Rɔmënyüü 14:17 - Kuö Dëdrä Jenɛɛsë Rutë

¹⁷ 'be Nyɔsʋaa 'kamaplälä nɩ, ‑mää jijri 'aiɛ 'mamladiia wii 'nyɩ 'saabä, ‑maa 'klɩgägäkʋ, 'wlinönrökʋ nyra dɔrʋlʋ sɔa' 'Nyüna ‑Susua ‑nyɛɛ, 'ia wii bäsaa.

Rɔmënyüü 14:17 Referans Kwoze

Rɔmënyüü 15:13

Abɩa 'suru Nyɔsʋa 'sie 'amɩ dɔrʋ 'kɔkɔmlɛ nyra plɛgälɩflɛrɛkʋ 'klɩ 'sɩrɩ 'a toroa' 'ɔɔn plɛ. 'Ama nʋ 'saa nɩ, 'Nyüna ‑Susua 'klü nya 'amɩ 'surukʋ 'wli ‑siea!

Matiö 6:33

'Ba 'bata ‑kätɩ Nyɔsʋaa 'kamaplä nyra 'ɔa 'klɩgägäkʋ, ‑bɛ 'ɔmä 'lɩ 'amɩ ‑taa diilia 'fɩɔ 'wlibɩa.

1 Korɛɛntënyüü 4:20

'Be Nyɔsʋaa 'kamaplä 'nyɩ 'papawiia 'doo ‑a bä, ‑maa 'klüa wii bäsaa.

1 Korɛɛntënyüü 8:8

‑Mää jijri 'nyɩ jijrö amɩ Nyɔsʋa ‑gba. 'Be ama ji 'imɩ ‑mää ‑gba 'inyɩ ji amɩ. Ama 'nyɩ bɩa 'iin ‑a ji nɩ, 'anyɩ 'järä 'ia 'mlɩ dɛɛ ‑a.

Galaatënyüü 5:22

‑Maa wiili ‑Susu 'ciea' amɩ 'lɩ nɩ, 'iibä: ‑wawlakʋ, dɔrʋ, plɛgälɩflɛrɛkʋ, plɛpɩpɛa käkäkʋ, 'cɩcagbia nʋnʋkʋ, ‑gbajijikʋ, plɛtoronyɔɔa bäbäkʋ, ‑gbinanakʋ nyra jre ‑na 'mʋgbɛa 'kpakplakʋ;

Rɔmënyüü 8:6

'Jajɛa bobowli fala nyüü jäjäa 'nyʋfɔ 'wʋ; ‑maa nyüülü Nyɔsʋaa ‑Susulu 'tierea', 'üa bobowli fala 'klä nyra plɛgälɩflɛrɛkʋ ‑gälɩ;

1 Tɛsalonikënyüü 2:12

a 'jraraa' 'ana 'klü, a ‑sɔɔrɔa' 'ana plɛ 'wʋ ‑bɛ a 'paa 'amɩ ‑tɔɔ 'lɩ 'amä 'nyɛ 'sɩrɩ Nyɔsʋa 'bataa'. 'Ɔɔ we 'amɩ 'amä 'ɔa 'kamaplä nyra 'ɔa 'wliklɩbʋabʋakʋa 'mlɩ pa.

Filipënyüü 3:9

‑bɛ 'nyaa 'ɔɔn 'mä 'doo bä. Ima bäsaa nɩ, 'Kriisëa plɛtorokʋ 'lɩ 'n ‑gääläklɩ, ‑maa ‑mää ‑dɔa 'lɩträäräkʋ 'lɩ ‑a. Nyɔsʋaaplɛtorokʋ Nyɔsʋa 'jää 'kä 'ɔ ‑nyɛɛ 'klɩgägäkʋ.

1 Korɛɛntënyüü 6:9

'Anyɩ 'saa ‑a jre 'sɩrɩ nyüülü 'nyɩa' 'klɩgä ‑nëmäa' kʋfa Nyɔsʋaa 'kamapläa 'mlɩ kälä? 'Anyɩ ‑trɔɔrɔ 'ana nyüfë: nyüülü 'nöa' ‑sagbili Nyɔsʋa 'nyɩ 'bataa' nyra ‑wäsɩapʋpʋanyüü, nyüülü 'paa' bätësa, nyra nyüberülü ‑bɛ nyɩberü 'piea',

Jaan 3:3

Jesu nya ‑gbala 'ɔɔn: «'Tasɩrɩa 'cɩcasa 'n ‑gbala ‑mɩ, nyɔɔ ma 'nyɩ ‑glooro ‑a ‑glooro 'sɔɔwʋ, 'ɔnyɩ 'lɩ ‑a bɩa ɔ 'jä Nyɔsʋaa 'kamaplä.»

Akëtë 13:52

‑Maa 'wʋnyɛrɛnyüülü nɩ, 'Nyüna ‑Susu nyra dɔrʋ nya 'si 'üün 'klɩ.

Filipënyüü 4:7

‑Bɛ Nyɔsʋaa plɛgälɩflɛrɛkʋlʋ ‑sia' 'lɩgaglakʋa 'fɩɔwʋ 'mä 'ana polu nyra 'ana bobokʋ Jesu 'Kriisë 'lɩ ‑wälɩ ‑träärä.

Kolɔɔsënyüü 1:11

'Sɩrɩ 'ɔa 'wliklɩbʋbʋakʋa 'klü bäa' 'asɩ 'ɔmä 'amɩ 'klülɩpa diia 'fɩɔa 'mlɩ, 'amä wiia 'fɩɔa ‑gbötökʋ mlɩbɩa, 'amä nyɔnyrɔ nyɔnyrɔ 'amä 'blöröfawʋ 'tɔ dɔrʋsa.

Filipënyüü 4:4

'Ba nʋ 'taɩn a 'fɩɔ 'lɩ dɔrʋ 'Pläkänyɔɔ 'lɩ. 'N ‑gbala 'amɩ 'sɔɔwʋ: 'ba nʋ dɔrʋ!

Jaan 3:5

'Iibäa' Jesu nɩ: «'Tasɩrɩa 'cɩcasa 'n ‑gbala ‑mɩ, nyɔɔlɔ 'nyɩa' 'nɩ nyra ‑susu 'lɩ ‑glooro, 'ɔnyɩ 'lɩ ‑a bɩa ɔ pa Nyɔsʋaa 'kamaplä 'lɩ.

Matiö 3:2

‑maa: «'Ba toro 'lɩ ‑balʋ ‑gälɩ, 'be Cɛɩɩa 'kamaplä ‑kanyɩ 'lɩdɛrɩ ‑a tʋŋlɔ!»

1 Piɛɛrë 1:8

Jesulɔ nɩ, 'anyɩ 'ɔɔn 'jä ‑a 'jä, ‑bɛ 'asɩɛ 'a ‑wa 'ɔɔn. ‑Mää 'jä 'anyɩ 'jä 'ɔɔn 'köklesa, ‑bɛ 'asɩɛ 'a toro 'ɔɔn plɛ ‑bɛ dɔrʋlʋ 'blaaa' 'amɩ nɩ, 'papawii 'lɩ kä 'mlɩ 'ümäa' 'uun 'nyrʋgala 'inyɩ 'lɩ ‑a bä; dɔrʋlʋ 'sia' 'wliklɩbʋabʋakʋ 'klɩ.

Filipënyüü 3:3

'Be amɔ bä 'tasɩrɩa 'bölönyüü, ‑Susu 'uu jö amɩ ‑gba ‑bɛ a bibie Nyɔsʋa, anya ‑tʋ ana plɛa 'fɩɔ Jesu 'Kriisë 'lɩ, ‑maa ‑mää 'jajɛ anyɩ toroplɛ.

Filipënyüü 2:1

'Kriisë ma ‑nyɩ 'amɩ 'klü, 'ɔa ‑wawakʋ ma 'cie 'ana plɛ 'wʋ, Nyɔsʋaa ‑Susu ma ‑ma 'ana 'fɩɔ, 'ama kä ‑gbinanakʋ ‑bɛ 'ama kä ‑mölööa nyatɛrɩ nɩ,

2 Korɛɛntënyüü 5:21

Nyɔɔlɔ ‑kaapɩɔa' ‑balʋ nʋ nɩ, Nyɔsʋa bere 'ɔɔn ana ‑balʋ 'wli, 'kä amɔlɔ nyra 'Kriisë bäa' 'doo nɩ, amä 'klɩgä Nyɔsʋaa 'klɩ.

Ebröönyüü 13:9

'Anyɩ 'cɛrɛ 'ana nyüfë ‑wälɩ nyɔɔ 'nyɩ ji 'ɔnyɩ 'kpɩa 'amɩ ‑pasa 'kpɩkpɩakʋ, u nyra ‑mulu 'a 'kpɩaa' 'nyɩa' dɛɛ 'dee bä. 'I 'na Nyɔsʋaa ‑gbinanakʋ 'mä ana polu 'klülɩpa, ‑maa ‑mää jijria ‑dɔ ‑a. 'Ia ‑dɔlʋ nɩ, 'u ‑kaapɩɔ nyüülü prɛa' 'uun dɛrɩ 'känyɩgla.

1 Tɛsalonikënyüü 1:6

'Amɔlɔ nɩ, 'a nʋ ana 'sa nyra 'Pläkänyɔɔa 'sa. 'A 'jä ‑sʋɩa 'fɩɔ, ‑maa 'asɩɛ 'a nʋ dɔrʋlʋ sɔa' 'Nyüna ‑Susua ‑nyɛɛ 'anya 'nyiere nyɔsʋaawii 'klɩ.

1 Korɛɛntënyüü 1:30

'Amɔlɔ nɩ, Nyɔsʋa nrörö 'amɩ 'doo 'lɩ 'amɔ ‑bɛ 'Kriisë Jesu 'sɔ; Nyɔsʋa nya nrörö 'ɔɔn 'lɩgaglakʋ 'lɩ ana ‑gʋ, 'ɔɔ Nyɔsʋa ‑srörö kälɩ 'kä 'ɔ ‑gäää amɩ 'klɩ, 'ɔnya bere amɩ 'klɩ amä 'ɔa nyüü bä, 'kä 'ɔ 'baa amɩ ‑balʋ 'lɩ.

Akëtë 9:31

'Cɛcʋlʋ bäa' Judeeabre, Galileeabre, nyra Samariiabre nɩ, 'ua plɛ ‑gälɩ flɛrɛ. 'U ma 'papla 'klülɩ ‑bɛ 'u ma ‑träärälɩ 'Pläkänyɔɔ. 'Nyüna ‑Susua ‑gʋ 'u 'paplagälɩa 'doo.

Jaan 16:33

Wiili kä 'fɩɔ 'n ‑gbalaa' 'amɩ nɩ, 'amä 'mɩ 'lɩ kʋ, ‑bɛ 'ana plɛ ‑gälɩ 'mä flɛrɛ. 'Plä nya 'amɩ bʋbɔgbi ‑gba nʋa, ‑maa 'ba ‑sɔɔrɔwʋ, 'nyaa 'plä du.»

Lukë 14:15

Nyüülü nyra Jesu tara ɩa' 'wʋ 'nua' 'iin 'wli nɩ, 'üa ‑tɔrʋpɩɔa 'doo nya ‑gbala Jesu: «Dɔrʋ 'blaa ‑mɩ ‑mɔ nyɔɔlɔ nëmäa' Nyɔsʋaa 'kamaplä 'lɩ tara!»

2 Piɛɛrë 1:1

'Mɔɔ Simɔɔ Piɛɛrë, Jesu 'Kriisëa ‑geei nyra 'ɔa apotrë, 'mɔɔ ‑jɩjra ü kä nyɔsʋaplɛ 'bʋaa' ‑beere ana nɛ 'wʋ. Ana Nyɔsʋa nyra 'Lɩmlɩbanyɔɔ Jesu 'Kriisë 'klɩgägäkʋa 'nyrɩklɩa ‑gʋ a 'klaa 'ia nyɔsʋaplɛlɛ.