Pilipai 4:8 - Ata New Testament

⁸ Ioxe tavivilo, vaikalaxeli telexu aloxo 'o. Utotomu xavutalamengi uxoxolu no anu mi ane kalavoi no anu uasi xe mi laixe so tataxanu xe mi ane ulapusi xe mi ane malemalenga xe mi ane so sexelasi xe mi ane tamitema ivikalasou laixesi. Ani, ngaxavutalanu mimi ane lailaixe u'uli'uli xe mimi ane temanu laixe so ta'itinu axonesi.

Pilipai 4:8 Referans Kwoze

Tiemisi 3:17

Ia noxi'a ane'i ane ixalisou lavulavu mu'asi'asi e ululu'e no tualasou Mosinge, la mi ane tamaleisou tei a so xoluxoluxa'a malemalenga. Xe kalumo la tamalei lexe ilavusou ixolu se'isisi mo opone'i lexasi mo opone'i ukisi noxi'a tamitemasi. Xe ane'i tami­tema ane xo ne xoluxoluxa'a uxalixu nene'axu laixe so i'alauna misevile mo i'oxonu iou vilesisi noxi'a tamitema mukalusi. Xe ikalavoi uasi, xo ilixo noxi'a iou vilesisi no anu vaikalai'asi.

Taitusi 2:7

No anu xoluxolu noxine la mi ma'ia na'oxonu ne u'isalili mo so loxo ane'i imaisou la imulinusi. Xe loxo nalulusou Mosinge vaikalaou la napolo va'axu sevile uasi. Mo no anu ilixo noxine la naxolaxola uasi mo so ane'i itaxaneni.

2 Kolini 8:21

Opo­nexi utulu lexe ilixomexi lamanasi no iou Tatananenge. Ia no iou Tata­nanengesi uasi, tama­saxau lexe ulamana no ie'i tamitema kalumo.

Xalesia 5:22

Ia nene'axu xaixai noxou Ulenu no anu xoluxolunenge aloxo 'o. Ilixo so sexela mo osa mo xoluxolu lalavulusi. Xe anu upamuxanenge so tapalea no anu la'ia uasi mo ta'oxonu alauna ilou ilixo laixe noxi'a leviani. Xe ilopalanenge no anu xaixai ma'ia la ta'oxonu ulovosi.

1 Pita 2:12

Muamua'ingenge ulapusi no taine'i tamitema so isivoxo. Xo masi ikalavoisinge lexe ngingi tamitema so susu 'o, ia loxo ilixomengi laixe upala'a no ie'isi la no anu voxo loxo Mosinge une'e 'o la i'itinu ualasouxu.

Ipilu 13:18

Xe loxo nexi 'o, ngapilixinexi noxou Mosinge. Xo nexi talavu lexe tanexi uai laixe no iou, ia oponexi ututulu lexe mimi mukalusi ta'oxonu, la no anu vote'i laixesi.

1 Timoti 4:12

Manina, nini namaulusi ia mamu so tamitema itaxaneni uasi no anu mi anene. Nini naxali loxo pikisa noxi'a talopala no anu vote'i aloxo 'o. Vaikalameni ilou muamua'ixene ulapusi. Xe sexela ilou lopala noxine pakia'usi. Xe xoluxolu noxine malemalengasi.

Epesusi 5:9

Ngamuamua'i no anu lamanaxu so ngaxalixu nene'axu aloxo 'o. Xoluxolu noxinge laixe mo malemalenga mo maninasi.

Taitusi 1:8

Mo loxo tamitema ine'e no tasou la uvu'uline'i laixe. Itema loxo natulusou ne la oponu utulu no anu mi ane laixe mo mulapusi. Loxo mi vile uxali la anu utilovosou laixe xo oponu ututu­luou masaxa noxou Mosingesi. Xe masamasaxa noxou upalusou vitanisi uasi, anu molu upamuxanu laixe.

1 Tioni 3:3

La tamitema mukalusi ta'ei ilopalanu ixomaiou Kalaisiti la ikalipalane'i no anu susu xo imasaxau xoluxolu malemalenga aloxo anusi.

1 Pita 1:22

Ioxe, ngingi ngelomuxu vaikala ane temanu manina la no anu vote'i anene nge'uingengi ngexali tamalemalenga no iou Mosinge. Xe ngingi a ngasexelaxa'a tavi­vinge Mosinge ta'olu, laso xavingengiou so ngasexelangenge no opongengi manina.

Taitusi 3:14

Xe napelototosi'a tamitema­menge so ilavu laixe no anu vote'i so su'uli. Laso loxo tamitema isoti no anu mi ma'ia xe isu'uline'i la uxalixu nene'axu laixe ane.

Lomu 13:13

Ngingi masi ngamuamua'i ulovo loxo tamitema ane imua­mua'i no anu lamanasi, ngapakisi loxo ane'i so isivoxo uasi. Loxo ngaxolaxola mo ngasipaki uasi. Xe ngingi nga'oxonu vasimenge vuluvulusi mo ilixo nuni'u uasi. Xe nga'avutinoxu tu'umaxu mo ngaisu'isu uasi.

Tiemisi 1:27

Vote'i ane malemalenga mo mulapu no iou Mosinge anu Maminge so tamulinu masaxa noxou aloxo 'o. Tavu'uline'i tamolomolo ane ta'oloxola xe tasema ane tamului'a misoisoli mo tasu'uline'i no anu tu'utu'umaxu noxi'a. Xe aloxo 'ola, taxolu va'axu no anu ili'ilixo masua so lialia 'o mo so anu utei uxolu noxinge uasi.

1 Tioni 3:18

O ta'alixeli moso 'o, mamu so talemolu sexela no ananenge vitanisi, ta'oxonu sexela manina no anu ilixomenge.

Taitusi 2:2

Laso noxi'a tamulu tatiatila la napelototosi'a aloxo 'o. Masama­saxa noxi'a upalusi'a uasi. Xe no anu vaikalai'a la isu'asu'anu vuluvulusi uasi mo so axone la tamitema itaxane'i. Mo lopala xe sexela noxi'a ututulu pumuxusi, uxiuxiu uasi.

2 Kolini 13:7

La nexi talavusou talingau su'ulisinge noxou Mosinge so ngasusu uasi. Ia anu tava'u so ilixomengi uvalaxu xaixai noxixe no ie'i tamotu uasi. Xo loxo opone'i lexe nexi tapunexisi, la anu mi vile uasi. Mi ane oponexi ututuluou ane so ngingi nga'oxonu ilixo mulapusi.

Kolosi 4:5

Xe anu laixe so lavulavu ilou tilovo noxinge u'asi'asi no anu vote'i so ngapamuxangengi no ie'i tamitema ane ilamana uao. Mo loxo tianisi uxali so ngalapune'i no anu Mosinge vaikalaou la ngapapunu uasi.

1 Pita 4:8

Xe mi ane mutiatila, a so xavingengi no anu sexelasinge ngato'o. Xo loxo tamitema isusunixinge ulolutu ia ngasexelaxa'asi, la anu umomomo so usu'asou mi ma'ia mi'oxonu mole usolixu avile.

Lomu 13:3

Xe itema ane u'oxonu ilixo masumasua la oponu u'ume ane xo xamani masi ulosou tu'umaxu. Ia loxo ngingi nga'oxonu ilixo laixesi la mi vile so nga'umolu uasi. Xamani ulosinge tu'umaxu uasi, uvikalasinge laixesi.

Taitusi 2:14

Anu mu'italonu maulixu so mulotonu lakolisou ili'ilixo noxinge mukalusi ane muxolaxola'u lo noxou Mosinge. Xe mu'ulosinge so texali tamitemaou malemalenga mu'isa­lili. Laso maixene oponenge utata­ma so ta'oxonu ili'ilixo ane laixesi.

Pilipai 3:1

Ioxe tavivilo, telexu aloxo 'o. Ngaxolu nga'osa no anu xoluxolu noxinge noxou Tatananenge. Loxo akaukavunu vaikala ano'ola la kalakalaxo no anu uasi xo axamulinu lexe anu so u'oxonu latolosinge.

Lomu 2:29

E uasi manina. Mi anene uxali no anu ulenenge. Mosinge usosovosinge no anu Ulenu Laixe. Xe tamitema ivikalasinge axova, la anu so vasimenengesi. Ia loxo Ulenu Laixe usosovosinge, la Mosinge molu uvikalasinge laixe.

1 Timoti 2:2

Mo ilingau su'ulisi'a takingi oli'a taxamani. Mo so axone la xoluxolunenge se'isisi mo lalavulusi ulovo no anu masaxa noxou Mosinge.

1 Timoti 5:10

Xe ilixo noxie aloxo 'o. Sema ane tamitema ivikalasie lexe ane sema so xaixai laixe mo ane misaxila'a tailie laixe. Xe ane milavusou misexelaxa'a mo mitavalixa'a taasila xe loxo talopala me'a no tuala vile mixali la mi'uinu tava'a. Xe loxo tamitema ane mitata­vulenu tu'umaxu la misu'uline'i mo opone mututuluou xaixai aneva lailaixe manina.

Epesusi 6:14

Mo asolonu aloxo 'o. Vote'i so ngatulu pumungenge aloxo 'o. Ta'ami isakinu laleti tatila so utanuxu talaxa'a, ia ngingi la ngasakinu vaikala manina no opongengi. Mo ane'i itelonu lasioti aini so lutune'i, ia ngingi la ngavaxanu ilixo malemalenga so u'utulungengi.

1 Tesalonaika 4:12

Mo so ngingi ngakamulinu mi vile so vasimenge uasi la tamitema no pa'upa'umenge imaisou xoluxolu noxinge lexe mulovosi.

Epesusi 4:25

Ioxe, laso vaikala kalakalavoi la ngamatapianusi. Ngalemolu vai­kala maninasi noxinge ngato'o. Xo nenge mukalusi 'o nenge vasimolu Kalaisiti, laso noxou la nenge vilesisi.

2 Kolini 6:8

Xe noxi'a leviani la itaxanexi ia leviani la ilu'enu ualasixe. Ane'i leviani ivikala masua no tumalixe ia leviani ia'alonexe laixe. Ane'i leviani i'oxo lexe nexi takakalavoi ia leviani ivalaxu vaikalamexi lexe maninasi.

Ta'aposeli 10:22

La ane'i mivikalanu lexe, “A Koniliasi e tatila noxi'a ta'ami 100 mupalusixe tene'e 'o. Anu ilixo noxou laixe mo umama'u noxou Mosinge. Ane'i Taiuta mukalusi itaxanu mo ivikala lexe anu itema laixe. Anu mupalusixe tene'e xo angelo laixe vile muvikalanu lexe u'avaline nalai no tasou so ulomusou vaikalameni.”

Tioni 7:18

Anu ena'ei loxo ulanu vaikala ane molu muxa­lixusi, la anene anu molu umasaxau u'itinumo ane. Ia ena'ei ane umasaxau u'itinu ualasou anu ane mupalusou mune'e, la anu ne anu maninasi mo mi vile ukilikalu uxolu noxou uasisi.

Luku 2:25

La no voxo anene itema vile a muxolu ne Ielusalemo ne, ualasou lexe Simioni. Anu xoluxolu noxou mulapusi mo oponu mututuluou masaxa noxou Mosingesi. Anu muxoxomaiou itema Mosinge musosovosou so uaisou tane'i Ta'isilaeli. La no voxo ne Ulenu Laixe a mupamuxanu Simioni ne.

Maki 6:20

xo Eloti mumama'u noxou Tioni. Mumama'u xo mulavu lexe anu itema ulapu mo ilixo noxou malemalenga no iou Mosinge. Laso anu mu'utululunu Tioni so umasua uasi. Xe loxo mulomusou vototovo noxou Tioni la anu mu'avutinoxu oponu mo tanulili. Ia anu mu'osa so ulomu­sousi.

Luku 16:15

Ia anu muvikalane'i lexe, “Ngingi ngale­molu vaikala so utalumeu mi ane no opongengi xo ngamasaxau lexe tamitema ikala­voi lexe ngingi talapusi, ia Mosinge ulavusou opongengi to. Mi ane tamitema i'itinu no taine'i lexe laixe manina la anu mi nuni'u manina no iou Mosinge.

1 Kolini 4:5

Molu utilovosilo ia voxosou uao. Laso mamu so ngingi ngatilotilovo kolokolo. Ngaxolu ngaxomaiou voxo so Tatananenge une'e. Une'e la uno'u mimi a utatalume no isivoxo mukalusi ka umulaxu no lamana. Xe no anu masamasaxa no oponenge tamitema la anu upala'anixusi. Laso ane, no voxo anene Mosinge molu uvikala laixe so xaixai noxinge aneva u'osasou.

Ta'aposeli 22:12

La no tuala Tamasikusi ne itema vile a muxoxolu, ualasou lexe Ananaiasi. Anu itema ne mumama'u noxou Mosinge mo oponu mututulu lexe umilunu lavuloto noxou. Taiuta no tuala ne ilavusou itaxanu itema ne.

1 Tioni 4:1

Tamaula, tamitema masi ine'e mo ivikala lexe, “Eni eno'u vaikala ano'o noxou Ulenu a.” Ia ngalopala noxi'a avile uasi, ngatilovosou vaikalai'a lexe molu noxou Ulenu Mosinge o uasi. Xo tamitema so pela'a kalavoi to a ixixaoxao no xale tuatuala mukalusi.

1 Timoti 5:2

Xe noxi'a tasema tatiatila la oponeni mama­laxu noxi'a aloxo ane'i tanenine. Xe noxi'a tavuanga kalumo la ilixo noxine malemalenga noxi'a aloxo tavivine tasema u'isalili.

Luku 23:50

Ioxe, vile noxi'a tatiatila noxi'a Taiuta ualasou lexe Iosepu. Anu itema laixe mo ilixo noxou mulapusi.

1 Timoti 3:4

Xe anu itema so usaxila'u pamili noxou laixe. Usaxila'u la upamu­xane'i ta'olu so ilai no anu masamasaxa noxi'asi uasi, imulinu pelototo noxousi.

Ta'aposeli 6:3

Laso tavivixe, ta'oxonu aloxo 'o. Ngingi menge ngailoune'i tamulu 7 no taingengi 'o. Ngai­loune'i ane'i ane ilixo noxi'a lamanasi mo ane'i ane Ulenu Laixe upamuxane'i mo lavulavui'a. Ukalu laso nenge tapilixine'i no anu xaixai ano'o.

Matiu 22:16

Laso ane'i mipalusi'a tatisaipelii'a oli'a laili e mivalaxu Eloti se'i milai noxou Iesua mo mivikalanu lexe, “Tisao, nexi talavu lexe nini namitema so vaikala maninasi. Nini napelototo no anu vaikalaou Mosinge manina­sousi mo namama'u noxi'a tamitema uasi. Ane'i tatiatila o tamitema vitanisi ne navikalane'i iou vilesisi.

Ipilu 11:2

Xo ane'i so tatei milopala noxou Mosinge la anu mu'osasi'axu.

1 Timoti 3:11

Xe tasemai'a kalumo, ixolaxola uasi. Xe ixixao mo imunumunu uasi, ixolu xavutalai'a uiave laixesi mo so xaixai ma'ia so i'oxonu la opone'i ututuluousi.

2 Kolini 8:18

Xe nexi tapalusou vivinge vile so ilou ine'e noxinge ne. Anu vivinge 'o ne, tatemanu pitapita milavusou ualasou xo no anu xaixai noxou e so ulanu vaikala laixe.

2 Pita 3:1

Laso tavivilo ane asexelangenge, ano'o lapasixeli tameisou akauka­vunu ulai noxinge so u'avutini­xinge mo ulivunoxu xavutalamengi so uxolu ulapusi.

Lomu 14:18

Loxo ngingi ngamulinu ilixo axone mo nga'oxonu xaixai noxou Kalaisiti la Mosinge u'osasou. Mo tamitema imaisou ilixo noxinge axone lexe laixe.