Jiud 1:3 - Tataroha Diana

³ Maeni malahuku, nou tohungei saetoꞌo aana uri ne ke uusu-uusu oto huniꞌomu i sulie mei haꞌa-uuringe nge kolu meni toꞌo aana. Nou sare ere haꞌasusuꞌomu loꞌu uri hunie omu ke uure aꞌailaꞌa peꞌie mei wala toꞌohuu nge kie mani hiiwalaimoli oto aana. A God e niie oto mei wala ngeena hautaꞌai hunikie, ahutana mo iinoni ingeie, na e saꞌa roroꞌa oolisie ike oto ooꞌoo.

Jiud 1:3 Referans Kwoze

1 Timoti 6:12

Mo ola oto hunge kei uure huni ooho honosie hiiwalaimolinge iꞌoe, taꞌe o ke ooho diana mola, na o ke hele maꞌutaꞌa aana maurihe huu. A God e soiꞌo hunie maurihe maholo o unu tahangaꞌinie i naꞌona ruruhaa uri o hiiwalaimoli aana a Jisas.

Pilipae 1:27

Oto maꞌalana uri ne ke lae loꞌu mei leesiꞌomu wa haꞌike, taꞌe tolahamiu ke oodo oto malisine Tataroha Diana a Jisas Kraes. Na nou sare rongoa uri omu ke mani esu loko-loko taane peꞌie taꞌa-taꞌa mei sae aani helinge honosie mo iini ko sare dau tekelaꞌinie hiiwalaimolinge aana Tataroha Diana.

Jiud 1:20

Taꞌe iꞌomu, maeni malahuku, hiiwalaimolinge iꞌomu e tohungei maaꞌi. Na omu ke uure maꞌutaꞌa i lengine tohungana hiiwalaimolinge iꞌomu ngeena, na omu ke aarengaꞌi i sulie neꞌisaenga a Liꞌoa Maaꞌi peꞌie nanamanga ingeie.

Haataꞌinge 12:11

Oto maholo ie e saꞌa haꞌasusungeꞌinie loꞌu mo eesike aana kire aꞌailaꞌasie oto aana apune a Kalei Sipu, aana walaimolinge kire tarohaꞌinie, aana kire toliꞌaasie maurihaꞌada i tehulaꞌana.

Taetas 1:4

Oto no ko uusu-uusu weu huniꞌo, mwela maaꞌi ineu, na o saie oto uri o neꞌi tohungei kaleku toꞌohuu aana hiiwalaimolinge ikure e mani sada. No ko aarea a God Aamaka na a Jisas Kraes a Haꞌa-uuritaka uri hahuꞌana manata-diananga na hanuelamanga ke iiꞌo peꞌiꞌo.

Haataꞌinge 2:10

Mwaanie omu meꞌu-meꞌuteꞌinie nga mei ola aana walu ola nge karaꞌinie oto kire kei reu eemiu ngeena. !Omu ke rongo kaꞌu! A Pwelu Eero-eero kei malaahongamiu na kei aasie ngaeta mo iini eemiu i laona nume ni hoꞌo, na taungeꞌinilemiu kei lae mola i sulie aawalai hei dinge haahuu. Omu ke hele susuleꞌi mola aaku lai hule aana maenga, oto ne kei niie huniꞌomu rorodara ni meurihe.

2 Timoti 1:13

Oto o ke lae i sulie mo haꞌa-uusulinge toꞌohuu nge o rongoꞌi mwaanieu, na o ke haꞌa-aꞌailaꞌaa hiiwalaimolinge iꞌoe aana a Jisas Kraes, na o ke haimaanie manata-diananga ingeie hunie mwala.

1 Timoti 1:18

E kaleku Timoti, mo wala nge no ko uusuꞌi weu huniꞌo ie kire kaꞌa ere aaopa ike mwaanie walana a God nge mo propet aana soihaadaꞌinge kire unu-unuꞌi keꞌu oalamu. No ko unue huniꞌo urine hunie o ke lulu i suliꞌi na hunie o ke ooho aꞌailaꞌa mala ngaeta ramo diana a Jisas.

Kalesia 2:5

Taꞌe melu kaꞌa rongo ike hunie mo haꞌa-uusuli eero-eero ngeena, aana melu saetoꞌo aana uri walaimolinge aana Tataroha Diana ke iiꞌo huu eemiu mo Aapoloa Aaopa.

Hibru 13:22

No ko eitanaiꞌomu, maeni eesiku maaꞌi, uri omu ke rongo diana aana mei wala ni haꞌasusulemiu ienini, aana nou kaꞌa uusu-uusu tewa ike.

Palonga 9:22

Taꞌe walana Sol mone ko nanama loꞌu liutaa suli dinge, na e tohungei ere luhesie hunie mwala ni Jiu i Damaskas uri a Jisas oto a Kraes, hule aana e aasa hunie nga iini kei aalamie loꞌu.

1 Tesalonaeka 2:2

Omu saie taane uri i naꞌona melu lae mai seemiu i Tesalonaeka, mwala e tohungei teungeꞌiniꞌemeelu na kire ere aaelasiꞌemeelu oto hiitoꞌo wau i Pilipae. Taꞌe maꞌalana mwala hunge kire sare uure honosiꞌemeelu, a God ikie e peꞌi diana aameelu taane mola huni aatopuri aana maꞌunge na huni haꞌarongoꞌomu aana Tataroha Diana a God.

1 Korinit 15:3

Aana mo eehuꞌi ola niilana e holaꞌi lae hunieu, oto nou haꞌarongoꞌomu eeni. A Kraes e mae honotana mo oorahaꞌaanga ikie, oto mala uusulana e lae i laona mo Uusu-uusu Maaꞌi.

Palonga 4:12

Aana a Jisas mola e sai haꞌa-uurikie mwaanie mo oorahaꞌaa ikie, aena aana a God e kaꞌa niie ike loꞌu satana nga iini aaopa huni haꞌa-uurikie.”

Palonga 18:28

E tohungei peꞌire hiitoꞌo sulie e ere raramaa hunie mo Jiu i maana mwala, na ko haataꞌi diana aana mo leu nge loꞌongaꞌinge ikire e lae takalo. Na ko lado luhesie loꞌu mo wala i laona Uusu-uusu Maaꞌi huni haataꞌinie uri a Jisas oto a Kraes, a Haꞌa-uuri nge a God e haiholotaꞌi huni uusungeꞌinie mai.

Palonga 17:3

na ko lado luhesie mo neꞌisaenga hunire aana mo wala i laona mo Uusu-uusu Maaꞌi. Na e tohungei haataꞌi diana aana hunire uri a God e oalaꞌinie oto uri a Kraes kei sapesalu, na purihaꞌana kei heꞌi meuri eelihoꞌi loꞌu mwaanie maenga. Na e teꞌuri, “A Jisas nge no ko houleꞌinie huniꞌomu ienini, ingeie oto a Kraes nge omu ko maa-maaꞌoohie.”

Jiud 1:17

Taꞌe maeni malahuku, omu ke aama-aamasitoꞌo aana nga taa nge mo hurulaꞌaa Aalaha ikie a Jisas Kraes kire ere lalai aana oto waite.

2 Pita 1:1

Saediananga mwaanieu a Saemon Pita, koni-konihe na hurulaꞌaa a Jisas Kraes, huniꞌomu mo iini nge omu hiiwalaimoli noꞌone aana a Jisas Kraes mala iꞌemeelu. Ingeie oto a God na a Haꞌa-uuritaka, na aena aana e tohungei oodotaꞌi na ko sare dau diana mola hunie ahutaka, nge hiiwalaimolinge e niie mai huniꞌomu ngeena e sada mola peꞌie hiiwalaimolinge iꞌemeelu mo hurulaꞌaa.

1 Pita 5:12

Ngaeta aasikaelu aana hiiwalaimolinge nge nou sai norutoꞌo aana liutaa, nge a Saelas, na ingeie ni oto e peꞌieu huni uusue kele uusu-uusu oꞌoruꞌe ie huniꞌomu. Uusu-uusu ie nou uusue mola huni haꞌananauꞌomu na huni ere haꞌasusuꞌomu uri hahuꞌana manata-diananga a God huniꞌomu ke iiꞌo oto tarau peꞌiꞌomu maꞌalana nga taa ke rau-reu loꞌu eemiu. Oto omu ke iiꞌo susu oto aana.

Kolosi 1:2

mere ko uusu-uusu ienini huniꞌomu, maeni eesiku maaꞌi, nge omu ko lulu i sulie a Jisas toꞌohuu wau aana huilume i Kolosi. Melu ko eitanaie a God Aamaka uri hahuꞌana manata-diananga na hanuelamanga ingeie ke iiꞌo peꞌiꞌomu.

Pilipae 1:1

Saediananga mwaanieu a Pol na a Timoti, e ro koni-konihe a Jisas Kraes hunie ahutemiu mwala nge omu hiiwalaimoli aana Jisas Kraes, nge omu iiꞌo wau aana huilume i Pilipae, na noꞌone hunie mo naꞌohai mwane iꞌomu haahie soihaadaꞌinge, na mo iini aani heiraretaꞌinge i laona soihaadaꞌinge.

Epesas 1:1

Saediananga mwaanieu a Pol, iini nge a God maraana e lio hilisieu uri hunie ne ke neꞌi hurulaꞌaa nana a Jisas Kraes. No ko uusu-uusu weu huniꞌomu mo iinoni a God wau aana huilume i Epesas, nge omu ko lulu i sulie a Jisas Kraes toꞌohuu na omu lado oto peꞌie.

Kalesia 6:11

Leesie kaꞌu mo uusu-uusu peine no ko esuiꞌi ie aana no ko uusu-uusu huniꞌomu oto aana kiꞌiku maraaku.

Palonga 28:28

Na a Pol e teꞌuri loꞌu, “Oto aena mei olana, nge saeku hunie omu ke sai diana aana uri a God ko sare haꞌa-uurie noꞌone mo Aapoloa Aaopa, na kire kei rongo taane hunie.”

Palonga 20:27

Aana maholo nou iiꞌo peꞌiꞌomu nou kaꞌa maꞌu ike huni unu tahangaꞌinie walu ola a God a saetoꞌo aana omu ke saiꞌi.

Kalesia 3:28

Oto nga mei ola hunie ke aaopa i matolamiu mo Jiu na mo Aapoloa Aaopa haꞌike loꞌu, wa i matolana mo koni-konihe na mo aalaha, wa i matolana mo mwane na mo keni. Omu meni neꞌie oto e taꞌa-taꞌa iinoni i lalo aana a Kraes Jisas.

Palonga 6:7

Oto walana God mone ko lae ahusie oto mo henue hunge, na mo pwaarongoisuli i Jerusalem kire ko hunge loꞌu liutaa, na hungelana mo pris ko lulu i sulie oto a Jisas noꞌone.

Palonga 9:13

Oto a Ananaeas ko aalamie uuri, “Aalaha, nou rongoa mo laladonga hunge i sulie mo ola aaela a mwane ngeena ko esuiꞌi aana mwala iꞌoe taꞌau i Jerusalem.

Hibru 6:9

Maeni eesiku maaꞌi, maꞌalana uri melu ko ere hiitoꞌo huniꞌomu urine, taꞌe melu sai diana aana taane mola uri omu ko lulu i sulie ue tala takoie maurihe ngeena.

2 Pita 2:21

E lae oto i diana uri kire ke suꞌuri lio saie tolahai ola diana ngeena, aana urine haꞌalaa haꞌaloinge ikire e saꞌa tohungei peine ike. Taꞌe mo iini nge kire saie oto tala diana a God na kire ko aatopuri mola aana, ikire oto a God kei tohungei lei aaelasire oto liutaa.

Jiud 1:1

Saediananga mwaanieu a Jiud, koni-konihe a Jisas Kraes, na aasine a Jemes. No ko uusu-uusu ie huniꞌomu mo iini nge a God e soiꞌomu mei i saana. A God Mamaꞌa e tohungei manata diana huniꞌomu na omu iiꞌo oto i lalo aana hai kinetaꞌinge a Jisas Kraes.