40 निनाम्हाङ्आ आन्को निम्पाङ च़लोक अ़नुवाक मित्चिऩङ अ़मुवा। अ़क्धुवा आन्कान खोन्कि मोचि अ़क्नि अ़च़क़ल़क म़मुनि खोक्कोसोओ अ़चुमित्चिऩङ मुवाङा।
खोन्किना मो झारा म़सेरुचिओचि अ़क्तातात ओमाङाओ तित म़प़चि, खोन्कि म़लोचि, “मोदा ब़द्धे खानानिन्वाङा निनाम्हाङ काब़क साकोङ्छ़ङ कामुचि म़युङ्याङ, खानानिन ऩसेरिन्वाङा म़नाचिआ मोचि म़सेरुचि। मोन्ग़रितारि खानानिन थुत्मेत्लो सावा तोम्सानिन।”
मेन येसुआ अ़तोक्ताओ ब़क्मा काचि नि तोक्पो काब़क्चिदाङ्का च़लोक तोक्पो मुयाङ। मोवात्निङा निनाम्हाङ खोन्कि खोक्कोसोओ अ़चुम़नाचिएदा येसुआ तुम्माय़ङ अ़ऩङ्वा य़ङ्छ़ङ अ़मुवाओ बुया मुमाय़ङ य़ङ्छ़ङ्दाङ्का तोक्पो मुयाङ। देकिनालो ओ य़ङ्छ़ङ्चिदा अ़नुवाक हिप्माय़ङ्चि म़याक्याङ।
देकिनालो मोसाओ अ़य़ङ्हुप्आ दित्छाङ मान्तालादो। मेन मोदाङ्का च़लोक तामित्मा आन्कान्एदा याक्याङ खोन्कि ओलाम्पा आन्कान निनाम्हाङ्ओ अ़चुच़क्दा तामालामा ऱन।
मोवात्नि निनाम्मादुओ अ़नुछ्याओ य़ङ्चिओ अ़मात्ऩङ सायाम्पोक हेन्खोक्वालाम्पा सेङ्मा दोराङानालो, निनाम्मादुओ अ़नुछ्याओ य़ङ्चि सेङ्मा च़लोक अ़नुवाक हेन्खोक्वा दोरा।
मो दुखा अ़आङ्ताचिआकि अ़चुलोमाय़ङ काकाङ्चि झारासोओ निम्पाङ खोक्को अ़धुन्ओ लेन्खालाम म़लिसा।
ओ किरेआ येसुआ निनाम्हाङ्एनान अ़नुवाक य़ङ्छ़ङ आन्कान अ़छ़ङ म़मेत्प़।
मेन मोचिआ अ़क्तात च़लोक अ़नुवाक हेन्कोप निनाम्मादुओ खिम अ़लामाङा। खोन्ओसा निनाम्हाङ मोचिओ अ़चुनिनाम्हाङ्नि लोलुमा अ़चुलेजो अ़कात्निन। खोन्कि खोक्कोसाआ मोचिओ निकिना अ़क्तात सहरा म़चुम्सुप़युङ्सुचि।