7 'A nyra 'üün 'nyɩ 'nyɛrɛ 'wʋ!
'Nya 'nu 'papawii ‑mɩdoo sɔa' cɛa 'mlɩ 'wli, 'inya ‑gbala 'mɩ: «'Na nyüü 'amɩ, 'ba sɔ bätäläa 'mlɩ , 'a ‑pɩ 'äa ‑balʋa 'mlɩ bä, 'a nyra 'ään ‑pɩ busudii kpakëlë nëmäa' 'üün ‑gälɩjräa 'mlɩ bä.
‑Nyɩ 'sosowʋ nyɔɔa 'wlia 'darʋ 'piepiekʋa ‑gʋ; ‑nyɩ 'cakla ‑na nyufa nyɔɔ ‑moloa ‑balʋ, ‑na 'mʋgbɛ tʋŋlɔlɩ ‑balʋ dɛrɩ.
'Anyɩ 'cakla 'ana nyüfë ‑gbiaraa nʋnʋgbili 'nyɩa' 'wli nyra ‑toko kä, ‑maa 'ba be 'iin ‑fälɩ.
‑A ‑jää 'iin 'lee: 'ü nyra Jesu 'Kriisë 'sɔ bäa' 'doo nɩ, 'ia ‑gʋ nyüülü 'nyɩa' juifë bä 'jää ‑jaaa 'döölä amɔ bäa' juifë 'nëmä ɩa' 'jä. A nyra 'üün bä nyüü 'doo. Wiili Nyɔsʋa 'daaa' 'ɔmäa' 'Mʋfagogo 'lɩ ‑srörö 'ɔmäa' nʋ nɩ, 'ünya kälä bɩa 'lɩ 'mlɩ.
'A nyra nyüülü 'nyɩa' nyɔsʋaanyüü bä 'nyɩ kʋ ‑pɩɔ 'doo 'wʋ. Dɛɛlɛ ‑gäa' 'klɩ nyra ‑mɛlɛ 'nyɩa' Nyɔsʋaa ‑dɔ ‑wa 'mrɛɛ ü bä ‑pɩɔ 'doo 'wʋ? 'Napɛ nyra 'jöjrüükpü 'mrɛɛ ü bä ‑pɩɔ 'doo 'wʋ?
