Epesas 3:1 - Tataroha Diana

¹ Aena mei olana, nge ineu a Pol nou iiꞌo oto i nume ni hoꞌo ie, aena aana ineu iinoni a Jisas Kraes na nou esu talamiu mo iini nge iꞌomu nga mo Jiu haꞌike.

Epesas 3:1 Referans Kwoze

Kolosi 1:24

Oto maꞌalana no ko sapesalu oto ienini i tehulaꞌamiu, taꞌe no ko ilenimwaꞌe mola, aena aana sapesalunge aana sapeku ienini kei peꞌiꞌomu. A Kraes e sapesalu hiitoꞌo waite huni peꞌie soihaadaꞌinge, aena aana sapena ni otona. Oto ineu no ko sapesalu noꞌone urine aana sapeku huni haꞌamangoa kele leu e oore ue aana sapesalunge a Kraes arengaku.

Epesas 4:1

Ineu mwane nge nou iiꞌo i laona nume ni hoꞌo haahie uri no ko esu nana Aalaha, no ko unue oto huniꞌomu uuri. Omu ke iiꞌo oodotaꞌi i sulie tolahai iinoni nge e malisine mo iini nge a God e soire hunie kire ke neꞌie mo iinoni ingeie.

2 Timoti 1:8

Oto aena ngeena o ke suꞌuri masa ni houleꞌinie a Jisas Kraes oodoie mwala. Na o ke suꞌuri masa honosieu i sulie uri nou iiꞌo i nume ni hoꞌo haahie asunge nana. Taꞌe o ke hele maꞌutaꞌa mola aana nanamanga a God, na o ke mwaꞌe-mwaꞌe mola ni sapesalu aana o ko tarohaꞌinie Tataroha Diana a Jisas mala ineu.

Epesas 6:20

Ineu i laona nume ni hoꞌo aana maholo ie aena aana nou tarohaꞌinie Tataroha Diana ngeena mala mwane auꞌesu oalana a God. Oto omu ke aarengaꞌi talaku mwaanie uri nou meꞌu ni tarohaꞌi loꞌu.

Pilipae 1:7

Loꞌongaꞌinge ineu eemiu e paine liutaa. Na e malisine oto noꞌone ne ke hii urine aamiu, aena aana omu ko peꞌieu aana asunge nge a God e niie hunieu. Asunge ngeena huni haataꞌinie Tataroha Diana uri mei ola toꞌohuu hunie mwala ke CAF - hiiwalaimoli aana. Na omu ko peꞌieu suli maholo, uure oto mai na nou kaꞌa lae ue i nume ni hoꞌo, lai hule aana ineu oto i nume ni hoꞌo siꞌiri ie.

Pilimon 1:1

Saediananga mwaaniꞌemereꞌi a Pol na a Timoti, huniꞌo Pilimon. Ineu a Pol, nou iiꞌo i nume ni hoꞌo i tehulaꞌana asunge a Jisas Kraes, na aasike maaꞌi a Timoti ko peꞌieu ienini huni uusu-uusu weu huniꞌo, Pilimon. Iꞌoe, o tohungei esu diana peꞌiꞌemeelu nana God, na iꞌoe oto tohungei malahumeelu.

Palonga 23:18

Oto ramo paine ngeena e toolea saanau wau i saana poro paine haahie sinolai ramo, ko si teꞌuri hunie, “A Pol nge kolu tapolie kaꞌune e soieu hunie ne ke toolea kele saanau ie mai seemu, aana ko sare haꞌarongoꞌo aana nga mei ola.”

Tataroha Diana I Sulie A Jisas Kraes Nge A Luk E Uusue 21:12

“Taꞌe i naꞌona walu ola ienini ke si reu, mwala kei tapoliꞌomu na kire kei teungeꞌiniꞌomu. Kire kei tooleꞌomu i laona mo nume ni palo-palo hunie mo mwane paine kei leiꞌomu. Na kire kei tooleꞌomu loꞌu i naꞌona mo aalaha na mo inemauri hunie kire kei leiꞌomu noꞌone. Na kire kei meni aasiꞌomu i laona mo nume ni hoꞌo aena aana omu ko lulu i sulieu.

Pilimon 1:23

A Epapras ko iiꞌo noꞌone i nume ni hoꞌo peꞌieu i tehulaꞌana a Jisas Kraes, na ingeie ko niie noꞌone saediananga ingeie huniꞌomu.

Palonga 26:29

Oto a Pol ko teꞌuri, “Maꞌalana kele maholoi sato e oꞌoruꞌe wa ke tewa loꞌu, taꞌe no ko aare-aarea God hunie mwala nge omu ko pwaarongo hunieu siꞌiri omu ke mani sada peꞌieu. Taꞌe hoꞌosilemiu aani iieli heu haꞌalaa nge nou sereꞌinie ke rau eemiu.”

2 Timoti 1:16

Taꞌe a Onesiporas e kaꞌa toliꞌaasieu ike, na e tohungei peꞌi-peꞌieu tarau na e kaꞌa masa ike honosieu maꞌalana nou oꞌoꞌo i nume ni hoꞌo. Aena urine nge no ko aarea a Aalaha ke haꞌadianaꞌaa uluhe ingeie.

Kolosi 4:18

Ineu a Pol ni no ko niie saediananga ienini huniꞌomu, na no ko uusue oto mo wala ooreta ienini maraaku. Omu ke aamasitoꞌo aaku aana ineu i nume ni hoꞌo. No ko eitanaie a God hunie hahuꞌana manata-diananga ingeie ke iiꞌo peꞌiꞌomu.

Kolosi 4:3

Omu saie taane uri ineu i laona nume ni hoꞌo siꞌiri aena aana nou lae peꞌi houleꞌinie Tataroha Diana i sulie a Kraes. Taꞌe maꞌalana ineu i nume ni hoꞌo urine, omu ke aare-aarengaꞌi noꞌone talameelu mo oaku uri hunie a God ke niie nga mo maholo diana nameelu huni houleꞌinie a Kraes i saana ngaeta mwala.

2 Korinit 11:23

Kire ko unue uri ikire oto mo koni-konihe a Kraes. No ko ere loꞌu mala iinoni e pweu, taꞌe ineu oto nou tohungei esu mala koni-konihe a Kraes loꞌu liutaa aada. I tehulaꞌana asunge a Kraes ienini nou sapesalu oto hiitoꞌo liutaa aada. Ineu oto nou iiꞌo i nume ni hoꞌo mo maholo hunge liutaa aada. Ineu oto kire wini-winieu hiitoꞌo liutaa aada. Ineu oto nou karaꞌi mae mo maholo hunge liutaa aada.

2 Korinit 10:1

Oto ineu a Pol maraaku no ko eitanaiꞌomu hunie uri omu ke rongo hunieu. Nou rongoa uri ngaeta mo iini eemiu kire ko unue uri nou sai ere hiitoꞌo huniꞌomu mola aani uusu-uusu maholo nou iiꞌo haꞌatauliꞌomu, taꞌe no ko meꞌu ni ere urine maholo nou iiꞌo peꞌiꞌomu. !Haꞌike! Taꞌe no ko heimaanie tolahana a Kraes aana ingeie e saemamae na e lai maneko

Palonga 21:33

Maholo poro paine e lae mai hule i saana Pol oto e unue mo ramo ingeie kire ke tapolie na kire ke pwasue aana e ro iieli heu. Oto ko si dolosi aana mwala uuri, “?A tei mwane ni ie? ?Na nga taa ni e asuie?”

Haataꞌinge 2:10

Mwaanie omu meꞌu-meꞌuteꞌinie nga mei ola aana walu ola nge karaꞌinie oto kire kei reu eemiu ngeena. !Omu ke rongo kaꞌu! A Pwelu Eero-eero kei malaahongamiu na kei aasie ngaeta mo iini eemiu i laona nume ni hoꞌo, na taungeꞌinilemiu kei lae mola i sulie aawalai hei dinge haahuu. Omu ke hele susuleꞌi mola aaku lai hule aana maenga, oto ne kei niie huniꞌomu rorodara ni meurihe.

Epesas 3:13

Oto no ko sare ere haꞌasusuꞌomu mola mwaanie omu aakohe aana maholo omu ko leesie uri no ko sapesalu haahiꞌomu, aana no ko esuie urine uri hunie omu ke iiꞌo ni menikuluꞌe taꞌau i Lengi ni ngeena.

Kalesia 5:11

Maeni eesiku maaꞌi, omu ke loꞌongaꞌi keꞌu i sulie laeliwalanga ineu. ?Mala uri no ko lae-lae mola ue peꞌi laeliwalanga aana torihesiꞌonga, e ue kaꞌu mo Jiu ko si teu-teungeꞌinieu mola? Mala uri leune ke toꞌohuu, haꞌalaa kire saꞌa saewasulieu ike loꞌu haahie laeliwalanga i sulie maelana a Kraes i lengine poꞌu-poꞌu.

Kalesia 5:2

Ineu a Pol no ko unue oto huniꞌomu, mala uri omu kei ooli takoie mo Haꞌatolanga aana omu toliꞌaasiꞌomu maraamiu hunie torihesiꞌonga, a Kraes e saꞌa peꞌiꞌomu oto eena.

Palonga 9:15

Taꞌe a Aalaha e teꞌuri mola hunie, “!O ke lae mola! A mwane ngeena nou lio hilisie oto hunie ke asu nekue. Kei tarohaꞌinie sataku hunie mo Aapoloa Aaopa na mo inemauri ikire, na mo Israel noꞌone.

2 Korinit 1:6

Oto maholo melu ko sapesalu, nge sapesalunge ngeena ko heꞌi peꞌiꞌomu loꞌu hunie omu ke hele aana maurihe huu. E toꞌohuu oto, i sulie a God ko haꞌadodoa saemeelu hunie iꞌemeelu noꞌone melu ke haꞌadodoa loꞌu saemiu. Oto urine omu ke uure aꞌailaꞌa taraꞌasi mola maholo omu ko sapesalu loꞌu mala iꞌemeelu ienini.

Kalesia 5:24

Taꞌe mo iinoni nge kire toꞌo aana a Jisas Kraes i lalo aada, kire neꞌi aasie oto mo tolaha ni iinoni aaela, aana e urihana kire rapu taalengasie noꞌone ahutana mo tolahai iinoni aaela ikire i lengine poꞌu-poꞌu, na kire horo maesiꞌi oto.

Epesas 3:8

Maꞌalana uri nou mwai-mwei loꞌu mwaanie ahutana mwala a God, a God e tohungei diana oto hunieu, hule aana e niie mei esunge ngeena hunieu. E uusungeꞌinieu weu i saana mwala nge ikire nga mo Jiu haꞌike, huni tarohaꞌinie Tataroha Diana i sulie mo tohungei ola diana nge a Kraes e niiꞌi hunikie—mo ola nge kire diana oto liutaa mwaanie taꞌena nga ola kie sai loꞌongaꞌiniꞌi.

Epesas 3:11

A God e asuie oto mei olana i sulie oalaꞌinge ingeie uure oto mai naꞌo, na e haꞌa-oaie leune oto aana asunge Aalaha ikie a Jisas Kraes.