Palonga 21:8 - Tataroha Diana

⁸ Oto aana dinge loꞌu i puri, melu uure i leune melu si lae loꞌu hunie huilume paine i Sisaria na melu ko lai iiꞌo peꞌie a Pilip wau i nume ingeie. Ingeie mwane ko tarohaꞌinie noꞌone Tataroha Diana, na ingeie ngaeta iini noꞌone aana e hiu mwane nge kire lio hilisire kaꞌu taꞌau i Jerusalem huni lio i sulie mo niinge.

Palonga 21:8 Referans Kwoze

Palonga 6:5

Oto ahutana mwala kire rongoa mei wala ngeena kire ko si ilenimwaꞌe haahie. Oto kire si lio hilisie a Stivin, na a Pilip, na a Prokoras, na a Nikeno, na a Timon, na a Pamenas, na a Nikolas. Hiiwalaimolinge a Stivin ngeena e tohungei susu, na e honu aana Liꞌoa Maaꞌi. Na a Nikolas ngeena e hute aana mo Aapoloa Aaopa aana huilume i Antiok, taꞌe e talamaꞌinie tolahana mo Jiu na e neꞌie oto ngaeta iini aada.

Epesas 4:11

Na ingeie oto e niie mo niinge hunie soihaadaꞌinge ingeie, aana e lio hilisie nga mo iini huni neꞌi hurulaꞌaa, na nga mo iini huni neꞌi propet, na nga mo iini huni tarohaꞌinie Tataroha Diana, na nga mo iini huni lio i sulie soihaadaꞌinge, na nga mo iini huni haꞌa-uusulie mwala.

2 Timoti 4:5

Taꞌe iꞌoe oto o ke loꞌo-loꞌongaꞌi diana tarau, na o ke uure aꞌailaꞌa mola maꞌalana uri o ko lae oodoie loꞌu aasanga. O ke lae taraꞌasi mola peꞌie tarohaꞌinilana Tataroha Diana, na o ke asuie toꞌohuu mei esunge a God e niie huniꞌo ngeena.

Palonga 28:16

Maholo melu hule oto wau aana huilume paine i Rom, kire kaꞌa aasie ike a Pol i laona nume ni hoꞌo, taꞌe kire toliꞌaasie hunie a Pol ke iiꞌo mola maraana aana nga nume. Taꞌe ngaeta ramo ko oꞌoꞌo taane tarau peꞌie hunie ke kakakalie.

Palonga 16:13

na aana Dinge Maaꞌi Mo Jiu, melu loꞌongaꞌi huni lae i nume ni palo-palo mo Jiu, taꞌe nga nume ni palo-palo haꞌike i leune. Oto melu iisitaa mwaanie huilume ngeena, na melu lae i sulie wai aana melu loꞌongaꞌinie uri saꞌa mola mo Jiu kire toꞌo aana nga kele leu huni aare-aarea God i leune. Oto melu leesie ngaeta mo huꞌe ni Jiu kire loko, nge melu si iiꞌo i aano huni ere-ere peꞌire.

Palonga 16:10

Purine a Pol e leesie mei haataꞌinge ngeena, nge melu si teuleꞌi huni lae hunie poꞌo ni henue i Masedonia, aana melu saie oto uri a God nge e soiꞌemeelu huni lai tarohaꞌinie Tataroha Diana hunie mwala i Masedonia.

Palonga 9:30

Oto maholo mo eesine i lalo aana Kraes kire rongo urine, kire si toolea a Sol wau hunie huilume paine i Sisaria, na kire ko uusungeꞌinie loꞌu weu hunie huilume paine i Tasas.

Palonga 28:11

Purine oolu waro-waro e mango melu si lae mwaanie mala-malau ngeena aana ngaeta haka nge e oꞌoꞌo kaꞌu mola i leune aana mo waro-waro ko mawa ngeena. Haka ngeena e uure mwaanie huilume i Aleksandria, na satana “E ro iu god.”

Palonga 27:1

Maholo kire unue uri melu kei lae aana haka hunie poꞌo ni henue i Itali, kire si niie a Pol na ngaeta mo mwane nge kire ko iiꞌo i laona nume ni hoꞌo noꞌone hunie ngaeta ramo paine haahie nga tangalai ramo hunie ke kakalire. Ramo ngeena satana a Jiulias na ingeie aana pulitaa ni ramo kire haaraꞌinie “Pulitaa ni Ramo a Inemauri Peine ni Rom.”

Palonga 23:23

Oto poro paine haahie sinolai ramo ngeena e si soie mai e ro iini aana mo mwane paine ingeie haahie nga tangalai ramo, ko si teꞌuri hunirerue, “More ke dau aakau aana e ro tangalai ramo huni lae i Sisaria i rodo siꞌiri aana siwana nga maholoi sato. Na more ke dau aakau noꞌone aana e ro tangalai ramo nge kire sai heiseuni peꞌie mo noma, na loꞌu e hiu aawalai ramo huni huru aana mo hoos.

Palonga 20:13

Oto a Pol e haꞌarongoꞌemeelu aana ko sare liu i tala, na uri ke si hekusiꞌemeelu loꞌu weu aana huilume i Asos. Oto melu holaꞌi lae oto aana haka hunie i Asos.

Palonga 20:6

Taꞌe iꞌemeelu, melu iiꞌo mola aana huilume i Pilipae lae hule aana mo dinge aana Houlaa Ni Liumwaanie e haro mango. Oto melu si taꞌe aana haka, na purine e lime hai dinge nge melu si oodoie loꞌu mo mwane i Troas. Na melu ko iiꞌo loꞌu i leune hunie e hiu hei dinge.

Palonga 18:22

Maholo kire hule aana huilume i Sisaria, a Pol e lae taꞌau i Jerusalem nge ko si ere-ere peꞌie mwala aana soihaadaꞌinge taꞌau i leune. Oto purihaꞌana nge e si lae hao loꞌu hunie i Antiok.

Palonga 16:16

Oto aana ngaeta hai dinge maholo melu ko lae aana leu ni aarengaꞌinge i sulie wai ngeena, melu oodoie nga keni haalu ko euꞌesu mala koni-konihe nana ngaeta mo mwane. Na a keni ngeena liꞌoa aaela nge aana, na ko unu-unue walu ola kei reu ue mai. Na mo mwane paine haahie koni-konihe ngeena kire ko tohungei tei-terie mei toꞌoha paine aana.

Palonga 10:1

Ngaeta mwane ni Rom e oꞌoꞌo wau aana huilume i Sisaria, satana a Konilias na ingeie ngaeta naꞌohai ramo haahie tangalai ramo aana pulitaa ni ramo nge kire haaraꞌinie aana, “Pulitaa mo Ramo ni Itali.”

Palonga 21:16

Na ngaeta mo pwaarongoisuli i Sisaria kire hakusiꞌemeelu noꞌone huni tooleꞌemeelu hunie nume melu kei iiꞌo aana oto taꞌau. Nume ngeena, nume a Nason, mwane ni Saepras na ko lulu i sulie a Jisas oto uure wau i naꞌo.