7 ‑Moloo böblö nänë 'lɩ. Nänë ‑gaa' 'änya kakla 'uun ‑fʋflʋ 'klɩ.
'Unya 'bütü nyra bʋbɔ 'sipi ‑gaa, diili ‑gaalaa' 'klʋɛɛ 'ii ‑nëmä ji.
Papladiili blöa' nänëa mlɩ nɩ, 'a nyɔɔlɔ 'nööa' nyɔsʋaawii 'wli, ‑maa 'ɔa plɛ ‑ka bä ‑tʋtʋ ‑gälɩa dii dɛrɩ, 'ɔa 'nyü ‑ka fɔlɔa' 'bɩɔ dɛrɩ 'fʋflɛsa. 'Ii kakla nyɔsʋaawii 'klɩ, 'a 'ia ‑gʋ 'inyɩ 'lɩ ‑a bɩa i tʋ.
‑Maa 'ua tigblii 'nyɩa' ‑gʋ 'lɩtʋŋlɔ nɩ, 'jrʋ 'pʋa', 'unya jä.
‑Moloo nya böblö 'mʋfa ‑tʋtʋ 'lɩ; 'unya ‑ga, 'unya tʋ 'mʋfasa. ‑Gö ‑mölöö tʋä 'jajua ‑glʋɩgböö (100), ‑mölöö tʋä 'jajua ‑glʋɩtää (60), ‑bɛ ‑mölöö tʋä 'jaju ‑glʋ 'jaju ‑pʋ (30).
'Jaju ‑moloo böblö nänë 'lɩ. 'U mia' ‑ga, 'uu ‑bɛ nänë ‑gaala ‑pɩɔ 'doo 'wʋ, 'unyɩ ‑fɔfrɔ ‑a ‑fɔfrɔ, 'unyɩ dɛɛ ‑a tʋ.
'Jaju ‑moloo böblö nänë 'lɩ; 'u ‑bɛ nänë ‑gaala ‑pɩɔ 'doo 'wʋ, nänë nya kakla 'uun ‑fʋflʋ 'klɩ.