Ta'aposeli 3:19 - Ata New Testament

¹⁹ Laso ngingi ngaxiu­nu opo­ngengi so susu noxinge mo nga'isa­lilinoxu no anu Mosinge vaikalaou. Laso Mosinge uiasou susu noxinge mo Tatananenge u'oxonu vasi­menge uxolu mana­mana'u.

Ta'aposeli 3:19 Referans Kwoze

Ta'aposeli 2:38

La Pita muvikalane'i lexe, “Ngingi mukalusi ngaxiunu mo nga'isalilinoxu opongengi no anu Mosinge vaikalaou. Ukalu laso nexi ta'oxonu ilixo so kelele noxinge no anu lexa. Takeleni­ngenge axone no anu ualasou Iesua Kalaisiti xo anu ukalusou tina'u­ngenge so susu xe u'oxonu iaiama so ulosinge Ulenu Laixe.

Matiu 18:3

La muvikala lexe, “Eni avikalangengi manina aloxo 'o. Loxo ngaxiu avile so ngaxali aloxo tamolomolo uasi, la vote'i uasi so ngingi nga'una ngaxolu no voxo so Mosinge molu u'uli laxune'i tamitemaou no tualasou.

Matiu 13:15

La opone'i tamitema ano'o pumuxusi. Xe sangalia muamuaxu so ilolomu. Mo ane'i mi'oxonu ie'i so muvuvu. Xo loxo 'o io ie'i utongonu xe sangali'a ulomuxu xe opone'i upalasiou laso ane'i ilivu ine'e noxilo so apaipoune'i.'

2 Tesalonaika 1:7

Xe ngingi ane ngatavulenu navunavu vaimomo 'o la anu uxexenu so papaxesinge nenge'a. Mi anene uxali no voxo loxo Tatananenge Iesua oli'a ta'angelou xavine'i ilu'e no tualasou so ipala'a no anu navu lamixu.

Ta'aposeli 11:21

Mivotovoto la xavi noxou Tatananenge muxolu noxi'a. Laso ane'i tamitema tavu'alo mixiunu opone'i mo mi'isalilinoxu xe milopala noxou Tatananenge.

2 Pita 3:8

Tavivilo ane asexalangenge, tangengivulusiou mi vile aloxo 'o uasi. Noxou Tatananenge la voxo soxu vilesisi ne anu loxo tau ie tauseni vile. Xe tau ie tauseni vile la anu loxo voxo soxu vilesisi.

Ta'aposeli 28:27

Xo tamitema ane xo ne, opone'i pumuxusi mo sangali'a muamuaxu xe me'a mivuvu. Xo loxo 'o io imaisou xe ilomusou vaikala xe ilamana mo ixiunu opone'i la eni apamauline'i.'”

1 Pita 2:25

Tatei xoluxolungenge vuluvu­lusi aloxo tasipisipi ivaxa ine'e 'osi. Ia vaimomo 'o ngingi ngelivu ngene'e mukalu noxou Tatanane'i tasipisipi e ulavusou u'oxo latolosou tangengi.

2 Tesalonaika 1:10

Ia loxo nenge tami­temaou mu'isalili la taxolu ta'itinu ualasou no anu voxo loxo une'e ne. Mo ngingi ngelomuxu vaika­lamexi no taingengi laso ngingi kalumo ngaxolu so nenge'a talo­pala mukalusi tatoxu Tatananenge ne.

Ta'aposeli 11:18

Taiuta talopala ne milomusou vaikalaou Pita laso ane'i opone'i lelemesou mo ivikala mi vilela uasi. Ane'i mi'itinu Mosinge ualasou mo mivikala lexe, “Ai vaimomo 'o nenge talamana. Mosinge mu'oxonu vote'i so tamitema noale'ale kalumo loxo ixali lamana no anu susu noxi'a la ixalisou pamauli.”

Luku 1:16

La anu itema ne ulivunixi'a tamitema Ta'isilaeli tavu'alo ilai noxou Tatananenge anu Mosi'a.

Lomu 11:25

Ioxe tavivilo, eni amasaxau apala'anixu mi vile masi utalume­ngengi. Alemolu so ngingi nga'iti­ngengi no anu lavulavu noxinge uasi. Vaikala anene aloxo 'o. Vaimomo 'o Ta'isilaeli tata'eisi ilopala noxou Tatananenge. Ia tavu'alo noxi'a ne opone'i pakia'u mo ilopala noxou uasi. Ane'i ixolu axone xo ano'o voxosinge tami­tema noale'ale so ngalopala. Ulai ulai xe loxo navasinge umomo­moe, laso anu ane. No voxo anene ane'i Ta'isilaili tapiena ilivu mo ilopala noxou Tatananenge.

Ta'aposeli 17:26

Xo noxou itema vilesisi, anu muxalinenge laili mukalusi. Anu molu mupilixinenge so taxolu no anu taninenge loxo no anu masaxa noxou. Mo anu molu usosovosou voxosinge.

Ta'aposeli 15:3

Ioxe, milutu la tatemanu pita latala mi'italone'i laixe so milai. Poluena milutu milai la mipolo no xale lia ne Vonisia xe ne Samalia. Mipolo ne xe mixali no tuala aneva la mia'aloi'a talopala no anu mimi ane Mosinge mu'oxonu no avo'a so tamitema noale'ale milo­pala kalumo. Mia'aloi'a talopala xe milomu la ane'i opone'i mu'osa manina.

Ta'aposeli 3:21

Ia vaimomo 'o anu a uxoxolu no tualasou Mosinge so uxomaiou voxo ane Mosinge musoso­vosou lexe anu upaipounu mimi mo ulivunoxu uxolu laixe loxo tei manina. Mosinge molu muvikala axone no anaxa'a tapolo­petiou tatei.

Ta'aposeli 1:6

Xe no voxo anu so utelai la oli'a mixolu mipita. La ane'i mitali'isou lexe, “Tatananexio, aloxova? No voxo ano'o nini mene natulu nakingi no xale lia ne Isilaeli so nexi talalavulusi?”

Mupala'a 21:4

Anu uxolu noxi'a laso ie'i lexaxu so mi vilela uasi. Mo soli uxalila uasi. Mo tamitema opone'i tu'umaxusou mi vile xe itama xe ixamulinu navunavula uasi. Mi anene so tateimo, umomomo so uxalila uasi.”

2 Timoti 2:25

Mo ane'i tamitema so xilili la uxaxaisi'a se'isisi so ulovonixu xavutalai'a. Xo axone la Mosinge masi uxalixu vote'i so ixiunu mo i'isalilinoxu opone'i so susu noxi'a kaio vaikala manina upalasi noxi'a.

Ta'aposeli 3:20

Xo axone la anu upalu­sou itema ane anu musoso­vosou so usu'ulingengi e Iesua.

Ipilu 4:1

Ioxe, vavalima noxou Mosinge lexe ane'i ane ilopalasi i'unalai no anu tanixu ma'ila a ututulusio. Laso nenge tamama'u xo anu masi upala'a lexe se'i noxinge mane i'unalai la uasi, mitulu mitutulosi.

Luku 22:57

Ia Pita muxililiou vaikalaie lexe, “Nini sema ne nakalavoisi, eni alavusou to uasi.”