्कि अ़सिन्तुन्योन्ओ ग़रिदा तादि खोन्कि मो चाअ़त्लो दन्दा प़, खोन्कि साकोङ्छ़ङ मान्मुकादाचि युङ्खादा खो अ़युङ।
येसुआ अ़लासालोवा, “खानानिन्आ धानाङ्का मान्तोक्त़दोम्ओदे अ़ङ्काएदा आम्नुओ पाङ दित्छाङ मान्लिओ। खोन्ओसा अ़ङ्का आम्नुओ छुक्दा कापाक प़ तोक्पो हेवामि ओ।”
साङ्आ अ़ङ्का ऩङाअ़छित्ङा, मोसाआ अ़ङ्पापाछाङ ऩङाछिरु।
साङ्आछाङ मान्मुयुक्तुओ म़दोम्दाओ काचिचि अ़ङ्का मोचिओ अ़चुरादा मान्मुङाओ दे, मोचि हेवाओ लाहि मान्पाक्चिओ। मेन हान मोचिआ ओ म़दोम्दाओ काचिचि अ़खायुङ्साकिछाङ मोचिआ अ़ङ्का खोन्कि अ़ङ्पापा ह़वाङ्माङ ऩङाऩछिरायुङ्साच्या।
हेवाओ अ़तुक्वादा, हेन्खामादाओ म़नाचि अ़ङ्काएदा साकोङ्छ़ङ मान्मुचि। खोन्कि यायोक काप़आ मोवात्नि च़मा ना हेवा ओ निकिना खाङ्म़मेत्तुचि।