2 Pita 3:9 - Tataroha Diana9 Ngaeta mwala kire ko loꞌo-loꞌongaꞌinie uri Aalaha ikie ko tohungei haꞌahiru huni haꞌa-oaie mo heiholotaꞌinge ingeie i sulie oolinge mai ingeie. Taꞌe kire kaꞌa lio saie ike loꞌongaꞌinge ingeie, aana a God ko maaꞌoohi mola hunie mwala kire ke oonisae na kire ke aaliꞌu loꞌu i saana mwaanie kire aiꞌaa aana leilada kei lae. Gade chapit la |
A God e tohungei saediana huniꞌomu, na e kaꞌa sai saewasu lau-leu ike, taꞌe ko tohungei toli rako mola peꞌiꞌomu. !Taꞌe iꞌomu, omu ko neꞌi-neꞌisae mwakataꞌinie mola tolahana! ?Aana e ue? ?Uri omu kaꞌa lio-lio saie ike uri a God e tohungei diana huniꞌomu urine, aena aana ko niie nga kele maholo huniꞌomu hunie uri omu ke oonisae mwaanie mo tolahai ola aaela iꞌomu?
Aalaha ikie ko niie maholo huniꞌomu ni ngeena, kaꞌu e kaꞌa lae-lae ue mai lau-leu. Oto omu ke toꞌo maaie mala uri nga maholo oto hunie haꞌa-uurilemiu kei lae ni ngeena. Taꞌa-taꞌa mei neꞌisaenga urine a God e niie noꞌone hunie aasikaelu maaꞌi a Pol, mala e uusue kaꞌu taꞌa-taꞌa taungei erenga ngeena noꞌone huniꞌomu.
Na niilana hai aamasinge e lae oto hunieu urine aana a Jisas Kraes e sare haataꞌinie uri saeꞌaasinge ingeie e kaꞌa toꞌo taitelihana. Na aana e haꞌa-uurieu, iini nge e oorahaꞌaa aaela oto liutaa, e haataꞌinie oto uri e sai haꞌa-uurie taꞌena nga iini nge ko norutoꞌo aana. Na ikire noꞌone kire sai toꞌo aana maurihe huu.
Oto e sada noꞌone mola mala nga taa a God e asuie, aana ikie mo iinoni kie urihana mola mo nime a God e aadumiꞌi. Mala uri a God ko sare haataꞌinie saewasunge ingeie na uri hunie mwala ke leesie sakanga aana haꞌaloinge e asuie, nge leu i sapena a God ni ngeena. Taꞌe mala uri a God ko haro lae rako mola peꞌie saewasunge ingeie, maꞌalana uri e malisine oto ke saewasulie mwala ngeena na ke horo suuheꞌinire, nge leu i sapena loꞌu ni ngeena.
Oto no ko unue huniꞌomu uri omu ke asuie walu ola ienini, aana omu saie oto mo maholo uri taa ni ie. Kie hiiwalaimoli aana a Jisas e tewa oto, na e karaꞌinie oto maholo nge a God kei lae mai huni haꞌa-uurikie. Oto omu ke dau aakau hunie laenga mai a Kraes, na mwaanie omu iiꞌo mola mala mo iini kire ko maꞌa-maꞌahu ue.