12 ‑Jää 'na ‑dɔwiili 'nëmäa' 'amɩ ‑gbala: 'Ba ‑wawla, 'sɩrɩ 'n ‑waa' 'amɩ.
‑Jää 'ɔa ‑dɔlʋ 'ɔ ‑nyɩa' amɩ: nyɔɔlɔ ‑waa' Nyɔsʋa nɩ, 'ɔ kä 'ɔmä bɩa 'ɔa ‑wlajʋ ‑wa.
‑Dɔ dëdrä 'n ‑nyɛɛ 'amɩ: 'Ba ‑wawla; 'sɩrɩ 'n ‑waa' 'amɩ, 'ba nʋ 'saa 'ba ‑wawla.
‑Maa wiili bäa' 'ia 'fɩɔa 'wli nɩ, 'ba nʋ 'ana plɛa 'fɩɔ 'ba ‑wawla, 'be ‑wawlakʋ cere ‑balʋ 'kɔkɔmlɛ.
‑Jää 'ɔa ‑dɔlʋ 'ɔ ‑nyɩa' amɩ: a toro 'ɔa 'Jʋ Jesu 'Kriisëa 'nyrɩ plɛ, 'kä a ‑wawla 'sɩrɩ 'ɔa ‑dɔlʋ 'ɔ ‑nyɩa' 'amɩ ‑gbaa'.
'Ba nʋ 'ana plɛa 'fɩɔ 'ba ‑wawla ‑beere ‑wlajü. 'Amɔ ‑kätɩ 'ba ‑täträlɩ.
'Ba 'nyɛrɛ ‑wawlakʋ 'lɩ, 'sɩrɩ 'Kriisë ‑waa' amɩ. 'Ɔ 'sara 'ɔa nyufa Nyɔsʋa kälɩ ‑gbɔa 'sa ana ‑gʋ; 'ɔ bä ‑gbɔlʋ kä 'nɔnʋ käa' Nyɔsʋa 'tʋ.
'Ii känyrɩ, abɩa 'ana bobowli bä dɛɛ 'dee, 'ba ‑wawla ‑beere ‑wlajü, 'ba kä nyatɛplɛ, ‑bɛ 'ba kä ‑gbinanakʋ.
Nyɔsʋaa ‑Susu 'lɩ 'a ‑träärälɩ 'cɩcasa ‑bɛ 'ana ‑sisi kpëträ 'amä ‑wawla 'tasɩrɩasa ‑beere ‑wlajü. 'Ii känyrɩ, 'ba nʋ 'nyünaplɛ 'ba ‑wawla 'tasɩrɩasa.
Dɛɛlɛ bäa' 'sɩrɩ 'cɛcɩnyüü 'mäa' ‑wawla nɩ, 'anyɩ 'wʋ ‑jɩjrakʋ ‑a kä, 'be Nyɔsʋaa 'mʋgbɛ 'kpɩa 'amɩ 'sɩrɩ 'amäa' ‑wawla.
Abɩa 'Pläkänyɔɔ 'papla 'ana ‑wawlakʋ ‑gälɩ, nyra nyüü ‑mölööa 'pɛlɩ, 'sɩrɩ a ‑waa' 'amɩ.
‑Wlajü 'amɩ, 'ana ‑gʋ a kä amä Nyɔsʋa 'trɛɛ 'taɩn a 'fɩɔ 'lɩ. 'Inya 'nara 'lɩ, 'be 'ana nyɔsʋaplɛ 'papla ‑gälɩa 'doo, ‑bɛ 'ana ‑wawlakʋa 'mʋgbɛ 'papla ‑gälɩa 'doo.
Wiili 'n 'daa' 'ba nʋa' nɩ, 'iibä, 'ba ‑wawla.»
'Ŋlʋʋ, wiili 'mäa' ‑plɩɩ ‑mɩ ‑gbala nɩ, 'iibä: a ‑wawla. ‑Mää ‑dɔ dëdrä 'nyɩ 'saabä, ‑maa 'a ‑dɔ 'doolʋ a 'järä käa' 'käkolofa 'wʋ.