Palonga 18:24 - Tataroha Diana

²⁴ Aana maholona noꞌone ngaeta mwane ni Jiu nge e hute aana huilume i Aleksandria ko lae mai hunie i Epesas, na satana a Apolos. E tohungei saenanau aana ere-luhesilana mo neꞌisaenga na e tohungei saenanau noꞌone aana mo Uusu-uusu Maaꞌi.

Palonga 18:24 Referans Kwoze

Taetas 3:13

O ke peꞌie a Sinas, poro e saenanau aana mo haꞌatolanga, na a Apolos, mwaanie kirerue tola talea nga mei ola aana laenga ikirerue.

1 Korinit 4:6

Maeni eesiku maaꞌi, walu ola ienini no ko unuꞌi i suliꞌemereꞌi a Apolos hunie omu ke saenanau aana tolahamereꞌi. Ngaeta mei wala e teꞌuri, “Mwaanie omu liue nga taa uusulana e lae i laona Uusu-uusu Maaꞌi.” Mala uri omu kei teꞌurine, nge omu saꞌa unu-unue ike uri nga iini e paine liutaa aana nga iini, na omu saꞌa toohaꞌiniꞌomu ike maraamiu aana omu ko lae i sulie iini nge omu unue e paine, na omu saꞌa ere aaelasie loꞌu nga iini.

1 Korinit 16:12

Aasikaelu maaꞌi, a Apolos, no ko unu-unue taane hunie uri ke lae kaꞌu peꞌie ngaeta mo iini hiiwalaimoli huni keliꞌomu, taꞌe e kaꞌa neꞌisae ike ue ni lae wau aana kele maholo ienini. Mala ko toto diana hunie aana nga maholo, nge ke si lae taane wau.

1 Korinit 1:12

Ngaeta mo iini eemiu ko unu-unue uuri, “Ineu aana aapa a Pol.” Na ngaeta mo iini loꞌu uuri, “Ineu aana aapa a Apolos.” Na ngaeta mo iini loꞌu uuri, “Ineu aana aapa a Pita.” Na ngaeta mo iini loꞌu uuri, “Ineu aana aapa a Kraes.”

Palonga 6:9

Taꞌe ngaeta mo mwane ni Jiu kire ko leledie mola a Stivin. Mo mwane ngeena kire uure mwaanie mo huilume haꞌatau i Saerin na i Aleksandria na e ro poꞌo ni henue i Silisia na i Esia. Na kire mani sai loko aana nume ni palo-palo mo Jiu nge kire haaraꞌinie aana Nume Ni Palo-palo Mwala Kire Iiꞌo Luhetaꞌi Loꞌu. Oto mo mwane ngeena kire ko aehota haꞌa-ere oto peꞌie a Stivin,

Kolosi 3:16

Omu ke iiꞌo diana hunie haꞌa-uusulinge a Kraes ke haataꞌi aana taꞌena nga ola omu ko esuie. Oto maholo omu ko haꞌa-uusuliꞌomu heiliu wa omu ko haꞌasaie nga iini, taꞌe saenanaunge ingeie ke si haataꞌi i leune. Na omu ke paalahea God aana ahutana saemiu aani kanalilana mo kananga aana Uusu-uusu Maaꞌi, na mo kananga maaꞌi lalahuꞌe, na mo kananga haalu nge Liꞌoa Maaꞌi ko niiꞌi mei hunikie.

2 Korinit 10:10

Nou saie taane uri nga mo iini eemiu ko unue uuri, “Mo uusu-uusu a Pol kire tohungei rongo hiꞌe oto hiitoꞌo, taꞌe maholo kei iiꞌo peꞌikolu oto e si mamaelaꞌa mola na walana kaꞌa urihana ike loꞌu nga mei ola.”

Palonga 27:6

I leune nge a Jiulias e leesie ngaeta haka e uure i Aleksandria na ko lae hunie i Itali. Oto poro paine haahie tangalai ramo ngeena e unue melu ke lae loꞌu aana haka ngeena.

Palonga 7:22

Na kire ko haꞌa-uusulie oto aana saenanaunge ikire mwala ni Ijip na e neꞌie mwane nanama aana erenga na aana asunge noꞌone.

Tataroha Diana I Sulie A Jisas Kraes Nge A Luk E Uusue 24:19

Oto a Jisas ko dolosi aadarue uuri, “?Nga mo ola uri taa?” Oto kirerue ko unue uuri, “Mo ola nge kire rau aana a Jisas iini ni Nasaret. A mwaena ingeie nga haꞌa-uusuli diana na propet nanama nge a God e neꞌisae paine haahie na ahutana mwala kire haꞌamaꞌu aana.

Matiu 13:52

Oto a Jisas ko si aalamire loꞌu uuri, “Nge ko urine ahutana mo haꞌa-uusuli aana mo Haꞌatolanga a Mosis nge kire lae mai neꞌi pwaarongoisuli i laona Aalahanga a God, kire urihana iinoni e toꞌo aana nume. Na nume ngeena e honu aana mo ola diana huni peꞌie mo iinoni, mo iini e lalahuꞌe, na nga mo iini mo ola haalu. Aana iinoni urine e sai haꞌa-uusuli aana mo tolahai ola lalahuꞌe, na mo ola haalu noꞌone.”

Palonga 18:28

E tohungei peꞌire hiitoꞌo sulie e ere raramaa hunie mo Jiu i maana mwala, na ko haataꞌi diana aana mo leu nge loꞌongaꞌinge ikire e lae takalo. Na ko lado luhesie loꞌu mo wala i laona Uusu-uusu Maaꞌi huni haataꞌinie uri a Jisas oto a Kraes, a Haꞌa-uuri nge a God e haiholotaꞌi huni uusungeꞌinie mai.

Palonga 18:19

kire ko lae holosie aasi oto hunie huilume paine i Epesas. Kire lai hule wau i Epesas nge a Pol e si lae mwaanie a Prisila na Akuila, na ko lae maraana oto i laona nume ni palo-palo mo Jiu ni ere-ere peꞌire.

Palonga 18:21

Maholo ko deu aakau oto huni lae mwaanire, oto ko teꞌuri, “Mala uri a God e saetoꞌo aana ne ke ooli loꞌu mei, nge omu ke leesieu loꞌu i leu.” Oto e si lai taꞌe aana haka, no ko lae oto mwaanie i Epesas.

Palonga 19:1

Maholo a Apolos e iiꞌo ue aana huilume i Korinit i laona poꞌo ni henue i Akaea, a Pol e hane holo i henue e si lai hule aana huilume paine i Epesas, na ko oodoie ngaeta mo pwaarongoisuli.