Uusu-uusu A Pol Hurula'aa Hunie Mo Rom 8:28 - Tataroha Diana

²⁸ Na kie saie loꞌu uri a God ko esu i lalo aana ahutana walu ola ko reu-reu hunie ke haꞌadianaꞌakie, mo iini e soikie oto i sulie oalaꞌinge ingeie na kie ko manata diana hunie.

Uusu-uusu A Pol Hurula'aa Hunie Mo Rom 8:28 Referans Kwoze

1 Pita 5:10

Maholo ienini, omu ko sapesalu mola hunie kele maholo oꞌoruꞌe, taꞌe a God e manata diana huniꞌomu oto liutaa. Ingeie ni oto e soiꞌomu huni lado peꞌie a Kraes na huni iiꞌo peꞌie aana manikuluhaꞌana nge e saꞌa mango ike loꞌu aana taꞌena nga maholo. Oto a God maraana kei haꞌasusue taane hiiwalaimolinge iꞌomu na kei niie nanamanga huniꞌomu hunie omu ke uure maꞌutaꞌa tarau mala iini e neꞌi rato oto aana oodo-oodonga.

Jemes 1:12

Mala uri nga iini nge oohongilana ko lae na ko uure maꞌutaꞌa mola, nge ke ilenimwaꞌe mola. Aena aana i purine oohongilana hiiwalaimolinge ingeie ko lae urine, nge a God kei waaie aana rorodara ni meurihe huu, nge e haiholotaꞌinie hunie mo iini nge kire manata diana hunie.

1 Korinit 2:9

Taꞌe leune ko haataꞌinie oto uri Uusu-uusu Maaꞌi ko ere toꞌohuu aana e unue uuri, A God e dau aakau aana mei ola nge e diana liutaa hunie mo iini nge a God maraana e manata diana hunire. Na mei ola diana ngeena nga iini e kaꞌa leesie ue, wa nga iini ke rongoa, wa ke loꞌo-loꞌongaꞌinie uri kei reu. Aesaea 64:4

Uusu-uusu A Pol Hurula'aa Hunie Mo Rom 8:30

Na mwala nge a God e oalaꞌi urine hunire oto uure mai naꞌo, e mani soire oto loꞌu mai i saana. Na e da oto hunie kire ke mani neꞌi iinoni oodotaꞌi i maana, na e niie oto manikuluꞌanga ingeie hunie ahutada mango.

2 Timoti 1:9

Aana a God e haꞌa-uurikie na e lio hilisikie oto hunie kie ke neꞌi iinoni maaꞌi ingeie. E kaꞌa asuie ike mola leune aena aana kie malisi wa uri kie asuie nga mei ola diana adongana. !Haꞌike! Taꞌe e oalaꞌinie urine mola aana e tohungei sare haꞌadianaꞌakie. Uure oto wau i naꞌo na haꞌaholanga haꞌike ue, a God e oalaꞌinie oto uri a Jisas Kraes kei haꞌadianaꞌakie oto urine.

1 Korinit 1:9

Aana a God, iini nge e soiꞌomu hunie omu ke iiꞌo ruru peꞌie a Kalena, e sai deu i sulie walana, na a Kalena oto Aalaha ikie a Jisas Kraes.

Haataꞌinge 3:19

Omu ke saie mola uri no ko tohungei ere aana mo iini nou manata diana hunire na no ko haꞌaloire. Oto aena urinena, omu ke aaliꞌu mei mwaanie mo oorahaꞌaa iꞌomu, na omu ke asu aꞌailaꞌa peꞌie mwaꞌe-mwaꞌenga.

Kalesia 1:15

!Taꞌe lae-lae, a God e oolisie manataku! Aana manata-diananga a God e paine hunieu, na aana ko ilenimwaꞌe ni esuie urine, nge uure oto aana maholo na nou kaꞌa hute ue, taꞌe a God e oopaau oto huni esu nana.

1 Tesalonaeka 5:9

Aana a God e kaꞌa haꞌaholakie ike uri hunie ke haꞌamotaahikie aana dinge ni leinge. !Haꞌike! Taꞌe e haꞌaholakie hunie Aalaha ikie a Jisas Kraes, ke haꞌa-uurikie.

Tataroha Diana I Sulie A Jisas Kraes Nge A Mak E Uusue 12:30

O ke manata diana hunie a God, aalaha iꞌoe, oto aana ahutana saemu, na aana ahutana maurihaꞌamu, na aana ahutana mo neꞌisaenga iꞌoe, na aana ahutana aꞌailaꞌanga iꞌoe. Diutronomi 6:4-5

Epesas 3:11

A God e asuie oto mei olana i sulie oalaꞌinge ingeie uure oto mai naꞌo, na e haꞌa-oaie leune oto aana asunge Aalaha ikie a Jisas Kraes.

Jemes 2:5

Omu ke rongo kaꞌu, maeni eesiku maaꞌi. A God e lio hilisie mo iini e maitale aana walumalau ie hunie kire ke toꞌo-toꞌo aana hiiwalaimolinge, na huni toꞌo aana aalahanga nge e haiholotaꞌinie hunie mo iini nge kire manata diana hunie.

1 Jon 4:19

Oto ikie, kie ko mana-manata diana aena aana a God oto e holaꞌi manata diana hunikie.

2 Timoti 2:19

Taꞌe maꞌalana ngaeta mo iini ko neꞌisae rue-ruaꞌa urine, soihaadaꞌinge e saꞌa rongo ike hunire aena aana soihaadaꞌinge e toꞌo aana taane poo-pootana nge e kaꞌa sai esuleꞌi ike. Na a God e uusue mo wala i sulie soihaadaꞌinge ingeie uuri, “A Aalaha e manataꞌinie taane mo iini ingeie,” na loꞌu uuri, “Ahutana mo iini ko unue uri kire hiiwalaimoli aana a Aalaha, kire ke mani toliꞌaasie oto mo tolahai ola aaela ikire.”

1 Jon 4:10

Tohungana manata-diananga ni otona. Manata-diananga ikie hunie a God e kaꞌa tohungei diana ike urine, taꞌe ingeie ni e tohungei manata diana hunikie toꞌohuu aana e uusungeꞌinie mai a Kalena uri hunie ke neꞌi uunu-olanga huni tapa oolisie mo oorahaꞌaanga ikie.

Uusu-uusu A Pol Hurula'aa Hunie Mo Rom 9:11

Maholo na kirerue kaꞌa hute ue, taꞌe a God e lae oto mola i sulie oalaꞌinge ingeie, na e lio hilisie taꞌa-taꞌa iini aana ro mwelana. Aana maholona, na nga iini aadarue e kaꞌa da ue nga mei ola diana, wa ke dau huꞌisie nga mei ola.

2 Korinit 5:1

Kie ko oꞌoꞌo mola mai laona walumalau peꞌie mei sape mamaelaꞌa nge hule aana e kaꞌa sai iiꞌo tewa ike, na e urihana mola iiꞌonga aana mo aapa-aapa i meꞌesu. Na maholo oho-aasilana mo aapa-aapa ngeena kei lae, nge kie ke si lae hunie mo nume diana oto liutaa. Aana kie saie uri a God e dau aakau aana mei sape diana liutaa naka huni iiꞌo aana taꞌau i Lengi, ola ingeie maraana e asuie na iini kei iiꞌo oto huu.

Kalesia 5:8

A God haꞌike ni e haꞌa-olaꞌomu nge omu huꞌiteꞌi ngeena, aena aana ingeie kaꞌu e holaꞌi lio hilisiꞌomu hunie tala oodo.

Palonga 13:48

Oto maholo mo Aapoloa Aaopa kire rongoa mei wala ngeena, kire ko si tohungei ilenimwaꞌe na kire ko paalahea oto Aalaha haahie mei wala ingeie ngeena. Na mo iini nge a God e lio hilisire hunie kire ke toꞌo aana maurihe huu kire hiiwalaimoli oto aana.

Uusu-uusu A Pol Hurula'aa Hunie Mo Rom 11:29

Aana maholo a God ko lio hilisie oto nga iini na ko niie haꞌadianaꞌanga oto hunie, e saꞌa heꞌi oolisie ike loꞌu saena.

1 Korinit 1:2

Mere ko uusu-uusu oto wau ienini huniꞌomu aana soihaadaꞌinge a God wau i Korinit. Iꞌomu oto a God e soiꞌomu uri omu ke neꞌi iinoni maaꞌi ingeie aani iiꞌo-rurunge peꞌie a Jisas Kraes, mala ahutana mo iini ko palo-paloa satana aalaha ikie aana taꞌena nga leu.

1 Korinit 1:24

Taꞌe hunikie mo iini nge a God e soikie oto, mo Jiu na oto mo Aapoloa Aaopa, mei wala aana a Kraes ienini ingeie oto nanamanga na saenanaunge a God.

Kalesia 1:6

No ko tohungei pangataꞌi aana omu tolana toliꞌaasie oto a God, iini e soiꞌomu aana manata-diananga a Kraes huni neꞌi iinoni ingeie. Taꞌe ie omu toliꞌaasie oto, na omu ko eeliꞌu loꞌu mola huni rongo i sulie ngaeta taungei tataroha diana aaopa.

Epesas 4:1

Ineu mwane nge nou iiꞌo i laona nume ni hoꞌo haahie uri no ko esu nana Aalaha, no ko unue oto huniꞌomu uuri. Omu ke iiꞌo oodotaꞌi i sulie tolahai iinoni nge e malisine mo iini nge a God e soire hunie kire ke neꞌie mo iinoni ingeie.

Pilipae 3:14

Oto no ko huru aꞌailaꞌa hunie uri ne ke hele aana waaite taꞌau i Lengi, nge a God e soieu hunie ne ke hele aana i tehulaꞌana a Jisas Kraes.

Hibru 9:15

A Kraes e mae honotana mo oorahaꞌaanga nge mwala e dau-deuꞌi aana maholo kire iiꞌo ue i melutana haiholotaꞌinge holaꞌinaꞌo ngeena. Na aana maenga, nge a Kraes e haꞌawalaimoliꞌaa haiholotaꞌinge haalu a God ngeena, uri hunie mwala nge a God e soire oto mai i saana, kire ke helesie nga taa e haiholotaꞌinie hunire. Na mei olana oto maurihe huu taꞌau i Lengi.

1 Pita 2:9

Taꞌe iꞌomu oto, a God e lio hilisiꞌomu nana. Iꞌomu oto mo pris a Inemauri, na iꞌomu oto mwala maaꞌi ingeie. Iꞌomu oto mo tohungei iinoni a God maraana, nge e lio hilisiꞌomu huni tarohaꞌinie tolahai esunge diana ingeie. Aana a God oto e soiꞌomu mei mwaanie rodohono na omu lai sili i laona raa-raa ingeie e manikuluꞌe.

1 Pita 3:9

Maholo nga iini ko deu huꞌisiꞌomu aana nga mei ola aaela, omu ke suꞌuri oolisie loꞌu hunie. Na maholo nga iini ko ere aaelasiꞌomu, omu ke suꞌuri heꞌi ere aaelasie loꞌu. !Haꞌike! Taꞌe omu ke haꞌadianaꞌara mola, aana a God e soiꞌomu mei i saana hunie omu ke dau urine, na hunie omu ke helesie haꞌadianaꞌanga ingeie haahie.