11 ‑Maa ‑mɔ bäa' Nyɔsʋaa nyɔɔ nɩ, fɔlɔ 'ia 'fɩɔlʋ 'klɩ. 'Bata ‑gböösa 'klɩgägäkʋ, Nyɔsʋaa 'lɩträäräkʋ, nyɔsʋaplɛtorokʋ, ‑wawakʋ, plɛböblökʋ nyra plɛpɩpɛ.
Fɔlɔ ‑sëgbadɛɛa bʋbɔgbi 'klɩ. Nyüülü nöa' 'üa plɛa 'fɩɔ ü wea' 'Pläkänyɔɔ nɩ, 'üa ‑gba ‑a ‑baatra 'klɩgägäkʋ, nyɔsʋaplɛtorokʋ, ‑wawakʋ nyra plɛgälɩflɛrɛkʋ.
'kä nyɔsʋaanyɔɔ 'mä 'wʋsɔɔrɔ ‑gböösa 'cɩcagbia 'fɩɔa nʋnʋkʋa ‑gʋ.
Nyɔɔ 'nyɩ fɛrɛ ‑na sëgbadɛɛ! Bä nyɔsʋaplɛtoronyüüa 'klɩtɛnyɔɔ, ‑na 'papawiia 'mlɩ, ‑na nʋnʋgbia 'mlɩ, ‑na ‑wawakʋ 'lɩ, ‑na ‑susu 'lɩ ‑na nyɔsʋaplɛtorokʋ 'lɩ nyra ‑na ‑fre 'klɩfɔlɔkʋ 'lɩ.
‑Yrɛ 'nyɩ bä 'a nyra nyüüa 'fɩɔa ‑tɔrʋpɩɔ, 'kä 'ana 'klä ‑gäääklɩ. Nyɔɔlɔ 'nyɩ nʋa' 'iin nɩ, 'ɔ ‑nëmä 'Pläkänyɔɔ ‑a 'jä.
'Ii känyrɩ 'na ‑wawawlajü 'amɩ, 'ba fɔlɔ ‑gbagblɛnyɔsʋɩɩ 'klɩ!
Ɔ fɔlɔ wiili bʋbɔa' 'klɩ, ɔ nʋ wiili 'naa'; 'ɔ 'bata 'wlinönrökʋ 'ɔnyɩ sɩa.
'Ba fɔlɔ ‑sagbili Nyɔsʋa 'nyɩ 'bataa' 'klɩ! ‑Balʋlʋ kä 'fɩɔ nyüü 'mrɛɛa' 'ümäa' nʋ nɩ, 'unyɩ fugbaa 'mlɩ ‑a bä. ‑Maa ‑sagbili Nyɔsʋa 'nyɩ 'bataa' nɩ, nyɔɔa ma nʋ 'umɩ nɩ, 'ɔa 'mʋgbɛa fugba 'ɔ nö ‑balʋ ‑gba.
'kä nyüü 'paa 'ɔa 'cɩcagbia ‑gä. Ɔ bä 'ŋlʋʋlɔ 'bʋaa' 'ɔa 'jü, ɔ 'kʋɛɛa' 'lɩ nyɔtugbanyüü, ɔ sua' 'cɛcɩnyüüa bei ‑gba, ɔ jia' ‑sʋɩjänyüü ‑gba, ‑bɛ ɔ nʋa' 'mʋfagbi 'kɔkɔmlɛ.
'Ii känyrɩ 'ba 'bata ‑wawakʋ 'kä 'a 'bata bɩa diili Nyɔsʋa ‑Susu ‑nyɛɛa', 'ba 'bata ‑gböösa nyɔsʋaamlɩpalakʋ.
'Ii känyrɩ nɩ, a 'bata wiili jaa' 'wlinönrökʋ nyra wiili 'paaa' nyüü 'klü 'lɩ ana ‑tɔrʋpɩɔ.
‑Wlajʋ Timotee, 'kpla 'mʋfasa wiili a ‑nyɩa' ‑mɩ kälɩ. ‑Gaalalɩ dɛtʋlʋ 'nyɩa' 'wli nyra ‑toko kä ‑gälɩ, 'kä ‑gaalalɩ ‑gbagblɛ ‑srɛsrɛkʋlʋ 'nyɩa' ‑gbaakä ‑gälɩ.
Ana 'Pläkänyɔɔa ‑gbinanakʋ nya 'si 'mɩ 'klɩ, 'ɔ ‑nyɩ 'mɩ nyɔsʋaplɛtorokʋ nyra ‑wawakʋlʋ bäa' 'Kriisë Jesu 'lɩ.
'A 'ia ‑gʋ nyɔɔlɔ 'cɛrɛa' 'ia bʋbɔgbilia 'fɩɔ ‑wälɩ nɩ, 'ɔnya ‑beere 'cɩca ‑püüülü 'nyɩ 'a 'lɩkäwla. 'Ünya 'ɔɔn 'klɩberea 'ɔa 'Kamanyɔɔa ‑gʋ. 'Ɔɔ 'ü nëmä 'cɩca 'jrʋpaa 'fɩɔ kälɩ ‑nyɩ.
‑Maa ‑mɔlɔ nɩ, ‑jää 'na 'kpɩkpɩakʋ 'mʋfasa, 'na nʋnʋgbia 'mlɩ, 'na bobowiia 'mlɩ, 'na nyɔsʋaplɛa mlɩ, 'na plɛböblökʋa 'mlɩ, 'sɩrɩ 'n ‑waa' nyüü ‑bɛ 'sɩrɩ 'n kpʋkplɔa' 'mlɩ.