२ कोरिन्‍थि 3:18 - बान्‍तावा राई

¹⁸ खोन्‍कि आन्‍कान झारा मुन्‍जेत लाराखाइसाओ ङाइवाचिआ हाङ्‌पाओ अ़चुसाम खाङ्‌मुसुम। खोन्‍कि आन्‍कान खोक्‍कोसोओ अ़चुसाम्‌दा च़लोक्‌वा फान्‌याङ्‌सा खारिन। ओ हाङ्‌पाएदाङ्‌का ता, खोक्‍को सेङ्‌लावा ओ।

२ कोरिन्‍थि 3:18 Referans Kwoze

२ कोरिन्‍थि 4:6

निनाम्‍हाङ्‌आ “कुन्‍चियाधेक्‍धेक्‌ओदा साम लेत्‍ने!”नि म़य़ङा। मो निनाम्‍हाङ्‌आङा येसु ख्रिस्‍तओ अ़चुङाइवादा निनाम्‍हाङ्‌ओ अ़चुसाम आन्‍कान सिन्‍मा ऱम्‍ने निकिना आन्‍साकोङ्‌वादा खोक्‍कोसोओ अ़चुसाम अ़लेइसायुङ्‌सा।

रोमि 12:2

ओ हेन्‍खामादाओ अ़च़माथाङ्‌माचिवा मान्‍च़दानिन, मेन आम्‍नुओ मिन्‍मादा अ़ऩङ्‌वा लिसानिन्‌कि झारा फान्‍तानिन्‍चिन। खोन्‍किना निनाम्‍हाङ्‌ओ अ़नुवाक, अ़चुऩङानुओ खोन्‍कि अ़छ़ङ अ़चुमिन्‍मा दि ओ, मो खानानिन्‌आ सिन्‍मा त़ऱम।

२ कोरिन्‍थि 4:4

ओ हेन्‍खामादाओ माङ्‌आ साकोङ्‌छ़ङ मान्‍मुकादाचिओ अ़चुमिन्‍माचि दोप्‍म़क म़मेत्‍तुप़युङ्‌सुचिओसा ख्रिस्‍तओ साम्‍स़रिओ अ़चुनुय़ङ्‌खान खाङ्‌मादाङ्‌का म़छेक्‍तुचि। ख्रिस्‍त निनाम्‍हाङ्‌ओ अ़चुकात्‍मावा म़कात्‌याङ।

१ कोरिन्‍थि 13:12

ओन्‍ग़रि आन्‍कान दर्पनादावा थेम्‍बुवारिरि खाम, मेन मोन्‍ग़रि छेङ्‌छेङ्‌छेङ्‌वा खाङ्‌मुन। ओन्‍ग़रि अ़ङ्‌का अ़क्‍चिलोक ओन्‍ङा तुप्‍तुङ, देत्‍नि निनाम्‍हाङ्‌आ अ़ङ्‌का नुलोक ऩसिन्‍ताङ्‌युङ्‌साङ मोवात्‍नि मोन्‍ग़रि अ़ङ्‌का झारा तुप्‍तुङ।

कलस्‍सि 3:10

खोन्‍कि ओन्‍ग़रि अ़ऩङ्‌वा ह़ङ्‌म़ङ त़लोउम्‌युङ्‌सुम। खानानिन च़लोक आम्‍नुओ कामुन्‍पाओ अ़चुकात्‍मावा लियाङ्‌सा त़खारिन्‌येन, खोन्‍कि खोक्‍को नुलोक त़तुप्‍तुम।

रोमि 8:29

साङ-साङ खोक्‍कोसाआ बुयाङा म़सिन्‍तुयुङ्‌सुचि, निनाम्‍हाङ्‌आ मोचि आप्‍पिओ अ़चुछा ख्रिस्‍तवात्‍नि मुमा निम्‍पाङ म़छेन्‍तुचि। खोक्‍कोसाआ ओ अ़मुवा, खोन्‌ओसा ब़द्‍धे ब़ब़, नाना खोन्‍कि निछाचिएदा ख्रिस्‍त झारादाङ्‌का ब़ब़ म़लिने।

१ कोरिन्‍थि 15:49

आन्‍कान देत्‍नि बाखादाओ म़नाओ अ़कात्‍मा लोउम्‌युङ्‌सुम, मोवात्‍निङा निनाम्‍मादुङ्‌काओ म़नाओ अ़कात्‍मा आन्‍कान्‌छाङ लोउम।

२ कोरिन्‍थि 5:17

देकिनालो साङ ख्रिस्‍तदा युङ्‌याङ, खो अ़ऩङ्‌वा मुन्‍माय़ङ ओ। बुयाओ खाराचिआयुङ्‌सा, खानुम, अ़ऩङ्‌वा तायुङ्‌सा।

युहन्‍ना 1:14

मो य़ङ पोक लिसाकि आन्‍रादा म़याआ। युहन्‍नाआ खोक्‍कोसोओ अ़चुतुक्‌वादा सालुम्‍स़ङ प़याङ्‌सा म़लोचि, “साङ्‌कोओ अ़चुतुक्‌वादा अ़ङ्‌का खानानिन लोनानिन, खोक्‍को ओङा ओ, अ़ङ्‌कादाङ्‌का आदेङ म़ताओ तोक्‍पो म़मुयाङ, देकिनालो खोक्‍को अ़ङ्‌कादाङ्‌का बुयाङा म़युङाङा।” आन्‍कान्‍का खोक्‍कोसोओ अ़चुसाम खाम्‌युङ्‌सुम्‍का। खोक्‍को निनाम्‍हाङ पापाओ अ़क्‍छा ओन्‍ङा अ़चुछा खान्‍तुलो तोक्‍पो म़मुवाङा। मो य़ङ सोम्‍तुक्‍मायु खोन्‍कि अ़छ़ङ्‌आ भेप्‍तुओ म़मुवाङा।

याकुब 1:23

साङ्‌आ निनाम्‍हाङ्‌य़ङ एनुकि मो य़ङ्‌वात्‍नि अ़च़निन, मो ना दर्पनादा अ़ङाइवा काखाङ म़नावाकोङा ओ।

युहन्‍ना 17:24

आपो, अ़ङ्‌का मिन्‍ङाङा, खानानिन्‌आ अ़ङ्‌का त़प़निओचि अ़ङ्‌का खादा युङ्‌ङा, अ़ङ्‌काएनान म़युङ्‌ने, खोन्‍कि अ़ङ्‌साऩङ्‌वा अ़खाङ्‌ने, मो साऩङ्‌वा, हेन्‍खामा मुन्‍मा बुयाङा अ़ङ्‌का सोमात़तुक्‍निओसा खानानिन्‌आ अ़ङ्‌का त़प़निओ।

रोमि 8:7

साङ्‌आ हेवामि मित्‍माचिदा अ़मिन्‍मा पाउ, मो निनाम्‍हाङ्‌ओ अ़चुङेङ लि। मो देम्‍खाछाङ निनाम्‍हाङ्‌ओ अ़चुय़ङ्‌हुप्‌दा अ़प़नान्‍लाप्‍नान्‍चिमिन, खोन्‍कि अ़नुछ्‍याङा लिमा अ़ऱनिन।

रोमि 8:4

हेवामि मित्‍माचिदा काकोन माआङ, मेन सेङ्‌लावादा काकोन्‌ओ निम्‍पाङ साम्‌योक्‍मिआ दोरुओ य़ङ्‌हुप नुलोक आन्‍कान्‌एदा तालाने निकिना निनाम्‍हाङ्‌आ ओ अ़मुवा।

युहन्‍ना 12:41

यसैयाआ ओ य़ङ खालुसु, देकिनालो खोसाआ येसु देम तोक्‍पो लि निकिना खा, खोन्‍कि खोक्‍कोसोओ अ़चुतुक्‌वादा चेवा।

रोमि 13:14

मेन हाङ्‌पा येसु ख्रिस्‍तओ अ़मात्‍ऩङ त़ङ्‌तानुम खोन्‍कि हेवामि च़माथाङ्‌माओ मित्‍माचिदा देत्‍नि सोम्‍सेत्‍मान्‍चिन्‌ओ अ़तुक्‌वादा मिन्‍मा मान्‍पाक्‍दानुम।

गलाति 6:15

सिप्‍मायाम्‍बुन पाक्‍तुम्‌नुछाङ अ़पाक्‍तिमिन्‌नुछाङ, मेन अ़ऩङ्‌वा लावामि ह़ङ्‌म़ङ तोक्‍मा अ़च़वाङ ओ।

१ तिमोथि 1:11

ओ अ़ङ्‌का ऩपुवाङ्‌ओ चिन्‍माय़ङ साम्‍स़रिओ नुय़ङ्‌खान चोन्‍मा खान्‍तुओ निनाम्‍हाङ्‌ओवात्‍निओ मुयाङ।

युहन्‍ना 17:22

खाक्‍को साऩङ्‌वा खानानिन्‌आ अ़ङ्‌का त़प़नि, अ़ङ्‌का मोचि प़ङ्‌च़ङ, मोवात्‍नि आन्‍काचि अ़क्‌तात मुचिङ्‌चिवा मोचिछाङ अ़क्‌तात म़लिने।

२ कोरिन्‍थि 3:17

हान हाङ्‌पा लावा म़मुयाङ, खोन्‍कि खादा निनाम्‍हाङ्‌ओ अ़चुलावा म़युङ्‌याङ, मोदा हाङ्‌पाओ अ़चुलावाआ आन्‍कान म़फोङ।

१ युहन्‍ना 3:2

सोमातुक्‍नाङ्‌नानिन्‌ओ यावाचि ओ, ओन्‍ग़रि आन्‍कान निनाम्‍हाङ्‌ओ अ़चुछाचि ओ, खोन्‍कि आन्‍कान माय़ङ देलिसिन ओ, मो ओन्‍ग़रितारि मान्‍सिन्‌युक्‍तुम। मेन आन्‍कान सिन्‍तुम्‌योम, ख्रिस्‍त खाङ्‌म़मुनान्‍चिन्‌ओ ग़रि आन्‍कान्‌छाङ खोक्‍कोवाकोङा लिसिन, देकिनालो खोक्‍को देत्‍नि म़कात्‌याङ, आन्‍कान मोवात्‍निङा खोक्‍को खाम।