7 'Be nyɔɔlɔ nyaa' jä, 'ɔ 'a ‑balʋa mlɩ sɔ.
'Sɩrɩ 'Kriisë 'järäa' 'ɔa 'jajɛa 'mlɩ ‑sʋɩ ana ‑gʋ nɩ, 'ana 'mʋgbɛ 'ba 'klaa 'ia bobowli, 'be nyɔɔlɔ 'järäa' 'ɔa fugbaa 'mlɩ ‑sʋɩ nɩ, 'ɔ 'a ‑balʋ 'pie.
Dɛɛlɛ a kʋa' ‑plɩɩ ‑gälɩ ɔ nɩ, nyüülü bäa' Jesu 'Kriisë 'lɩ ‑kanyɩ 'pɔnɩkʋ ‑a kä, 'abɩa nyüülü 'nyɩ 'nyɛrɛa' 'üa 'jajɛa wii ‑gälɩ, ‑bɛ 'ü 'nyɛrɛa' 'Nyüna ‑Susua wii ‑gälɩ.
'Na ‑wlajü 'amɩ, 'asɩ 'a bä bɩa. ‑Dɔa 'mlɩ nɩ, jäjänyüü 'a bä 'be 'Kriisë jäa' nɩ, 'a nyra 'ɔɔn järä ‑pɩɔ 'doo 'wʋ. 'Ii känyrɩ 'ɔɔ kä 'amɩ, 'ɔɔ Nyɔsʋa 'ba 'kuaabre. 'Ii känyrɩ 'ɔɔ kä amɩ amä 'cɩca 'bü tʋ Nyɔsʋaa ‑gʋ.
‑Dɔ nɩnɩa 'ŋlʋʋ 'tia' 'ɔa dʋɔ ‑kaaŋlʋa' jä nɩ, 'ɔ ‑ka bä 'ɔa 'ŋlʋʋ. ‑Maa 'ɔa dʋɔ ma jä nɩ, ‑dɔlʋ kpasra ɩa' 'ŋlʋʋlɔ 'ɔa dʋɔ ‑gba ‑kanyɩ 'lɩ ‑a kälä.
‑Bɛ, a nyra 'Kriisë ma järä 'wʋ nɩ, a jresaa a nyra 'ɔɔn nya ‑pɩɔ 'doo 'wʋ kʋa.
'Klaaklä! Anya 'a jä. 'Ii känyrɩ anya 'a ‑balʋa mlɩ 'wʋ. ‑Asɩ a ‑ka 'mä ‑balʋ mlɩ kʋ le?
Nyɔɔa 'Jʋ nya ji, 'ɔ jödɛɛ, 'ɔ 'mlaa, 'kä 'a nö: ‹‑Jää nyɔɔ jöa' jijri, 'nʋmlanyɔɔ ‑susugbee, dapookälɩpɛrɛnyüü nyra ‑balʋnyüüa ‑bei!› 'Lɩgaglakʋa nʋnʋdii 'ii srara 'sɩrɩ 'lɩgaglakʋ ‑gäa' 'klɩ.»
