A God e tohungei manata diana hunie walumalau, hule aana e uusungeꞌinie taꞌa-taꞌa mwela mouteꞌi ingeie ke mae oalana, hunie taꞌena nga iini ko hiiwalaimoli aana ke suꞌuri eiꞌaa, taꞌe ke helesie maurihe huu i tehulaꞌana.
“Oto poro paine nge e toꞌo aana hohola ngeena ko loꞌongaꞌi uuri, ‘?Ne kei ue eena? Ne kei uusungeꞌinie kele madu ineu. Saꞌa mola ingeie haꞌalaa kire kei haꞌamaꞌu aana.’
Oto lae-lae a mwaena e toꞌo aana mola taꞌa-taꞌa iinoni e oore loꞌu huni haꞌatolaa, taꞌe taꞌa-taꞌa mwela mouteꞌi ingeie ni otona. Oto a porona ko si uusungeꞌinie oto a kalena, aana e loꞌongaꞌi uuri, ‘A kaleku haꞌalaa kire kei haꞌamaꞌu aana.’
Na aana maholona noꞌone mei wala e uure mai taꞌau i Lengi ko teꞌuri, “Hahuꞌana kaleku ni ienini, na nou tohungei manata diana hunie, na no ko ilenimwaꞌe oto liutaa haahie.”
Nga taꞌa-taꞌa iini e kaꞌa leesie ike ue a God. Taꞌe taꞌa-taꞌa mwela mouteꞌi ingeie ko oꞌoꞌo peꞌie Aamana, na aana ingeie tohungei God noꞌone, ingeie oto e haataꞌi diana aana a God hunikie.
Oto poro painena ko heꞌi uusungeꞌinie loꞌu taꞌau ngaeta mo koni-konihe hunge loꞌu liutaa aana mo iini holaꞌinaꞌo. Na mwala ko lio i sulie hohola ngeena ko heꞌi teꞌurine loꞌu mola aada.
Taꞌe maholo mwala auꞌesu ngeena kire leesie a kalena, kire ko si meni ere i sulie mola uuri, ‘Mwane nge kei toꞌo aana hohola ngeena oolisie aamana oto ie. Kolu ke horo maesie mola hunie kolu ke toꞌo aana oto hohola ienini.’