40 'Sɩrɩ 'ü 'bütöa' bʋbɔsipi ‑bɛ 'ü bea' 'iin kapu 'lɩ nɩ, 'asɩ 'pläa bɩarafa 'mä ‑srɩɩ bä.
'Nyüamlɩjraranyɔɔlɔ plaa' bʋbɔsipi nɩ, Sataan bäsaa; 'ia 'böbökʋlʋ nɩ, 'a 'pläa bɩarafa, nyüülü 'bööa' 'uun nɩ, 'abɩa 'aanjëɩɩ.
Nyɔɔ o nyɔɔ 'mäa' Nyɔɔa 'Jʋa ‑gʋ bʋbɔwii 'pa nɩ, 'ɔa ‑balʋ bä ceresa. ‑Maa nyɔɔ o nyɔɔ nëmäa' 'Nyüna ‑Susua bʋbɔwii 'pa nɩ, 'ia ‑balʋlʋ ‑nëmä 'ɔmɩ ‑a cere 'plɔʋplɔʋ ‑taa 'pläläa 'mlɩ, nyra 'plälä jöa' 'äa 'mlɩ.
Papladiili blöa' nänëa mlɩ nɩ, 'a nyɔɔlɔ 'nööa' nyɔsʋaawii 'wli, ‑maa 'ɔa plɛ ‑ka bä ‑tʋtʋ ‑gälɩa dii dɛrɩ, 'ɔa 'nyü ‑ka fɔlɔa' 'bɩɔ dɛrɩ 'fʋflɛsa. 'Ii kakla nyɔsʋaawii 'klɩ, 'a 'ia ‑gʋ 'inyɩ 'lɩ ‑a bɩa i tʋ.
'Asɩ 'imä ‑srɩɩ bä 'pläa bɩara 'taɩn 'lɩ: 'aanjëlü nya jia 'ümä 'klɩgänyüüa ‑tɔrʋpɩɔ plɛbʋbɔnyüü 'ba.
Jesu nya mi Oliivëa 'dʋgba 'wli kʋ, 'ɔa 'wʋnyɛrɛnyüü nya mi 'ɔɔn 'bete 'üa 'kpɔa ‑tɔrʋpɩɔ: «‑Gbala amɩ, 'taɩn 'plɛɛ 'lɩ 'ia 'fɩɔlʋ 'mä 'lɩjrä le? ‑Asɩ anya ‑na jijijrüü nyra 'pläa bɩara 'taɩn jre le?»
'kä 'a 'kpɩa 'üün wiili kä 'fɩɔ 'n ‑gbala kä 'amɩ, 'ia 'lɩträäräkʋ. 'Mɔɔlɔ nɩ, 'ba jresaa 'n bä 'ana ‑tɔrʋpɩɔ sɔ 'saarɩ ‑gälɩ ‑a 'tɔ 'pläa bɩarafa 'wʋ. 'Asɩ i bä!»
‑Bɛ 'ia 'fɩɔlʋ jrä ana tʋɩɩ ‑gälɩ 'imä ana ‑tɔɔɔ bä. ‑Bɛ 'i ‑jɩjra amä 'ia plɛ kä, amɔlɔ nyaa' 'taɩn a blöröfa 'wʋ 'tɔtɔkʋ bɩa.
Ima bä ɩ 'saa nɩ, 'ɔnya ɩ 'wʋ 'kɔkɔmlɛ 'wʋ järäa 'bala 'pläa 'käkolofa 'wʋ. ‑Maa ‑taa ‑gälɩblöröjrüülü kä 'mlɩ a bäa' nɩ, 'ɔ srara 'ɔa nyufa 'wʋ 'doo 'wʋ 'plɔʋplɔʋa ‑gʋ, ‑gbɔlʋ 'ɔ 'saa ‑bɛ 'ɔ ‑nyɩa' 'ɔa nyufa nɩ, 'iibä ‑balʋa 'fɩɔ 'a ‑gblooo.