2 Jrüü ‑uundoo 'mä ‑si nɩ, Jesu nya dɔrɔ Piɛɛrë, Jaakë nyra Jaan 'wʋ, 'ɔ nyra 'üün nya bereklɩ 'dʋgba kpakö 'döö 'wli. Jesu nya 'cicri 'üa 'klɩa 'mʋgbɛ.
Jesu 'nyɩ 'nyie ‑a 'nyie nyɔɔ 'mä 'ɔɔn ‑gälɩ ‑mɛ, ‑maa Piɛɛrë, Jaakë nyra 'ɔa ‑wlajʋ Jaan, 'ɔ nyra 'üün mi.
'Ɔ nëmäa' mi 'ɔ fa Piɛɛrë, Jaakë nyra Jaan. 'Ɔa plɛ ‑taaralɩ dotro ‑bɛ 'ɔa 'koia 'fɩɔ 'jɔklɔ.
'A tääfawʋ 'nëmä 'ana ‑nyɛɛ ji. «Wiia 'fɩɔ ma nëmä 'bölö nɩ, 'i kä 'imä nyüü 'sɔɔ 'aiɛ nyüü tääa mlɩ ja.»
'Pɩrɩgälɩ nɩ, 'nyaa 'järä 'pɔlɔ 'kɩɩkpata kpakö ‑gälɩ nyɔɔ 'doo. ‑Tʋtʋ nyra cɛ nya fɔlɔ 'ɔɔn 'klɩ; 'ü ‑kanyɩ 'järä ‑a 'järä.
'I ‑sia' nɩ, 'üa ‑tɔrʋpɩɔa nyüü 'sɔɔ mö ɩ 'klʋɛɛ, 'ɔnya 'tɔrɔ 'üa ‑tɔrʋpɩɔ ‑beere ‑pasanyɔɔ.
'Ɔmä ana fugbëlë 'nyɩa' 'klü kä, 'ɔa 'wliklɩbʋafugba 'lɩcicri. 'Ɔa 'klülü kä ‑gʋ 'ɔ 'kamaa' diia 'fɩɔ nɩ, 'üü 'ɔ nëmä nʋ ‑bɛ 'ɔmä ana fugba 'cici.
'Anyɩ dɔrɔ ‑taa 'plälä kʋa' ‑pɩa nʋnʋgbi 'wʋ, ‑maa 'ba 'cɛrɛ Nyɔsʋa ‑wälɩ 'ɔmä 'amɩ 'cici 'ɔmä 'amɩ bobowli dëdrä ‑nyɩ, 'amä 'tasɩrɩ wiili Nyɔsʋa 'bataa' jre: wiili 'naa', i 'mɩmrɛa' 'klɩ, nyra wiili 'naa' 'mʋfasa.
Nyɔsʋaa 'Papawiili nya srörö nyɔɔ 'lɩ, 'ɔnya kʋ ana ‑tɔrʋpɩɔ. Anya 'jä 'ɔa 'wliklɩ 'bʋabʋakʋ; 'wliklɩ 'bʋabʋakʋlʋ Tʋ ‑nyɩa' 'ɔa 'Jʋ 'doo 'doo. ‑Gbinanakʋ ‑bɛ 'cɩcasa 'si 'ɔɔn 'lɩ.
'A 'ia 'taɩn 'lɩ Jesu 'jra 'dʋgba 'wli 'ɔmä Nyɔsʋa bibie. ‑Gbialä kä 'fɩɔ kaa' Nyɔsʋa 'ɔ bibie.
Jesu 'nua' 'iin 'wli nɩ, 'ɔnya 'jra ‑gɔlʋ 'lɩ 'ɔnya sɔ 'lɩ, 'ɔnya bereklɩ ‑aaga 'lɩ. ‑Maa nyüü 'kɔkɔmlɛ 'nua' 'iin 'wli nɩ, 'ünya 'cie 'ia bätëlë bä bäa' 'lɩ ‑gbaa 'mlɩ, ‑bɛ 'ü ‑gblaara 'nie 'ü ‑mɛɛɛ Jesu ‑gälɩ.