1 Timoti 5:17 - Tataroha Diana

¹⁷ Mo naꞌohai mwane nge kire ko lio i suli diana aana soihaadaꞌinge, na kire ko tohungei esu hiitoꞌo aani laeliwalanga na haꞌa-uusulinge, e tohungei diana oto liutaa hunie ruruhaa ke haꞌamaꞌu aada na ke waai diana aada noꞌone.

1 Timoti 5:17 Referans Kwoze

Hibru 13:17

Omu ke totola i sulie mo naꞌohai mwane aana soihaadaꞌinge iꞌomu peꞌi mwaꞌe-mwaꞌenga i sulie walada, aana ikire ni kire ko lio i sulie maurihaꞌamiu. Na a God ke iꞌie asunge ikire. Oto omu ke tola i sulire hunie kire ke asu ni ilenimwaꞌenga aana mei esunge ngeena, na mwaanie kire asu mola peꞌie saehuunge. Aana mala uri asunge ngeena kei hiꞌe hiitoꞌo hunire aana omu kaꞌa peꞌire, nge e saꞌa peꞌiꞌomu oto ooꞌoo.

Kalesia 6:6

Taꞌena nga iini haꞌa-uusulilana ko lae aana walana a God, nge ke waaie haꞌa-uusuli ingeie aana nga moi taa diana nge e toꞌo aani.

Tataroha Diana I Sulie A Jisas Kraes Nge A Luk E Uusue 10:7

Na omu ke iiꞌo rako oto mola aana numena. Mwaanie omu lae-lae hailiu loꞌu aana ngaeta mo nume. Omu ke ngau-ngeu mola na omu ke inu-inu aana nga moi taa kire ko niiꞌi huniꞌomu. Aana e diana hunie mwala ke peꞌiꞌomu, aana iinoni auꞌesu e malisine oto uri ke hele aana waaitana.

Hibru 13:7

Omu ke aamasitoꞌo aana mo iini nge kire unu-unue kaꞌu walana God huniꞌomu na kire naꞌomiu i sulie tala diana ngeena. Omu ke toꞌomaaie iiꞌonga diana ikire lai hule oto aana kire mae, hunie iꞌomu noꞌone omu ke hiiwalaimoli diana loꞌu mala ikire.

2 Timoti 2:6

Na asunge iꞌoe ke urihana noꞌone iinoni nge ko esu waaꞌiniꞌini aana hohola ingeie. Iinonine e malisine oto uri ingeie ni kei holaꞌi ngeue mo ngeulaa aana hohola ngeena.

Pilipae 2:29

Aena urine, omu ke takuhie peꞌi ilenimwaꞌenga mala aasikaelu i lalo aana Kraes. Na omu ke haꞌamaꞌu noꞌone aana mo iini mala ingeie.

Uusu-uusu A Pol Hurula'aa Hunie Mo Rom 12:8

Mala uri niinge a God ko lae oto huniꞌo huni ere haꞌasusue saena mwala, nge o ke asu diana oto urine. Na mala uri niinge a God ko lae oto huniꞌo huni peꞌie mwala aani niilana mo ola hunire, nge o ke nii mwaakule oto hiitoꞌo hunire. Na mala uri niinge a God ko lae oto huniꞌo huni naꞌona mwala, nge o ke asu peꞌi lio i sulinge waaꞌiniꞌini oto toꞌohuu. Na mala uri niinge a God ko lae oto huniꞌo huni hei-hei-aamasi, nge o ke aama-aamasie mwala oto peꞌie ilenimwaꞌenga.

Palonga 28:10

Na kire niie mo niinge hunge nameelu, na lae-lae maholo melu deu aakau huni lae mwaanire, kire ko heꞌi niie loꞌu mo ola nge melu saetoꞌo aani hunie laenga iꞌemeelu ngeena.

2 Korinit 6:1

Oto aani esunge tararuru peꞌie a God, melu ko eitanaiꞌomu, mo iini omu hele aana oto niinge paine a God ngeena, mwaanie omu toliꞌaasie niinge paine ngeena e totowai mola.

Uusu-uusu A Pol Hurula'aa Hunie Mo Rom 16:12

Mei wala ni saediananga ineu noꞌone hunie a Traefina na Traefosa, e ro keni kire asu aꞌailaꞌa nana Aalaha, na hunie tohungei malahuku a Pesis, ngaeta keni loꞌu e asu aꞌailaꞌa nana Aalaha.

Uusu-uusu A Pol Hurula'aa Hunie Mo Rom 15:27

Ikire maraada ni kire loꞌongaꞌi ni esuie leune urine, aana e urihana kire kaoni aana mo Jiu na e roroꞌaire noꞌone huni peꞌie mo meitale taꞌau i Jerusalem, aena aana mo Jiu oto ni kire holaꞌi peꞌire aana mo ola diana hunie maurihaꞌai. Oto mwala nge ikire nga mo Jiu haꞌike, e malisine mola kire ke peꞌie loꞌu mo Jiu aani niilana mo ola diana hunie mauringe mai welumalau.

Pilipae 4:3

Na iꞌoe a oaku toꞌohuu, nou saetoꞌo aana uri o ke peꞌie e ro keitaꞌaa ngeena. Aana kirerue tohungei peꞌi diana aaku huni tarohaꞌinie Tataroha Diana, peꞌie a Klemen na mo iini loꞌu weu nge iidumilana satada e lae oto i laona uusu-uusu ni meurihe huu.

1 Korinit 16:16

omu ke lulu i sulie oto mo taungei naꞌohai iinoni urine, na taꞌena nga iini ko esu peꞌire.

Palonga 11:30

Kire teꞌurine, nge kire si uusungeꞌinie a Banabas na a Sol hunie kirerue ke toolea mo niinge na kire ke niiꞌi hunie mo naꞌohai iinoni aana soihaadaꞌinge.

2 Timoti 4:2

uri o ke lae taraꞌasi oto peꞌie tarohaꞌinilana walana God. O ke laeliwala hunie mwala oto tarau, maꞌalana mwala kaꞌa sare rongo huniꞌo. O ke haꞌa-oodohie tolahada maholo kire ko lae takalo, na o ke haataꞌinie mo oorahaꞌaa ikire hunire hunie kire ke aaliꞌu mwaaniꞌi, na o ke ere haꞌasusure noꞌone. Walu ola ngeena o ke asuiꞌi peꞌi toli-rakonga, na peꞌi haꞌananaunge diana.

1 Timoti 4:16

O ke kinetaꞌinie mauringe iꞌoe hunie ke diana, na haꞌa-uusulinge iꞌoe hunie mwala ke diana noꞌone. Aana mala uri o kei hele susuleꞌi aani iiꞌonga oodotaꞌi, na o ke lae taraꞌasi peꞌie haꞌananaulana mwala urine, nge o sai haꞌa-uuriꞌo maraamu na mo iini nge kire ko pwaarongo i suliꞌo.

1 Timoti 3:5

(?Mala uri nga iini e kaꞌa sai lio i suli diana aana uluhe ingeie maraana, haꞌalaa ke si lio i suli diana aana soihaadaꞌinge a God uri taa eena?)

Pilipae 2:16

aani laeliwalanga nada aana mei wala nge e sai niie maurihe huu hunire. Na mala uri omu ko teꞌurine, nge ne kei tohungei ilenimwaꞌe aana hai dinge a Kraes kei ooli mei, aena aana ne kei saie uri nou kaꞌa huru mwaakule ike taane aana asunge ineu i matolamiu.

Matiu 24:25

Aena urine, nge no ko holaꞌi haꞌapasuliꞌomu oto aana walu olana, hunie omu ke lio diana talamiu.

Hibru 13:24

Omu ke niie mei wala ni saediananga iꞌemeelu hunie ahutana mo naꞌohai iinoni iꞌomu na loꞌu hunie ahutana mo iinoni maaꞌi a God wau i seemiu. Mo eesikaelu mai leu aana poꞌo ni henue i Italia kire ko niie noꞌone wau saediananga ikire huniꞌomu.

1 Timoti 4:10

Aana kolu esu aꞌailaꞌa mola aana kolu tohungei hiiwalaimoli oto aana God Mau-meuriꞌe, nge e sai haꞌa-uurie taꞌena nga iinoni, na kei haꞌa-uurikie mo iini kie hiiwalaimoli aana.

1 Korinit 15:10

Taꞌe aana niinge ni hahuꞌana manata-diananga a God e lae hunieu mone, no ko oꞌoꞌo urine ue ie. Na manata-diananga a God hunieu e kaꞌa waetaꞌi ike taane mola mwaakule, aana nou lae peꞌi esu oto hiitoꞌo loꞌu liutaa aada mo hurulaꞌaa. Taꞌe nou kaꞌa asuie ike taane tohuku, aana niinge a God mone ko peꞌieu huni esuie leune urine.

Palonga 20:35

Aana ahutana asunge ineu, nou haataꞌinie oto huniꞌomu uri kolu ke asu aꞌailaꞌa tarau hunie kolu ke peꞌie mo iini nge kire mamaelaꞌa. Na kolu ke aamasitoꞌo aana mei wala a Jisas Aalaha ikie aana e teꞌuri, ‘Iini nge ko nii-nii, haꞌadianaꞌalana kei peine loꞌu liutaa aana mo iini ko hele aana mo niinge.’ ”

Tataroha Diana I Sulie A Jisas Kraes Nge A Jon E Uusue 4:38

Ineu no ko uusungeꞌiniꞌomu taꞌau huni soꞌokonie mola mo ola omu kaꞌa hasiꞌi. Mo iini aaopa kire holaꞌi esu i laona hohola ngeena, na iꞌomu omu ko si helesie diananga mola aana asunge ikire.”

Tataroha Diana I Sulie A Jisas Kraes Nge A Luk E Uusue 12:42

Oto a Jisas ko aalamie a Pita uuri, “No ko unue huniꞌomu na hunie taꞌena nga iini e saenanau. ?Aana a tei kaꞌu e saenanau na e neꞌi koni-konihe diana? Ingeie oto iini nge aalaha ingeie e neꞌie hunie ke lio i sulie ngaeta mwala auꞌesu aana maholo ko lae, na hunie ke nii-niie waaitada hunire i suli maholo.

1 Timoti 5:3

Na o ke lio i sulie mo nao keni nge ikire mo nao keni toꞌohuu.

1 Timoti 4:6

Nou saie kaleku, uri o peine poi peꞌie rongolana mo haꞌananaunge i sulie hiiwalaimolinge na uri o ko totola ue i sulie mo haꞌa-uusulinge diana ngeena hule siꞌiri. Oto o ke unue loꞌu mo ola ienini hunie mo mwaasine wau i Epesas, hunie o ke neꞌi koni-konihe diana oto nana a Kraes Jisas.

1 Korinit 3:9

Aana iꞌemereꞌi e ro mwane nge mere ko esu tararuru nana a God, na iꞌomu oto domana hohola ingeie. Na iꞌomu domana oto noꞌone nume a God.

1 Timoti 4:14

Na o ke aamasitoꞌo kaꞌu aana maholo mo naꞌohai mwane aana soihaadaꞌinge kire hele i pweumu na ngaeta mo propet aada kire unu tahangaꞌinie walana a God i suliꞌo. Aana maholona a Liꞌoa Maaꞌi e niie nanamanga huniꞌo hunie o ke asu diana nana. Oto mwaanie o pupulongosie mei niinge ngeena, taꞌe o ke asu diana mola aana nanamanga ngeena.

1 Timoti 5:19

O ke suꞌuri rongo hunie nga iini nge ko unue uri nga naꞌohai mwane haahie soihaadaꞌinge e dau huꞌisie nga haꞌatolanga, mala uri taꞌe ingeie mola ko ere urine na nga ro iini wa e oolu kire kaꞌa lae ike mai ere urine noꞌone.