28 'Ɔ 'jäa' Jesu nɩ, 'ɔnya blö 'ɔɔn bei 'wʋ; 'ɔnya 'kpölɩkä: «Wii 'plɛɛ bä 'nyraa ‑mɔ 'sɔa ‑tɔrʋpɩɔ le, 'Wʋsi Nyɔsʋaa 'Jʋ Jesu? 'N bibie ‑mɩ, ‑nyɩ nʋ 'mɩ ‑gbi ‑gba!»
'Üa 'kpökpöwiia 'mlɩ, 'ü ‑nëma: «Wii 'plɛɛ bä a nyra ‑mɔ 'sɔa ‑tɔrʋpɩɔ le, Nyɔsʋaa 'Jʋ Jesu? Amɔ ‑ji ‑gbi ‑gba nʋ 'fɩɔwʋ ‑bɛ ana ‑sʋɩa ‑srɩ 'mä 'lɩjrä ‑ale?»
'A jre 'iin 'sɩrɩ, Nyɔsʋa 'nyɩa' 'aanjëlü nʋa' ‑balʋ 'klɩ ‑a bere, ‑maa 'ɔ be 'üün 'lɩtʋŋlɔbütügbaa 'mlɩ, 'ü 'pala 'cɩ 'jöjrüükpü 'lɩ; 'üa ‑gätʋtaɩn 'ü ‑glaaa.
Diabëlëlɔ ‑trɔɔrɔ ɩa' 'üün nɩ, 'ünya bere 'ɔɔn kapuprʋgbalä kä 'pʋpʋ 'pütöa' a 'mlɩ, i mrɛɛlɛ nyra ‑gbagblɛ nyɔsʋaamlɩpalanyüü bäa'. 'Ünya 'lɩ ‑sʋɩ 'järäa' ‑srɩ ‑bɛ ‑gbia 'plɔʋplɔʋa ‑gʋ.
Nyɔɔ nöa' ‑balʋ nɩ, Sataan a 'jʋ 'ɔ bä, 'be 'bala 'käkolofa 'wʋ Sataan nö ‑balʋ. ‑Bɛ Nyɔsʋaa 'Jʋ ji 'ɔmä Sataan a 'jrʋpa ‑gblooo.
'Sɩrɩ Nyɔsʋa bäa' 'doo ‑daara 'iin wii; 'i 'na. Domüüa 'mʋgbɛ 'dara 'iin wii, ‑bɛ 'asɩɛ 'ü tɩtrɛ ŋalɛa ‑gʋ.
Jesu 'ciea' ‑gɔlʋ 'lɩ nɩ, bätäläa 'mlɩa nyɔɔ 'doo nya 'jrara 'ɔɔn 'klɩ, domüü bä 'ɔɔn 'lɩ. 'Ɔ ‑ka 'nɩ paa' 'kotu 'lɩ 'i 'a ‑sɩ ‑si. 'Ɔ 'nɩ 'prere nyukua ‑wälɩ ‑a, 'dasi 'lɩ 'ɔ 'prere.
'Be Jesu ‑gbala ‑frepasusulu nyaa' nyɔɔlɔ 'lɩ ‑wlɛ u 'cie 'ɔɔn 'lɩ. 'Unya 'ɔɔn 'lɩwlɛ. 'Cɩ 'ü ma 'paa 'ɔa 'dari 'lɩ, 'kä 'ü 'paa 'ɔa bei 'lɩ detu. ‑Maa 'ɔ ma 'köklö 'ia 'fɩɔ 'kä domoo 'tutro 'ɔɔn ‑aaga 'lɩ.