2 ‑Mɔ ‑nyɩ 'ɔɔn nyüüa 'fɩɔa 'klügälɩkäläkʋ, 'kä nyüülü kä 'fɩɔ ‑nyɩa' 'ɔɔn nɩ, 'ɔmä 'üün 'klälä 'nyɩa' blöröfa kä ‑nyɩ.
‑Bɛ wiili Tʋlɔ blɔa' 'mɩ 'bataa' nɩ, 'iibä, 'nyɩ 'mɔlɔ ü kä 'fɩɔ 'ɔ ‑nyɩa' 'mɩ 'üa ‑tɔrʋpɩɔa 'doo; ‑maa ‑a 'ba 'üün 'kuaabre 'pläa bɩarafa 'wʋ.
Ü kä 'fɩɔ Tʋ ‑nyɩa' 'mɩ 'ünya 'na 'pɛlɩ jia, ‑bɛ 'nëmä bɩa nyɔɔlɔ jöa' 'na 'pɛlɩ ‑fälɩ ‑a be 'plɔʋ.
'Na Tʋ, ‑plɩɩlɩ 'nëmäa' kʋ, 'ii 'n 'bata 'nyraa nyüülü ‑nyɩa' 'mɩ 'mä bɩa kʋ, 'ümä 'na 'wliklɩbʋabʋakʋlʋ ‑nyɩa' 'mɩ 'jä, 'be ‑wa 'mɩ 'fɩɔwʋ ‑nya 'mä 'plä nʋ.
Jesu nya jijrö 'üün ‑gba 'ɔ ‑nëma: «Nyɔsʋa ‑nyɩ 'mɩ ‑tʋtʋ nyra cɛlɩa 'kama 'klüa 'fɩɔ.
A jre bɩa 'iin 'sɩrɩ Nyɔsʋaa 'Jʋ jia', 'sɩrɩ 'ɔ ‑nyɩa' amɩ 'lɩgaglakʋ, amä 'cɩca Nyɔsʋa jre. 'Ɔa 'Jʋ Jesu 'Kriisë 'lɩ a bä; 'a 'ia ‑gʋ a bä 'cɩca Nyɔsʋa 'lɩ. 'Ɔɔ bä 'cɩca Nyɔsʋa nyra 'klälä 'nyɩa' blöröfa kä.
'A 'üa 'wlili 'n bibie. ‑Mää nyüüa 'fɩɔa 'wlili 'nyɩ bibie, ‑maa ü ‑nyɩa' 'mɩ 'üa 'wlili 'n bibie, 'be ‑mɔ kä 'üün.
«Nyüülü ‑baaa' 'pläa ‑tɔrʋpɩɔ ‑nyɩa' 'mɩ nɩ, 'n srara 'üün ‑na 'nyrɩ. ‑Mɔ ma kä 'üün, ‑nya ‑nyɩ 'mɩ 'üün. 'Ünya ‑träärälɩ ‑na mlɩa wii.
‑maa nyɔɔ o nyɔɔ nëmäa' 'nɩlɩ 'nëmäa' 'ɔɔn ‑nyɩ 'mla nɩ, 'mamlatʋ ‑ka ‑nëmä 'ɔɔn 'bla ‑a 'bla 'plɔʋ, ‑bɛ 'nɩlɩ 'nëmäa' 'ɔɔn ‑nyɩ nɩ, 'inya 'ɔa 'kläa 'mlɩ ‑gbaalaa ‑beere 'niea sɔrɔfa, 'kä 'inya 'ɔɔn 'klälä 'nyɩa' blöröfa kä ‑nyɩ.»
Tʋ ‑wa 'Jʋ, 'ɔnya ‑nyɩ 'ɔɔn diia 'fɩɔ kälɩ.
‑Bɛ dɛɛlɛ 'ɔ 'daaa' 'ɔmäa' amɩ ‑nyɩ nɩ, 'ɛɛ bä 'klälä 'nyɩa' blöröfa kä.
'Ɔ 'jra cɛa 'mlɩ, 'ɔ bä Nyɔsʋaa 'dupa 'pɛlɩ. 'A ‑plɩɩ 'ɔ 'kamlaa 'aanjë, ‑sisili kä 'fɩɔ 'kamaa', nyra ‑sisili kä 'fɩɔ käa' 'klü.
‑Maa ‑taa ‑gälɩblöröjrüülü 'lɩ nɩ, 'ɔa 'Jʋ 'ɔ ‑srörö kälɩ 'kä 'ɔ 'pala amɩ wii ‑gba. 'Ɔɔ Nyɔsʋa ‑srörö kälɩ 'ɔnya nʋ diia 'fɩɔ. 'Ɔɔ 'ɔ 'ba bɩa 'lɩ 'ɔmä diia 'fɩɔa ‑jaajinyɔɔ bä.
«'Na Tʋ ‑nyɩ 'mɩ diia 'fɩɔ kälɩ. Nyɔɔ 'nyɩ 'Jʋ ‑a jre, ima 'nyɩ Tʋ ‑a bä. Nyɔɔ 'nyɩ Tʋ ‑a jre, ima 'nyɩ bɩa 'Jʋ nyra nyɔɔlɔ 'Jʋ 'bataa' 'ia srarakʋ ‑a bä.
'Ba kʋ Nyɔsʋaa ‑wawakʋ 'lɩ, ‑bɛ 'ba ‑glaaa ana 'Pläkänyɔɔ Jesu 'Kriisëlɔ ‑nyɛɛa' 'klälä 'nyɩa' blöröfa kä, 'ɔa nyatɛrɩ.
'Klälä srara 'äa nyufa: anya 'jäjrä 'ämɩ, 'a 'äa ‑gä a 'paa. 'A 'klälä 'nyɩa' blöröfa kä ‑bɛ ä bä käa' Tʋa ‑gba, ä sraraa' amɩ 'äa nyufa nɩ, 'äa ‑gä a ‑gbala 'amɩ.
‑Maa Nyɔsʋa 'jä 'na nyatɛrɩ, 'kä Jesu 'Kriisë 'mä 'mɩ kälɩ ‑srörö, 'mɔɔ bäa' ‑balʋnyüüa 'wliklɩa nɔ nɩ, ‑bɛ 'ɔmä 'ɔa plɛböblökʋa 'fɩɔ srara. 'Ɔ nʋ 'imɩ 'ɔmä nyüü srara 'sɩrɩ 'ɔ 'mrɛɛa' 'ɔmäa' nʋ ‑bɛ nyüülü toroa' 'ɔɔn plɛ 'mäa' 'klälä 'nyɩa' blöröfa kä 'jä.
'kä nʋnʋdiia 'fɩɔ ma 'nu Jesua 'nyrɩ 'wli, kotia 'fɩɔ 'mä ‑fli 'pala: cɛa 'mlɩ, ‑tʋtʋ ‑gälɩ, nyra ‑tʋtʋa 'mlɩ,
‑Jäsɩ 'ɔ sraraa' 'üün nɩ, 'a 'taɩn 'lɩ 'ɔ 'baa' 'Kriisë 'kuaabre ‑bɛ 'ɔ 'sria' 'ɔɔn 'ɔa 'dupa 'pɛlɩ 'kä cɛɩɩa 'mlɩ.
'Be 'ɔ kä 'ɔmä 'kama 'kama, ‑a ji 'ɔmä 'ɔa 'nyüamlɩjraranyüü 'ɔa bökli ‑wälɩ pla.
‑Balʋa 'pɛpɛɛdɛɛ bä jäjäkʋ; ‑maa dɛɛlɛ Nyɔsʋa ‑nyɛɛɛa' amɩ 'flɛɛlɩ ana 'Pläkänyɔɔ Jesu 'Kriisë 'lɩ nɩ, 'ɛɛ bä 'klälä 'nyɩa' blöröfa kä.
«'A 'nɩ ‑fɛ 'jrʋpa jijrili ‑fɛɛɛa' 'ia ‑gʋ, ‑maa 'ba ‑fɛ 'jrʋpa ‑mɩlɩ bäa' ‑wɩara 'klä 'ia ‑gʋ, i Nyɔɔa 'Jʋ 'mäa' 'amɩ ‑nyɩ. 'Ɔɔ Tʋ Nyɔsʋa ‑nyɩ 'ɔa 'klü.»
'Üülü nɩ, 'ümä 'pɔnɩkʋ 'jä 'plɔʋplɔʋa ‑gʋ, 'kä 'klɩgänyüü nya 'klälä 'nyɩa' blöröfa kä 'jä.»