3 'Taɩn 'lɩ ‑wlajü ‑mölöö jia' ‑bɛ 'ü 'paa' 'cɩcasalä 'ü 'järäa' ‑mɩ 'lɩ, 'äa ‑gä nɩ, ‑bɛ 'sɩrɩ ‑nyɛɛrɛa' 'cɩcasa 'lɩ nɩ, dɔrʋlʋ 'blaa' 'mɩ ‑mää 'ua ‑srɩ 'nyɩ ‑pɛ.
'N 'jäa' ‑na 'jü 'ü 'nyɛrɛa' 'cɩcasa 'lɩ, 'sɩrɩ Tʋa ‑dɔ ‑gbaa', dɔrʋlʋ 'blaa' 'mɩ ‑mää 'ua ‑srɩ 'nyɩ ‑pɛ.
'A 'cɩcasalä bäa' amɩ 'lɩ ‑bɛ a nyra 'ään 'mäa' ‑wälɩkʋ 'plɔʋplɔʋ nɩ, 'äa ‑gʋ a ‑wa 'amɩ.
Ama 'nu ‑maa, 'na 'jü 'nyɛrɛ 'cɩcasa 'lɩ, 'dɔrʋlʋ 'blaaa' 'mɩ 'u ‑kanyɩ bä ‑a bä.
'Asɩ 'n bibiea' 'ana 'fɩɔa 'wli 'lɩ nɩ, 'asɩ 'n nö 'iin dɔrʋsa.
'Ia jrüülüa 'mlɩ nɩ, nyüülü traraa' jrä nyüüa ‑glʋɩ ‑uundoo (120). Piɛɛrë nya sɔwʋ 'wʋnyɛrɛnyüüa ‑glʋɩ ‑uundoolüa ‑tɔrʋpɩɔ, 'ɔnya ‑gbala 'üün:
'Unyɩ nʋ wiili 'nyɩa' 'klɩgäa dɔrʋ ‑a, ‑maa 'cɩcasaa dɔrʋ 'u nö.
'Ii känyrɩ, 'sɩrɩ a ‑ka käa' 'taɩn nɩ, a nʋ nyüüa 'fɩɔ 'cɩcagbi ‑gba, ‑maa ü a nyra 'üün toroa' Nyɔsʋa plɛ, 'üü ‑kätɩ.
'Na ‑wlajʋ, wiili kä 'doo 'n boboa' nɩ, abɩa ‑na diia 'fɩɔ 'wʋlɩmlɩ 'kä ‑na fugba 'na, 'sɩrɩ ‑na ‑susu ‑jrɛɛɛa'.
'Na ‑wlajʋ, wiili ‑nöa' ana ‑wlajü nyra 'nɩmɩ nyɔtugbawlajüa ‑gʋ nɩ, wiili Nyɔsʋa 'bataa', 'ii ‑nö.
'A 'ia ‑gʋ, ama ji nɩ, 'nyaa 'lɩ wiili kä 'fɩɔ 'ɔ nöa' 'saa: ‑gbagblɛlɛ kä 'fɩɔ 'ɔ ‑tʋa' amɩ ‑gälɩ. 'Pɩrɩgälɩ nɩ, 'ɔ 'nɩ 'kʋɛɛlɩ ‑wlajülü ‑a, ‑bɛ ‑mülü 'bataa' 'ia nʋnʋkʋ nɩ, 'ɔ 'nɩ 'dɛrɛlɩ 'ümɩ ‑a, 'kä 'ɔ nö 'ɔmä 'üün 'cɛcɩ 'lɩ prɛ.