14 'Ɔ 'balɩ ‑pɔɔkʋlʋ ‑tʋ ɩa' amɩ wii ‑gälɩ 'be anyɩ ‑träärä kä 'lɩ Nyɔsʋaa ‑dɔ ‑a. 'Ɔ kolo 'uun krʋa ‑gälɩ, 'asɩ 'ɔ nʋ 'ua 'lɩbadɛɛ.
Nyɔsʋa ma 'pa kuö dëdräa ‑gä nɩ, 'iibä 'klɩsa kuölä nɩ, 'ɔnya 'ään ‑kätɩa nä 'lɩnrörö. ‑Bɛ dɛɛlɛ bäa' ‑kätɩdɛɛ nyra dɛɛlɛ bɩaa' 'klɩ nɩ, saka 'i nëmä saka.
'Ii känyrɩ, ‑kätɩ ‑dɔ ma 'fʋma 'unya 'nyɩ kä ‑gbaa kä, 'a 'ia ‑gʋ Nyɔsʋa nya 'balɩ 'uun.
'A nyra 'Kriisë 'sɔ järä 'wʋ, ‑dɔlʋ kä 'fɩɔ ‑pɩ ‑tʋtʋ ‑gälɩa nyüü ‑tʋa' 'lɩ nɩ, 'anya 'a 'uun mlɩ 'wʋ. Dɛplɛɛ kä ‑gʋ 'a ‑ka 'cɛrɛ 'ana nyüfë ‑wälɩ ‑bɛ 'ü nö 'saa 'ü ‑ka ‑tʋʋä 'amɩ 'ia ‑dɔlʋ ‑gälɩ, ‑beere 'sɩrɩ ana 'klä ‑ka bäa' ‑taa 'plälä kälɩ le; ibäa':
'Ɔa 'mʋgbɛ dɔrɔ ana ‑balʋ 'wʋ 'ɔnya ‑gbötö 'uun 'ɔa 'jajɛ 'lɩ krʋa ‑gälɩ, 'kä ‑balʋa ‑gʋ nɩ, amä ‑beere jäjänyüü, ‑bɛ 'klɩgägäkʋa ‑gʋ nɩ, amä 'lɩbänyüü bä. 'A 'ɔa ‑gbaa 'lɩgaglakʋ 'lɩ 'a 'pʋɔlɔ.
'Ii känyrɩ 'ba toro 'lɩ ‑balʋ ‑gälɩ 'kä 'a ‑siie Nyɔsʋaa 'pɛlɩ kälɩ 'ana ‑balʋ 'mä kpëträ.
'Be ‑balʋa ‑sisieklü bä 'jrʋpa 'lɩ, ‑maa nyɔɔlɔ kaa' 'ɔɔn 'klɩ ma sɔ ‑plɩɩ 'fɩɔwʋ 'kä 'ɔnya 'wʋcrɛrɛ.
Sakarii ‑bɛ 'ɔa 'ŋlʋʋ ‑gäklɩ Nyɔsʋa 'klɩ ‑gälɩ; 'ü ‑träärälɩ 'ɔa ‑dɔa 'fɩɔ, wiili 'Pläkänyɔɔ 'daaa' 'ii 'ü nö, 'ünyɩ wala dɛɛ ‑a.